இனி ரூட் தலயே இருக்க கூடாது.. மீறினால் ஜெயில்தான்.. வார்னிங் கொடுத்தது சென்னை போலீஸ்!

ரூட் தல முறை இனி இருக்ககூடாது என சென்னை போலீஸ் எச்சரித்துள்ளது

சென்னை: "இனிமேல் ரூட் தல என்ற முறையே இருக்கக் கூடாது. மீறி நடந்தால், மாணவர்களே ஆனாலும் சிறைதான்" என்று சென்னை மாநகர காவல்துறை எச்சரித்துள்ளது.

நேற்று பச்சையப்பன் கல்லூரி இரு தரப்பு மாணவர்களிடையே ரூட் தல பிரச்சனை விவகாரம் வெடித்தது. காலேஜ் முடிந்து ஒரே பஸ்ஸில் மாணவர்கள் சென்றபோது, ரூட் தல விவகாரம் கிளம்பி இரு தரப்புமே சரமாரியாக மோதிக் கொண்டனர்.

பஸ்ஸில் இருந்து இறங்கி நடுரோட்டில் ஓடிய மாணவர்களை மற்றொரு தரப்பு மாணவர்கள் விரட்டி விரட்டி சென்று, கத்தி, அரிவாள் உள்ளிட்ட ஆயுதங்களால் எடுத்து தாக்கி கொண்டனர். இதில் 7 பேருக்கு அரிவாள் வெட்டு ஏற்பட்டது.

2 பேர் கைது

ஆயுதங்களை கையில் வைத்துக் கொண்டு நடுரோட்டில் அங்கும் இங்கும் ஆவேசமாக நடமாடிய மாணவர்களை பொதுமக்கள் ஷாக் ஆனார்கள். தகவலறிந்து வந்த போலீசார் 2 பேரை கைது செய்தனர். ரூட் தல பிரச்சனையில் எத்தனையோ முறை போலீசார் தலையிட்டு, மாணவர்களுக்கு அட்வைஸ் தந்தும் இந்த பிரச்சனை ஒவ்வொரு வருடமும் தொடர்ந்து வருகிறது.

கவுன்சிலிங்

அதனால், சென்னையில் உள்ள கல்லூரி மாணவர்களை போலீஸ் உயர்அதிகாரிகள் சந்தித்து ஆலோசனை நடத்த இன்று முடிவு செய்தார்கள் அதன்படி, மாநிலக் கல்லூரி மாணவர்கள், பேராசிரியர்களுடன் திருவல்லிக்கேணி காவல் துணை ஆணையர் ஆலோசனை நடத்தினார். அதேபோல, நந்தனம் கல்லூரி மாணவர்களுடன் அடையாறு துணை ஆணையர் பகலவன் ஆலோசனை நடத்தினார்.

வன்முறை

பின்னர் செய்தியாளர்களிடம் பேசிய காவல் இணை ஆணையர் சுதாகர், "இனிமேல் ரூட் தல என்ற முறையே இருக்கக் கூடாது. மீறி நடந்தால், வன்முறையில் ஈடுபடும் மாணவர்கள் மீது குண்டர் பாயும். இதுவரை அவர்களை மாணவர்கள் என்ற கோணத்தில் தான் நடவடிக்கை எடுத்துள்ளோம், ஆனால் இந்த நிலைமையே தொடரும் பட்சத்தில் மாணவராக இருந்தாலும்சரி, வாழ்நாள் முழுவதும் சிறை தண்டனை அனுபவிக்க வேண்டிய சூழல் ஏற்படும்.

அறிவுறுத்தல்

இன்னொரு முறை இப்படி மாநகர பஸ்களில் வன்முறை சம்பவங்கள் நடந்தால் பொது மக்கள் உடனடியாக 100-ஐ தொடர்பு கொண்டு புகார் தெரிவிக்கலாம். அதேபோல, பஸ் கூரை மீது மாணவர்கள் ஏறினால் பஸ்ஸை எடுக்க கூடாது என்று டிரைவர்களுக்கு அறிவுறுத்தி உள்ளோம். மோதல்கள் ஏற்படும் வழித்தடங்களில் இனி தீவிரமாக கண்காணிக்கப்படும்" என்றார்.

English summary

Police Officials warned Chennai college students in the Route Thala issue