மகளிர் உரிமைத் தொகை.. இதை பண்ணுங்க.. 'ஸ்மார்ட்' இல்லத்தரசிகளுக்கு ஒரு லட்சாதிபதி வாய்ப்பு!
சென்னை: தமிழக அரசியல் களம் இப்போது தேர்தல் ஜூரத்தில் தகிக்கிறது. வாக்குறுதிகள் அனல் பறக்கின்றன. குறிப்பாக, இல்லத்தரசிகளை குறிவைத்து அரசியல் கட்சிகள் வீசியுள்ள 'உரிமைத் தொகை' அஸ்திரம் தான் இப்போதைய டாக் ஆஃப் தி டவுன்.
ஆளும் திமுக அரசு தற்போது வழங்கி வரும் ரூ.1000-த்தை ரூ.2000-ஆக உயர்த்துவதாக அறிவித்துள்ளது. எதிர்க்கட்சியான அதிமுக, 'குல விளக்கு' திட்டத்தின் கீழ் பெண்களுக்கு ரூ.2000 வழங்குவோம் என முழங்குகிறது. ஒரு படி மேலே போய், தமிழக வெற்றிக் கழகத் தலைவர் விஜய், "நாங்கள் ஆட்சிக்கு வந்தால் ரூ.2500 நிச்சயம்" என 'மாஸ்' என்ட்ரி கொடுத்துள்ளார்.
யார் ஜெயித்தாலும், பெண்களுக்கு மாதம் குறைந்தபட்சம் ரூ.2000 முதல் ரூ.2500 வரை கிடைக்கப்போவது உறுதி என்பது மட்டும் நிதர்சனம். "இந்தக் காசை வைத்துக்கொண்டு என்ன செய்வது?" என யோசிக்கும் பெண்களுக்கு, இதோ ஒரு சூப்பர் ஐடியா. இந்தக் காசை வீட்டுச் செலவுக்கே கரைக்காமல், கொஞ்சம் 'ஸ்மார்ட்டாக' முதலீடு செய்தால், நீங்களும் ஒரு லட்சாதிபதி ஆகலாம்!
தபால் நிலைய RD: பாதுகாப்பான பயணம்!
அரசாங்கப் பணம், அரசாங்கத் திட்டத்திலேயே இருக்கட்டும் என நினைப்பவர்களுக்கு தபால் நிலையத் தொடர் வைப்பு நிதி (Post Office RD) ஒரு வரப்பிரசாதம்.
முதலீடு: மாதம் ரூ.2,000.
காலம்: 5 ஆண்டுகள்.
வட்டி விகிதம்: தற்போது நடைமுறையில் உள்ள வட்டி விகிதங்களின்படி (தோராயமாக 6.7% - 7.5% வரை), நீங்கள் 5 ஆண்டுகளில் முதலீடு செய்யும் மொத்தத் தொகை ரூ.1,20,000.
முதிர்வுத் தொகை: வட்டியுடன் சேர்த்து உங்களுக்கு சுமார் ரூ.1,44,000 கையில் கிடைக்கும்.
ரிஸ்க் எடுக்கத் தயங்கும் பெண்களுக்கு இது ஒரு 'சேஃப்டி லாக்கர்' போன்றது. பிள்ளைகளின் படிப்பு செலவுக்கோ அல்லது திருமணத்துக்கோ இந்தத் தொகை ஒரு பெரிய ஊன்றுகோலாக இருக்கும்.
மியூச்சுவல் ஃபண்ட்: 'ரிஸ்க்' எடுத்தால் லட்சங்கள்!
கொஞ்சம் ரிஸ்க் எடுக்கத் தயார், ஆனால் கைநிறைய லாபம் வேண்டும் என்பவர்களுக்கு மியூச்சுவல் ஃபண்ட் (Mutual Funds) மற்றும் SIP (Systematic Investment Plan) சிறந்த வழி.
இந்தியப் பங்குச்சந்தை வளர்ந்து வரும் வேகத்தைப் பார்த்தால், மியூச்சுவல் ஃபண்டுகளில் ஆண்டுக்கு சராசரியாக 12% முதல் 13% வரை வட்டி கிடைக்க வாய்ப்புள்ளது.
"சிறு துளி பெரு வெள்ளம் என்பார்கள். மாதம் ரூ.2000 என்பது இன்று சிறியதாகத் தெரிந்தாலும், மியூச்சுவல் ஃபண்ட் கூட்டு வட்டி (Compounding) முறையில் அது விஸ்வரூபம் எடுக்கும்."
முதலீடு: மாதம் ரூ.2,000.
விகிதம்: 12% - 13% வட்டி என கணக்கிட்டால்.
முதிர்வுத் தொகை: 5 ஆண்டுகள் முடிவில் உங்கள் கைக்கு சுமார் ரூ.1,90,000 முதல் ரூ.2,00,000 வரை கிடைக்க வாய்ப்புள்ளது!
ஐந்து வருடம் கழித்து உங்கள் கையில் இரண்டு லட்சம் ரூபாய் இருந்தால், ஒரு சிறு தொழிலைத் தொடங்கவோ அல்லது பெரிய முதலீடுகளைச் செய்யவோ அது ஏதுவாக இருக்கும். நகை கூட வாங்கலாம்!
அரசியல் கட்சிகள் தரும் இந்தத் தொகை உங்களின் உழைப்புக்கும், அர்ப்பணிப்புக்கும் கிடைக்கும் ஒரு சிறு அங்கீகாரம். அதை வெறும் 'செலவு' என்று பார்க்காமல், உங்களின் எதிர்காலத்திற்கான 'முதலீடு' என்று பாருங்கள்.
இன்று நீங்கள் சேமிக்கும் இந்த 2000 ரூபாய், நாளை உங்களை ஒரு பொருளாதார சுதந்திரம் கொண்ட பெண்ணாக மாற்றும். தேர்தல் முடிவுகள் எப்படி வேண்டுமானாலும் இருக்கட்டும், ஆனால் உங்கள் முதலீடு உங்கள் கையில்!
Click it and Unblock the Notifications
Sign in with Google