அக்கப்போருக்கு ஒரு அளவில்லையா.. மதுரைக்காரரால் தெறித்து ஓடும் தேமுதிக நிர்வாகிகள்! பின்னணி என்ன?

Published: Tuesday, November 8, 2022, 16:31 [IST]

Subscribe to Oneindia Tamil

சென்னை: தேமுதிகவிலிருந்து முக்கிய நிர்வாகிகள் அடுத்தடுத்து விலகிச் செல்வதற்கு காரணம் மதுரைக்காரர் என கைகாட்டுகிறார்கள் கேப்டனின் ரசிகர்கள்.

தலைமையிடம் தனக்கு மிகுந்த செல்வாக்கு உள்ளதாக கூறி கட்சிக்காரர்களை கசக்கி பிழிவதால் தான் தேமுதிக நிர்வாகிகள் மாற்றுக் கட்சிகளை தேடிச் செல்கிறார்களாம்.

அண்மையில் பனப்பட்டி தினகரன் கட்சியிலிருந்து விலகிய அதிர்ச்சியிருந்து மீளாத தேமுதிக தலைமை, இனி அடுத்தடுத்து நிர்வாகிகள் பறந்துவிடாமல் கூண்டு போட்டு வருகிறதாம்.

தேமுதிக

ஒரு காலத்தில் தமிழகத்தின் பிரதான எதிர்க்கட்சியாக அசுர வேகத்தில் வளர்ந்து வந்த தேமுதிக இன்று இருக்கும் இடம் தெரியாமல் இருந்து வருகிறது. இதற்கு காரணம் அக்கட்சியின் முக்கிய முன்னணி நிர்வாகிகள் பலர் மாற்றுக் கட்சிகளுக்கு பறந்து சென்றதே. இதனிடையே இருக்கும் நிர்வாகிகளையாவது தலைமை அணுசரித்து கொண்டு செல்லும் எனப் பார்த்தால் மதுரைக்காரர் ஒருவரின் அக்கப்போருக்கு அளவில்லை எனத் தெரிவிக்கப்படுகிறது.

மதுரைக்காரர்

தலைமையிடம் தனக்கு மிகுந்த செல்வாக்கு உள்ளதாக கூறி கட்சிக்காரர்களை மதுரைக்காரர் கசக்கி பிழிவதால் தென் மாவட்ட தேமுதிக நிர்வாகிகள் பலர் வரிசையாக ஜூட் விட ஆயத்தமாகிவிட்டார்கள். நாடாளுமன்றத் தேர்தல் வரவுள்ளதால் தேமுதிக நிர்வாகிகளுக்கு தேசியக் கட்சி ஒன்றும் மாநிலக் கட்சி ஒன்றும் ஆஃபர்களை அள்ளித் தர தயாராக இருக்கிறதாம். இதனால் நிர்வாகிகளை தக்க வைக்க தேமுதிக தலைமை போராடி வருகிறதாம்.

சம்பாதிக்க வழியில்லை

தேமுதிகவில் மாவட்டச் செயலாளராக இருக்கும் பலரும் சம்பாதிக்க வழியில்லாமல் தவித்து வரும் நிலையிலும், மதுரைக்காரர் கொஞ்சம் கூட தயங்குவதில்லையாம். உடல் நலிவடைந்து விஜயகாந்த் வீட்டில் ஓய்வெடுத்து வரும் சூழலில், கட்சியும் நலிவடைந்து வருவது கேப்டனின் உண்மையான ரசிகர்களை கலங்க வைத்துள்ளது. தேமுதிக மீண்டும் அரசியல் வானில் பறக்க வேண்டும் என்றால் வரும் நாடாளுமன்றத் தேர்தலில் வெற்றிக்கூட்டணியில் இணைந்தால் மட்டுமே சாத்தியம் என்பது குறிப்பிடத்தக்கது.

எப்போது பதவி?

இதனிடையே விஜயபிரபாகரனுக்கு தேமுதிகவில் எப்போது புரோமோஷன் கிடைக்கும் என்ற எதிர்பார்ப்பு அக்கட்சி நிர்வாகிகள் மத்தியில் எழுந்துள்ளது. இதேபோல் பிரேமலதா விஜயகந்துக்கும் தேமுதிகவில் செயல் தலைவர் பதவி எப்போது கிடைக்கும் என்ற விவாதம் நடந்து வருகிறது.

Published On November 8, 2022