திமுக - தேமுதிக கூட்டணி குறித்த கேள்வி.. முகம் மாறிய எடப்பாடி! பதிலளிக்க மறுப்பு!

சென்னை: தேமுதிக யாருடன் கூட்டணி அமைக்கும் என்பது தொடர்பாக கடந்த இரு மாதங்களாக நீடித்து வந்த சஸ்பென்ஸ் இன்று முடிவுக்கு வந்துள்ளது. திமுக தலைமையிலான கூட்டணியில் தேமுதிக இணைந்துள்ளது. அக்கட்சிக்கு 7 சட்டமன்ற தொகுதிகளும் 1 ராஜ்யசபா சீட்டும் வழங்கப்பட இருப்பதாக கூறப்படுகிறது.

தேசிய ஜனநாயக கூட்டணியில் தேமுதிக இணையலாம் என்ற எதிர்பார்ப்பு நிலவி வந்த நிலையில் திடீர் திருப்பமாக திமுக கூட்டணியில் இணைந்தது அதிமுகவிற்கு அதிர்ச்சி அளிப்பதாக அமைந்துள்ளது. தேமுதிக திமுகவுடன் இணைந்து தொடர்பாக செய்தியாளர்களிடம் எடப்பாடியுடன் கேட்டனர். இதற்கு அவர் பதிலளிக்க மறுத்துவிட்டார்.

திமுகவுடன் தேமுதிக கூட்டணி

வரும் சட்டமன்ற தேர்தலில் யாருடன் கூட்டணி என்பது தொடர்பாக கடந்த இரு மாதங்களாக சஸ்பென்ஸ் வைத்து வந்த தேமுதிக, இன்று திமுகவுடன் கூட்டணி அமைத்துள்ளது. சென்னை அண்ணா அறிவாலயத்தில் முதல்வர் ஸ்டாலினை தேமுதிக பொதுச்செயலாளர் பிரேமலதா விஜயகாந்த், எல்.கே சுதிஷ் ஆகியோர் சந்தித்து இந்த கூட்டணியை உறுதி செய்தனர்.

தேமுதிகவை தங்கள் கூட்டணிக்கு இழுத்து அதிமுக மற்றும் பாஜகவிற்கு திமுக அதிர்ச்சி கொடுத்துள்ளது. தங்கள் கூட்டணிக்கு நிச்சயம் வரும் என்று தேசிய ஜனநாயக கூட்டணி நம்பிக்கொண்டு இருந்த நேரத்தில் ஸ்டாலின் செய்த ஸ்மார்ட் மூவ், தேமுதிகவை அதிரடி முடிவு எடுக்கவைத்துள்ளது.

எடப்பாடியிடம் செய்தியாளர்கள் கேள்வி

கடந்த இரண்டு தினங்களுக்கு முன்பாக கூட கோவை ஈஷா யோக மைய நிகழ்ச்சியின் போது எஸ்பி வேலுமணியை பிரேமலதா விஜயகாந்த் சந்தித்து பேசினார். ஆன்மிக நிகழ்ச்சியாக இருந்தாலும் கூட தேர்தல் கூட்டணி பேச்சுவார்த்தை சென்று கொண்டு இருக்கும் நேரத்தில் நடைபெற்ற இந்த சந்திப்பு மிகவும் முக்கியத்துவம் பெற்றிருந்தது.

தேமுதிக தேசிய ஜனநாயகக் கூட்டணிக்குள்தான் வரும் என்று பெரிதும் நம்பியிருந்த அதிமுக உள்ளிட்ட கட்சிகளுக்கு பெரும் அதிர்ச்சியாகவே இன்றைய தேமுதிக முடிவு அமைந்துள்ளது. தேமுதிக கூட்டணி அறிவிப்பு வெளியான சிறிது நேரத்தில் அதிமுக பொதுச்செயலாளர் எடப்பாடி பழனிசாமியிடம் இதுபற்றி செய்தியாளர்கள் கேட்டனர்.

முகம் மாறிய எடப்பாடி பழனிசாமி

அப்போது டக்கென முகம் மாறிய எடப்பாடி, பிறகு வந்து பேசுகிறேன் என்று கூறிவிட்டு பதிலளிக்க மறுப்பு தெரிவித்து விட்டு சென்றுவிட்டார். அதிமுக கூட்டணியில் மேலும் சில கட்சிகள் இணையும் என்று எடப்பாடி பழனிசாமி தொடர்ந்து பேசி வந்தார். தேமுதிகவையும் மனதில் வைத்தே எடப்பாடி பழனிசாமி பேசியதாக சொல்லப்பட்டது.

இந்த நிலையில், தற்போது தேமுதிகவும் திமுக கூட்டணிக்கு சென்று இருக்கிறது. தேமுதிக திமுக கூட்டணியில் இணைந்தது குறித்து பாஜகவும் கடும் விமர்சனங்களை முன்வைத்து வருகிறது. தமிழக பாஜக தனது எக்ஸ் தளத்தில், "விஜயகாந்த் படத்துடன் கேப்டனின் ஆன்மா மன்னிக்காது" என்று விமர்சித்துள்ளது.

English summary

The DMDK has officially joined the DMK-led alliance, ending months of speculation. Reports say the party will receive seven Assembly seats and one Rajya Sabha seat. The move surprised the AIADMK camp, and Edappadi K. Palaniswami declined to comment.