ஹெச் ராஜாவின் கந்தன் மலை ட்ரெய்லர்.. இமானுவேல் சேகரன், உடுமலை, திராவிட மாடல்.. பாருங்க

சென்னை: தமிழக பாஜகவில் மூத்த தலைவர்களில் ஒருவரான ஹெச் ராஜா, சினிமாவில் களம் இறங்கி உள்ளார். அவர் கந்தன் மலை என்ற படத்தில் தர்ம போராளியாக நடித்துள்ளார். வீரமுருகன் என்பவர் இயக்கியுள்ள இப்படத்தின் ட்ரெய்லர் நேற்று இரவு வெளியாகியது. இந்த டிரைலரில் இமானுவேல் சேகரன், உடுமலை, திராவிட மாடல், திருப்பரங்குன்றம் மலை, கோவில் போன்ற விஷயங்கள் இடம் பெற்றுள்ளன. இதில் சில விஷயங்கள் சர்ச்சையை தொட்டு செல்கிறது.

தமிழக பாஜகவில் மூத்த தலைவர்களில் ஒருவரான ஹெச் ராஜா. பாஜகவின் தேசிய செயற்குழு உறுப்பினராக இருக்கிறார். இவர் கோயில்கள், கடவுள் நம்பிக்கை போன்ற விஷயங்களில் தீவிர ஈடுபாடு உடையவர். அதேநேரம் திமுகவை ஆரம்ப காலம் முதலே கடுமையாக விமர்சித்து வருகிறார். அண்மையில் திருப்பரங்குன்றம் விவகாரம் சர்ச்சையாக மாறியது. இந்த சூழலில் சினிமா துறையிலும் களம் இறங்கி, ஒரு படத்தில் நடித்துள்ளார். 'கந்தன்மலை' என்ற பெயரில் வீர முருகன் என்பவர் இயக்கி உள்ளார். சிவ பிரபாகரன் - சந்திரசேகர் ஆகியோர் படத்தை தயாரித்துள்ளனர்.

இந்தப் படத்தின் பர்ஸ்ட் லுக் போஸ்டர் கடந்த ஆகஸ்ட் மாதம் வெளியானது. அப்போது எச்.ராஜா முறுக்கு மீசையுடன் கழுத்தில் ருத்ராட்ச மாலை, கையில் ருத்ராட்ச மாலை அணிந்தபடி நிற்கும் காட்சி இடம் பெற்று இருந்தது. கந்தன் மலை' என்பது கடவுள் முருகனின் கோவில் இருக்கும் திருப்பரங்குன்றத்தை குறிக்கும். இதனைஅடிப்படையாக வைத்தே படம் எடுக்கப்பட்டிருப்பதாக தெரிகிறது.

கந்தன் மலை படத்தின் ட்ரெய்லரை பொறுத்தவரை முதல் காட்சியிலேயே இமானுவேல் சேகரனை கொன்றது முத்துராமலிங்கத்தேவரா என்று கேட்பதுடன், அவர் மீதே நாங்கள் எப்ஐஆர் போடவில்லையா என்று ஒரு காவலர் கேட்பதாக இருக்கிறது. அடுத்ததாக ஹெச் ராஜா கருப்பு உடையில், ருத்ராட்ச மாலை அணிந்தபடி ஜீப்பில் வருவதாக இருக்கிறது. அதேபோல் ஒரு காட்சியில் கிறிஸ்தவர்கள் கையில் தேவாலயங்களும், இஸ்லாமியர்கள் கையில் மசூதிக்களும் உள்ள நிலையில்,இந்துக்கள் கையில் ஏன் கோயில்கள் இல்லை என்று கேள்வி எழுப்புகிறார்.

சாதிய மோதல்களுக்கு திராவிட மாடல் காரணம் என்று குற்றம்சாட்டியும் சில காட்சிகள் வைக்கப்பட்டிருப்பது ட்ரெய்லர் இருக்கிறது. அதேபோல் உடுமலைப்பேட்டை ஆணவ கொலை விவகாரத்தில் அந்த பெண்ணுக்கு நடந்த திருமணம் பற்றியும் இந்த ட்ரெய்லரில் பேசப்படுகிறது. மண், பெண், மலையை காப்போம் என்பதாக கந்தன் மலை ட்ரெய்லர் இருக்கிறது. இந்த ட்ரெய்லருக்கு திமுகவினர் கடும் எதிர்ப்பு தெரிவித்துள்ளனர். இதனிடையே கந்தன் மலை திரைப்படம் வரும் டிசம்பர் 19ம் தேதி தாமரை டிவியில் வெளியிடப்படும் என்று அறிவிக்கப்பட்டுள்ளது.

English summary

H Raja, one of the senior leaders of the Tamil Nadu BJP, has entered the film industry. He has played the role of a dharma fighter in the film Kandan Malai. The trailer of the film, directed by Veeramurugan, was released last night. The trailer features Emmanuel Sekaran, Udumalai, Dravida Model, Thiruparankundram Malai, and a temple.