காமராஜர் பெயரில் ரூ.1,000 கோடியில் சூப்பர் திட்டம்! சட்டசபையில் அறிவித்த நிதியமைச்சர் பி.டி.ஆர்.!

Updated: Thursday, March 24, 2022, 18:25 [IST]

Subscribe to Oneindia Tamil

சென்னை: காமராஜர் பெயரில் ரூ.1,000 கோடியில் கல்லூரி மேம்பாடு திட்டம் செயல்படுத்தப்படும் என அறிவித்துள்ளார் நிதியமைச்சர் பழனிவேல் தியாகராஜன்.

தமிழக பட்ஜெட்

தமிழக பட்ஜெட் கூட்டத் தொடர் கடந்த வெள்ளிக்கிழமை தொடங்கி இன்று நண்பகல் வரை 6 நாட்கள் நடைபெற்றது. பட்ஜெட் மீதான பதிலுரையின் போது நிதியமைச்சர் பழனிவேல் தியாகராஜன் புதிய அறிவிப்புகள் சிலவற்றையும் வெளியிட்டார். அதன்படி காமராஜர் பெயரில் ரூ.1,000 கோடியில் கல்லூரி மேம்பாடு திட்டம் செயல்படுத்தப்படும் என்றும் கல்லூரி கட்டிடங்கள் அதிகளவில் கட்டப்பட்டு உட்கட்டமைப்பு மேம்படுத்தப்படும் எனவும் தெரிவித்தார்.

பொருளாதார அறிஞர்கள்

இதேபோல் தமிழக அரசுக்கு ஆலோசனை நல்கி வரும் பொருளாதார அறிஞர்கள் அடங்கிய குழு ஒரு ரூபாய் கூட கட்டணம் வாங்காமல் தமிழக அரசுடன் இணைந்து பணியாற்றி வருவதாகவும் தங்குவதற்கும், வாகன எரிபொருள் செலவுக்கும் அரசு சார்பில் அளிக்கப்பட்ட தொகையை கூட அவர்கள் ஏற்றுக்கொள்ளவில்லை எனவும் நிதியமைச்சர் பழனிவேல் தியாகராஜன் தெரிவித்தார். ஆனால் அதற்குள் பொருளாதார அறிஞர்கள் குழுவுக்கு அரசு செய்த செலவுத் தொகை எவ்வளவு என எதிர்க்கட்சித் தலைவர் கேட்பதாக வேதனை தெரிவித்தார்.

ஒற்றைச் சாளரம்

மேலும் நிதித்துறையில் ஒற்றைச் சாளர முறையில் அனுமதி வழங்குவதற்கான சீர்த்திருத்தம் கொண்டுவரப்படும் எனவும் நிதியமைச்சர் அறிவித்துள்ளார். தமிழகத்தை பொறுத்தவரை மற்ற மாநிலங்களுடன் மட்டும் ஒப்பிடாமல் தெற்காசிய நாடுகளுடன் ஒப்பிடுகையில் முன் மாதிரியான மாநிலமாக திகழ வேண்டும் என்பதை இலக்காக கொண்டு முதல்வர் செயலாற்றி வருவதாக நிதி அமைச்சர் பழனிவேல் தியாகராஜன் கூறியுள்ளார்.

முக்கிய அறிவிப்பு

நிதியமைச்சரின் இன்றைய அறிவிப்புகளில் காமராஜர் பெயரில் ரூ.1,000 கோடியில் கல்லூரி மேம்பாடு திட்டம் செயல்படுத்தப்படும் என்பது மிகுந்த முக்கியத்துவம் வாய்ந்த ஒன்றாக கருதப்படுகிறது. ஏற்கனவே பள்ளிக்கல்விக்கு பேராசிரியர் அன்பழகன் பெயரில் ஒரு மெகா திட்டத்தை அறிவித்துள்ள நிலையில், இன்று உயர்கல்விக்கு காமராஜர் பெயரில் புதிய திட்டம் அறிவிக்கப்பட்டிருப்பது குறிப்பிடத்தக்கது.