செங்கோட்டையன் பாக்கெட்டை பார்த்தீங்களா? "ஜெயலலிதா அவுட்! விஜய் IN"! வேலூரில் நடந்த திடீர் மாற்றம்!
சென்னை: முன்னாள் அதிமுக அமைச்சரும் தவெக நிர்வாகியுமான கே.ஏ. செங்கோட்டையன் தனது சட்டைப் பாக்கெட்டில் நீண்ட காலமாக வைத்திருந்த ஜெயலலிதாவின் புகைப்படத்தை மாற்றியுள்ளார். அதற்கு பதிலாக தமிழக வெற்றிக் கழகம் (தவெக) தலைவர் விஜய்யின் புகைப்படத்தை வைத்திருப்பது தற்போது வைரலாகி அரசியல் வட்டாரத்தில் பரபரப்பை ஏற்படுத்தியுள்ளது.
செங்கோட்டையன் கடந்த நவம்பர் 2025-இல் அதிமுகவில் இருந்து நீக்கப்பட்ட பிறகு திமுகவில் இணைவார் என சொல்லப்பட்டது. ஆனால் திடீர் ட்விஸ்ட்டாக அவர் தவெகவில் இணைந்தார்.
தவெகவில் இணைய பனையூர் கட்சி அலுவலகம் சென்ற போதும் சட்டை பாக்கெட்டில் ஜெயலலிதாவின் புகைப்படத்துடன் சென்றார். அவர் தவெகவில் இணைந்த பிறகு செய்தியாளர்களை சந்தித்தார். அப்போது செய்தியாளர்கள், விஜய் கட்சியில் சேர்ந்து ஜெயலலிதா புகைப்படத்தை மாற்றாதது ஏன் என கேட்டனர்.
அதற்கு செங்கோட்டையன், "தவெக ஒரு ஜனநாயக கட்சி! இங்கு ஜெயலலிதாவின் புகைப்படத்தை எடுங்கள் என விஜய் சொல்லவில்லை. ஒரு வேளை நான் புகைப்படத்தை மாற்றியிருந்தால், இத்தனை நாள் அதிமுகவில் இருந்து விட்டு திடீரென ஜெயலலிதா போட்டோவை தூக்கி வீசிவிட்டார் என என்னை விமர்சனமும் செய்வார்கள்" என பதில் அளித்திருந்தார்.
இதனால் தவெகவில் இணைந்த சில மாதங்களுக்கு பிறகும் (கூட்டங்கள், நிகழ்ச்சிகளில்) அவர் ஜெயலலிதா புகைப்படத்தையே பாக்கெட்டில் வைத்திருந்தார். "அது என் தனிப்பட்ட மரியாதை, கட்சி மாறினாலும் மனம் மாறவில்லை" என்று அவர் அப்போது விளக்கமும் அளித்திருந்தார்.
ஆனால், இன்று வேலூர் மாவட்டத்தில் நடைபெற்ற தவெக நிர்வாகிகள் சந்திப்பு கூட்டத்தில் கலந்து கொண்டபோது, முதல் முறையாக அவரது சட்டைப் பாக்கெட்டில் விஜய் புகைப்படம் தெரிந்துள்ளது. சில புகைப்படங்களில்:
ஒரு பக்கத்தில் எம்.ஜி.ஆர் + ஜெயலலிதா படங்கள்
மறுபக்கத்தில் விஜய் படம் என இருப்பதாக தெரிகிறது.
இந்த மாற்றத்தை அரசியல் வட்டாரங்கள் "ஜெ OUT - விஜய் IN" என்று விவரிக்கின்றன. தவெகவினர் இதை வரவேற்றாலும், அதிமுகவினரிடம் இருந்து "கட்சி மாறியது மட்டுமல்ல, மனமும் மாறியது" என்ற விமர்சனங்கள் எழுந்துள்ளன.
செங்கோட்டையன் தவெகவில் முக்கிய பொறுப்பு (உயர்மட்ட நிர்வாகக் குழு ஒருங்கிணைப்பாளர்) வகித்து வரும் நிலையில், இந்த புகைப்பட மாற்றம் அவரது முழு அர்ப்பணிப்பை காட்டுவதாக கட்சி வட்டாரங்கள் கருதுகின்றன. இது தமிழக அரசியலில் விவாதத்துக்குள்ளாகியுள்ளது.
அது போல் அவரது வலது கையில் அதிமுக கொடி பச்சை குத்தப்பட்டுள்ளது குறிப்பிடத்தக்கது.
Click it and Unblock the Notifications
Sign in with Google