மீண்டும் சர்ச்சையில் திமுக பேச்சாளர்.. பெண்களை இழிவுபடுத்துவதா? கண்கலங்கிய குஷ்பு.. ஆவேசமாக பேட்டி

சென்னை: திமுக பேச்சாளர் சிவாஜி கிருஷ்ணமூர்த்தி பேச்சு மீண்டும் சர்ச்சையை ஏற்படுத்தியுள்ளது. பெண்கள் குறித்து இழிவாக பேசிய சிவாஜி கிருஷ்ண மூர்த்தி பேச்சு தொடர்பாக தேசிய மகளிர் ஆணையம் தாமாக முன்வந்து விசாரணை நடத்தும் எனவும் பெண்கள் குறித்து இழிவாக பேசுவதை முதல்வர் அனுமதிக்கக் கூடாது எனவும் குஷ்பு ஆவேசமாக கூறியுள்ளார்.

ஆளுநர் ஆர்.என். ரவி குறித்து சர்ச்சைக்குரிய வகையில் பேசியதால் திமுகவிலிருந்து சஸ்பெண்ட் செய்யப்பட்டிருந்த அக்கட்சியின் தலைமைக்கழக பேச்சாளர் சிவாஜி கிருஷ்ணமூர்த்தி, தனது பேச்சுக்கு மன்னிப்பு கோரியதால் கடந்த சில மாதங்களுக்கு முன்பாக மீண்டும் திமுகவில் சேர்த்துக் கொள்ளப்பட்டார். இந்த நிலையில், திமுக பேச்சாளர் சிவாஜி கிருஷ்ண மூர்த்தி, பாஜக நிர்வாகியும் தேசிய மகளிர் ஆணைய உறுப்பினருமான குஷ்பு குறித்து சர்ச்சைக்குரிய வகையில் பரபரப்பை ஏற்படுத்தியுள்ளது.

சிவாஜி கிருஷ்ண மூர்த்தியின் பேச்சுக்கு கடும் எதிர்ப்புகள் கிளம்பியுள்ளன. பாஜக மாநில தலைவர் அண்ணாமலையும் சிவாஜி கிருஷ்ணமூர்த்தியின் பேச்சு அடங்கிய வீடியோவை பதிவிட்டு கடும் கண்டனத்தை பதிவிட்டு இருந்தார். இந்த நிலையில் சிவாஜி கிருஷ்ணமூர்த்தி பேச்சு தொடர்பாக தேசிய மகளிர் ஆணையம் தாமாக முன் வந்து விசாரணை நடத்தும் என்று குஷ்பு தெரிவித்துள்ளார். சென்னையில் இன்று குஷ்பு செய்தியாளர்களுக்கு பேட்டி அளித்தார். அப்போது அவர் கூறியதாவது:-

பெண்கள் எங்கேயும் இழிவாக பேசுவதில்லை. பெண்களை இழிவாக பேசுபவர்கள் உங்கள் தாயின் வளர்ப்பை இழிவுபடுத்துவதாகத்தான் அர்த்தம். திமுகவின் தாய் தந்தையாக கருணாநிதி இருக்கிறார். திமுகவினரின் இத்தகைய பேச்சு கருணாநிதியை இழிவுபடுத்துவது போல் உள்ளது. அது தெரியாமலே இவர்கள் ரசித்துக் கொண்டு இருக்கிறார்கள். திமுக பேச்சாளர் சிவாஜி கிருஷ்ண மூர்த்தி பேச்சு தொடர்பாக தேசிய மகளிர் ஆணையம் தாமாக முன்வந்து விசாரணை நடத்தும்.

பெண்களை அவதூறாக பேச உங்களுக்கு உரிமை கொடுத்தது யார்? என் வீட்டில் நாளைக்கு 10 பேர் வந்து கல் வீசினாலும் எனக்கு அதைப்பற்றி கவலை கிடையாது. இதே மாதிரி ஏற்கனவே கல் வீசியிருக்கிறார்கள். எனவே அதை எப்படி சந்திக்க வேண்டும் என எனக்கு தெரியும். என்னை சீண்டி பார்க்காதீர்கள். தாங்க மாட்டீர்கள். பெண் என்றால் இவ்வளவு இழிவாக போய் விட்டதா உங்களுக்கு..

அரசியல் ரீதியாக பதில் கருத்தை தெரிவியுங்கள். நான் ஒவ்வொரு பெண்ணிற்காகவும் பேசுகிறேன். பெண்கள் பற்றி இழிவாக பேச யாருக்குமே தைரியம் வரக்கூடாது. வந்தால் திருப்பி அடிப்போம். பெண்கள் யாருக்கும் பயப்பட வேண்டாம். யாரையும் நம்பி நான் தமிழ்நாட்டிற்கு வரவில்லை. என் திறமையை மட்டும் நம்பி தமிழ்நாட்டிற்கு வந்துள்ளேன். என்னை சீண்டிப்பார்க்க வேண்டாம். எந்த இடத்தில் இருந்தாலும் சரி.. பெண்ணை இழிவாக பேசினால் நான் சும்மா இருக்க மாட்டேன்..

திமுகவில் இருந்து பாஜக உறுப்பினரை கேவலமாக பேசியதாக இது கிடையாது. திமுகவில் இருந்து ஒரு பெண் குறித்து அசிங்கமாக பேசியிருக்கிறார். கேவலமான வார்த்தைகளை மேடையில் பயன்படுத்தியுள்ளார். இது போன்ற நபர்களை முட்டிக்கு முட்டி தட்டினால் தான் புத்தி வரும். இல்லையென்றால் புத்தி வராது. கருணாநிதி திமுகவிற்கும் - தற்போதைய திமுகவிற்கும் நிறைய வேறுபாடு உள்ளது. இதுதான் திராவிட மாடலா? " என ஆவேசமாக குஷ்பு பேட்டி அளித்தார். பேட்டிக்கு இடையே குஷ்பு கண்கலங்கவும் செய்தார்.

English summary

DMK speaker Sivaji Krishnamurthy's speech has again created controversy. Khushbu angrily said that the National Commission for Women will initiate an inquiry into Shivaji Krishna Murthy's speech which made derogatory remarks about women and the Chief Minister should not allow him to make derogatory remarks about women.