நாடாளுமன்றத் தேர்தலில் பானைச் சின்னத்தில் விசிக போட்டி? உதயசூரியன் NO! உறுதி காட்டும் திருமாவளவன்!
சென்னை: வரும் 2024 நாடாளுமன்றத் தேர்தலில் விடுதலை சிறுத்தைகள் கட்சி பானைச் சின்னத்தில் போட்டியிட இப்போதே ஆயத்தமாகிவிட்டது.
2024 நாடாளுமன்றத் தேர்தலுக்கு இன்னும் 6 மாதங்கள் கூட முழுமையாக இல்லாததால் தேர்தலை எதிர்கொள்வதற்கான முன்னேற்பாடுகளில் சிறிய கட்சிகள் முதல் பெரிய கட்சிகள் வரை ஈடுபட்டுள்ளன. தமிழகத்தை பொறுத்தவரை திமுக, அதிமுக ஆகிய இரு பெரும் கட்சிகள் தரபிலும் கூட்டணி பேச்சுவார்த்தை, சீட் பங்கீடு உள்ளிட்ட விவகாரங்கள் அட்வான்ஸாக டிசம்பர் மாதமே இறுதி செய்யப்பட்டுவிடும் எனத் தெரிவிக்கப்படுகிறது.
அந்த வகையில் திமுக கூட்டணியில் அங்கம் வகிக்கும் விடுதலை சிறுத்தைகள் கட்சி இந்த முறை மூன்று தொகுதிகளை எதிர்பார்க்கிறது. கடந்த நாடாளுமன்றத் தேர்தலில் சிதம்பரம் மக்களவைத் தொகுதியில் திருமாவளவனும், விழுப்புரம் மக்களவைத் தொகுதியில் ரவிக்குமாரும் போட்டியிட்டு வெற்றிபெற்றார்கள். இதில் திருமாவளவன் மட்டும் பானைச் சின்னத்தில் போட்டியிட்டார். விசிகவின் மற்றொரு வேட்பாளரான ரவிக்குமார் உதயசூரியன் சின்னத்தில் போட்டியிட்டார்.
இந்நிலையில் வரும் தேர்தலில் கூடுதலாக திருவள்ளூர் தொகுதியை எதிர்பார்க்கும் திருமாவளவன், உதயசூரியன் சின்னத்தில் விசிக வேட்பாளர்களை போட்டியிட வைக்காமல் பானைச் சின்னத்திலேயே போட்டியிட வைக்க விரும்புகிறார். கடந்த 2021 சட்டமன்றத் தேர்தலின் போது பானைச் சின்னத்தில் போட்டியிட்டு 4 சட்டமன்ற உறுப்பினர்கள் விசிகவுக்கு கிடைத்திருக்கிறார்கள்.
விடுதலை சிறுத்தைகள் கட்சியை பொறுத்தவரை 2011 சட்டமன்றத் தேர்தல், 2014 நாடாளுமன்றத் தேர்தல், 2016 சட்டமன்றத் தேர்தல் என கடந்த கால தேர்தல்களில் மோதிரம் சின்னத்தில் போட்டியிட்டது. ஆனால் அந்த தேர்தல்களில் எல்லாம் விசிகவுக்கு தோல்வி மட்டுமே மிஞ்சியது. பானைச் சின்னத்தில் போட்டியிடத் தொடங்கிய பிறகு தான் வெற்றிக்காற்று விசிக பக்கம் வீசத் தொடங்கியது.
தேர்தல் ஆணையம் விசிகவுக்கு ஒதுக்கிய பானைச் சின்னம் ஓரளவு ஒர்க் அவுட் ஆகிவிட்டதால் அந்தச் சின்னத்தையே திருமாவளவன் தொடர்ந்து தக்க வைக்க விரும்புவதாக தெரிவிக்கப்படுகிறது. இதனிடையே விசிகவின் கூடுதல் தொகுதி எதிர்பார்ப்பு, தனிச்சின்னத்தில் போட்டி உள்ளிட்ட முடிவுக்கு திமுகவின் ரியாக்ஷன் இதற்கு என்னவாக இருக்கப் போகிறது என்பது பெரும் எதிர்பார்ப்பை ஏற்படுத்தியுள்ளது.
Click it and Unblock the Notifications
Sign in with Google