திமுகவின் மாஸ்டர் மைண்ட்...அதிமுக கோட்டைகளை சல்லி சல்லியாக நொறுக்கிய அமைச்சர்கள்... முதல்வர் ஹேப்பி

அதிமுகவின் கோட்டைகளில் ஓட்டை போட்டு சல்லி சல்லியாக நொறுக்கியுள்ளது திமுக இதற்கு மாஸ்டர் மைன்ட் ஆக செயல்பட்டுள்ளனர் சில அமைச்சர்கள்.

Published: Wednesday, February 23, 2022, 10:06 [IST]

Subscribe to Oneindia Tamil

சென்னை: நடந்து முடிந்துள்ள நகர்ப்புற உள்ளாட்சித் தேர்தலில் அனைத்து மாநகராட்சிகளிலும் பெரும்பான்மையான வார்டுகளைக் கைப்பற்றி வெற்றி பெற்றாலும் கோவை, சேலத்தில் திமுகவின் கொடி பறப்பது முதல்வர் மு.க ஸ்டாலினை மகிழ்ச்சியின் உச்சத்திற்கே கொண்டு சென்றிருக்கிறது. இதற்கு மாஸ்டர் மைண்ட் ஆக செயல்பட்ட அமைச்சர்களுக்கு மிகப்பெரிய பரிசு காத்திருக்கிறதாம்.

வாக்குகள் எண்ணப்பட்டு தேர்தல் முடிவுகள் வரவர திமுக முகாமில் கொண்டாட்டங்கள் ஆரம்பமாயின. 90 சதவிகித வெற்றி அறிவிப்புகள் வந்த பிறகு அறிவாலயத்தில் தொண்டர்கள் மத்தியில் செய்தியாளர்களிடம் பேசிய மு.க ஸ்டாலின் இந்த வெற்றியை பெற்றுக்கொடுத்தவர்களுக்கும் வாக்களித்த மக்களுக்கும் நன்றி கூறினார்.

மக்கள் எங்கள் மீது வைத்துள்ள நம்பிக்கையை காப்பாற்ற நாங்கள் தயாராக இருக்கிறோம். எத்தனையோ நல்ல திட்டங்களை வரலாற்றில் பதிவாகக் கூடிய சாதனைகளை செய்திருக்கிறோம் இன்னும் செய்யப்போகிறோம் என்று கூறினார். திராவிட மாடல் ஆட்சிக்கு மக்கள் கொடுத்திருக்கக் கூடிய அங்கீகாரம் இது என்று கூறினார்

மாபெரும் வெற்றிக்குக் காரணம்

இந்த வெற்றிக்கு மகத்தான காரணம் மதசார்பற்ற கூட்டணிதான் என்று கூறினார். இது தேர்தலுக்கான கூட்டணி மட்டுமல்ல கொள்கை அளவில் இணைந்த காரணத்தினால்தான் மாபெரும் வெற்றி பெற்றுள்ளது என்றார். நடந்து முடிந்து நாடாளுமன்ற தேர்தல், சட்டசபைத் தேர்தல், உள்ளாட்சித் தேர்தலில் மகத்தான வெற்றியை பெற்றுள்ளோம். கூட்டணி கட்சித்தலைவர்களின் தொடர் பிரச்சாரமும் ஒத்துழைப்பும்தான் வெற்றிக்கு காரணமாக அமைந்துள்ளது என்றார் ஸ்டாலின்.

கொங்கு மண்டலம்

9 மாத காலமாக மக்களுக்கு பணியாற்றியதன் காரணமாகவே இவ்வளவு பெரிய வெற்றி கிடைத்திருக்கிறது என்று கூறிய ஸ்டாலின், அதிமுகவின் கோட்டை என்று சொல்லிக்கொண்டிருக்கிற கொங்கு மண்டலத்தையே இன்றைக்கு கைப்பற்றியிருக்கிறோம் என்றும் மு.க ஸ்டாலின் தெரிவித்தார். அப்போது மு.க ஸ்டாலின் முகத்தில் பெருமிதமும் பூரிப்பும் தெரிந்தது.

கே.என். நேரு

நகர்புற உள்ளாட்சித் தேர்தலில் முதல்வர் மு.க ஸ்டாலினுக்கு மாபெரும் வெற்றியை பரிசளித்திருக்கிறார்கள் அவரது நம்பிக்கைக்கு உரிய தளபதிகள். தேர்தல் நாளிலேயே இந்த வெற்றியை கணித்தவர் கே.என்.நேருதான். கோவையில் இந்த முறை நடைபெறும் உள்ளாட்சித் தேர்தலில் அனைத்து இடங்களிலும் திமுக கைப்பற்றும் என்று உறுதியாக சொன்னார்.

சேலத்திலும் சாதனை

அதே போல தமிழக அரசு செய்துள்ள சாதனைகளை மக்களிடம் கொண்டு சேர்த்துத் தான் இந்த முறை நாங்கள் வாக்கு சேகரித்தோம். உள்ளாட்சி தேர்தலில் வெற்றி திருச்சியில் மட்டுமல்ல. சேலத்திலும் கூட வெற்றி வாய்ப்பு மிகவும் பிரகாசமாக உள்ளது என்று சில தினங்களுக்கு முன்பே கூறியது போலவே பிரம்மாண்ட வெற்றி கிடைத்துள்ளது.

அதிமுகவின் கோட்டைகளை தகர்த்த அமைச்சர்கள்

நகர்ப்புற உள்ளாட்சித் தேர்தலில் அதிமுகவின் கோட்டையாகக் கருதப்பட்ட, கோவை மாநகராட்சி மற்றும் அம்மாவட்டத்தில் உள்ள நகராட்சிகளையும் திமுக கைப்பற்றியதற்கு அமைச்சர் செந்தில்பாலாஜியின் பங்கு முக்கியமானது என்பதை திமுகவில் பலரும் ஒப்புக்கொள்கின்றனர். கடந்த சில மாதங்களாகவே செந்தில் பாலாஜி கோவையிலேயே முகாமிட்டு பல வியூகங்களை வகுத்து மிகப்பிரம்மாண்டமான வெற்றியை முதல்வருக்கு பரிசளித்துள்ளார்.

மிகப்பெரிய பரிசு

அதே போல, சேலம் மாநகராட்சியையும் அம்மாவட்டத்தில் உள்ள நகராட்சிகளையும் குறிப்பாக இபிஎஸ் சொந்த தொகுதியான நகராட்சியை திமுக கைப்பற்றியது முதல்வருக்கு இரட்டிப்பு மகிழ்ச்சி ஏற்படுத்தியுள்ளதாம். இந்த வெற்றியும் திமுகவுக்கு புது உற்சாகத்தை அளித்திருக்கிறது. திமுகவில் மாஸ்டர் மைன்ட் ஆக செயல்பட்ட அமைச்சர் கே.என்.நேரு, அமைச்சர் செந்தில் பாலாஜி ஆகியோருக்கு மிகப்பெரிய பரிசு காத்திருப்பதாக அண்ணா அறிவாலய வட்டார தகவல்கள் தெரிவிக்கின்றன.

Published On February 23, 2022