தூது விட்ட ஓ.பன்னீர்செல்வம்! கதவை அடைத்த கே.பி.முனுசாமி! நிம்மதி பெருமூச்சு விட்ட எடப்பாடி பழனிசாமி
சென்னை: அதிமுக துணை ஒருங்கிணைப்பாளர் கே.பி.முனுசாமிக்கு ஓ.பன்னீர்செல்வம் தூது அனுப்பிய நிலையில் அதனை ஏற்க மறுத்து கதவை அடைத்திருக்கிறார் அவர்.
இதனால் எங்கே மீண்டும் கே.பி.எம். அணி தாவிவிடுவாரோ என்ற பதற்றத்தில் இருந்த எடப்பாடி பழனிசாமி நிம்மதி பெருமூச்சு விட்டிருக்கிறார்.
இருப்பினும் எடப்பாடி பழனிசாமி மீது கே.பி.முனுசாமி சற்று அதிருப்தியில் தான் இருக்கிறார் என்பதால் ஓ.பன்னீர்செல்வம் தரப்பு தங்கள் முயற்சிகளை கைவிடுவதாக இல்லையாம்.
அதிமுக உட்கட்சி
அதிமுக மூத்த நிர்வாகியும், சட்டமன்ற உறுப்பினருமான கே.பி.முனுசாமி கடந்த 2 வாரங்களுக்கு மேல் எடப்பாடி பழனிசாமியை சந்திக்க வரவில்லை எனத் தெரிவிக்கப்படுகிறது. சி.வி.சண்முகத்துக்கு எடப்பாடி பழனிசாமி அதிக முக்கியத்துவம் கொடுப்பதும், அவரை டெல்லிக்கு அழைத்துச் சென்றதும் கே.பி.முனுசாமிக்கு சற்று வருத்தத்தை கொடுத்ததாக கூறப்படுகிறது. கடந்த அதிமுக பொதுக்குழுவின் போது மேடையிலேயே கே.பி.முனுசாமி -சி.வி.சண்முகமும் இடையே ஈகோ யுத்தம் வெடித்தது.
ஓ.பன்னீர்செல்வம் தரப்பு
இதனிடையே அண்மையில் நடைபெற்ற அதிமுக மாவட்டச் செயலாளர்கள் கூட்டத்திலும் கே.பி.முனுசாமி தலைகாட்டவில்லை. இதனால் பதற்றம் அடைந்த எடப்பாடி பழனிசாமி, கே.பி.முனுசாமியை தொடர்பு கொண்டு பேசி சமாதானம் செய்திருக்கிறார். எடப்பாடி பழனிசாமி மீது கே.பி.முனுசாமி மன வருத்தத்தில் இருப்பதை அறிந்துக்கொண்ட ஓ.பன்னீர்செல்வம் தரப்பு முக்கிய பிரமுகர் ஒருவர் மூலம் தூதுவிட்டு பார்த்திருக்கிறது.
கே.பி.முனுசாமி
ஆனால் கே.பி.முனுசாமி அந்த அழைப்பை ஏற்க மறுத்ததோடு கதவையும் அடைத்திருக்கிறார். இதனால் எங்கே மீண்டும் கே.பி.எம். அணி தாவிவிடுவாரோ என்ற பதற்றத்தில் இருந்த எடப்பாடி பழனிசாமி நிம்மதி பெருமூச்சு விட்டிருக்கிறார். இருப்பினும் கே.பி.முனுசாமியை தங்கள் பக்கம் இழுப்பதற்கான காரியத்தை ஓபிஎஸ் டீம் தொடர்ந்து செய்து வருகிறது. இதனிடையே கட்சியின் முக்கிய நிர்வாகிகள் சிலர் கே.பி.முனுசாமியிடம் பேசிய போது வைரஸ் காய்ச்சல் காரணமாக தான் கூட்டத்துக்கு வர முடியவில்லையே தவிர வேறு காரணமில்லை என விளக்கம் அளித்திருக்கிறார்.
சட்டசபை கூட்டம்
2 வாரங்களுக்கும் மேலாக தொடர்ந்து கிருஷ்ணகிரி மாவட்டத்தில் உள்ள தனது சொந்த ஊரிலேயே முகாமிட்டுள்ள கே.பி.முனுசாமி, வரும் சட்டமன்றக் கூட்டத் தொடரில் பங்கேற்கவாவது சென்னை வருவாரா என எதிர்பார்க்கப்படுகிறது.
Click it and Unblock the Notifications
Sign in with Google