"அதே ஜூன் 12" .. பீலா ராஜேஷை போல் "மாற்றப்பட்ட" ஜெ ராதாகிருஷ்ணன் ஐஏஎஸ்!

Published: Monday, June 13, 2022, 13:23 [IST]

Subscribe to Oneindia Tamil

சென்னை: தமிழக சுகாதாரத் துறை செயலாளராக இருந்த பீலா ராஜேஷ் இடமாற்றம் செய்யப்பட்ட அதே ஜூன் 12 ஆம் தேதி தற்போதைய சுகாதாரத் துறை அமைச்சர் ஜெ ராதாகிருஷ்ணன் இடமாற்றம் செய்யப்பட்டார்.

மத்தியிலும் சரி மாநிலத்திலும் சரி ஒரு ஆட்சிக்கு நற்பெயர் ஏற்பட காரணம் அதன் நிர்வாகத் திறன் ஆகும். அந்த நிர்வாகத்தை திறம்பட செய்து வருபவர்கள் ஐஏஎஸ் அதிகாரிகள்.

அரசுக்கு பல்வேறு ஆலோசனைகளை வழங்குவது இந்த ஐஏஎஸ் அதிகாரிகள்தான். ஒவ்வொரு முறையும் ஆட்சி மாற்றத்தின் போது தங்களுக்கு சரிபட்டு வரும் அதிகாரிகளை மாற்றுவது இயல்பான ஒன்றுதான்.

குற்றச்சாட்டுகள்

அது மட்டுமல்லாமல் ஏதேனும் குற்றச்சாட்டுகள் எழுந்தாலும் இடமாற்றம் செய்யப்படுவர். அந்த வகையில் முதல்வர் ஸ்டாலினின் குட் வில் புக்கில் இடம் பெற்றுள்ள சுகாதாரத் துறை செயலாளராக இருந்த ஜெ ராதாகிருஷ்ணன் தற்போது இடமாற்றம் செய்யப்பட்டுள்ளார்.

கொரோனா

கொரோனாவை மிகவும் சிறப்பாக கையாண்ட ஜெ ராதாகிருஷ்ணன் மாற்றியமைக்கப்பட்டதற்கு காரணம் என்ன என்ற கேள்வி எழுந்துள்ளது. இதற்கான காரணத்தை அலசுவதற்குள் இன்னொரு தகவலும் கிடைத்துள்ளது. அதாவது கடந்த 2019ஆம் ஆண்டு சுகாதாரத் துறை செயலாளராக இருந்த பீலா ராஜேஷ் இடமாற்றம் செய்யப்பட்டது ஜூன் 12 ஆம் தேதி தானாம்.

பீலா ராஜேஷ்

அந்த ஜூன் 12, 2019 ஆம் ஆண்டு பீலாவுக்கு பதிலாக ஜெ ராதாகிருஷ்ணன் நியமிக்கப்பட்டார். அன்று முதல் இவர் கொரோனா பாதிப்புகளை சிறப்பாக கையாண்டு வருகிறார். 2ஆவது அலை உச்சத்தில் இருந்த போது திமுக ஆட்சிக்கு வந்தது. அப்போது தமிழகம் முழுவதும் சூறாவளி போல் இயங்கிய ஜெ ராதாகிருஷ்ணன் ஆட்சிக்கும் பெருமை சேர்த்தார்.

3ஆவது அலை

அது போல் 3 ஆவது அலை நம் கிட்டயே நெருங்கவிடாமல் பார்த்துக் கொண்டவரும் அவரேதான். கொரோனா பாதிப்பு 3ஆவது அலையில் அங்கொன்றும் இங்கொன்றுமாக இருந்திருக்கலாம். ஆனால் பெரிய அளவில் பாதிப்பு வராமல் தடுத்தது சுகாதாரத் துறைக்கு பங்கிருக்கிறது.

ஹாட்ஸ்பாட்

அது போல் ஐஐடி, அண்ணா பல்கலைக்கழகம், சென்னை விஐடி என கொரோனா ஹாட்ஸ்பாட் இடங்களிலும் அவர் கொரோனா பாதிப்பை திறமையாக கையாண்டார். இந்த நிலையில்தான் நேற்றைய தினம் ஜூன் 12 ஆம் தேதி அவர் சுகாதாரத் துறை செயலாளர் பதவியிலிருந்து வேறு ஒரு பதவிக்கு மாற்றப்பட்டார். அதாவது 3 ஆண்டுகளுக்கு முன்பு எந்த நாளில் பொறுப்பேற்றாரோ அதே நாளில் இடமாற்றப்பட்டார் ஜெ ராதாகிருஷ்ணன்.

Published On June 13, 2022