கருணாநிதி பிறந்த நாள்: தலைநிமிர்ந்து வருகிறேன்-வாழ்த்துகள் சொல்வீர்களா தலைவரே?மு.க.ஸ்டாலின் உருக்கம்

சென்னை: மறைந்த முன்னாள் முதல்வர் கருணாநிதியின் 98-வது பிறந்த நாளை முன்னிட்டு தமிழ்நாடு முதல்வர் மு.க.ஸ்டாலின் உருக்கமான வீடியோ ஒன்றை வெளியிட்டுள்ளார். அதில், உங்களுக்கு கொடுத்த வாக்குறுதியை நிறைவேற்றி தலைநிமிர்ந்து வருகிறேன்.. வாழ்த்துகள் ஸ்டாலின் என சொல்வீரா? என உருக்கமாக பேசியுள்ளார் முதல்வர் மு.க.ஸ்டாலின்.

மறைந்த முன்னாள் முதல்வர் கருணாநிதியின் 98-வது பிறந்த நாளை திமுகவினர் இன்று உலகம் முழுவதும் கொண்டாடி வருகின்றனர். இன்றைய நாளில் பல்வேறு நலத்திட்ட உதவிகள் வழங்குவதற்கும் திமுகவினர் ஏற்பாடு செய்துள்ளனர்.

கொரோனா நிவாரண நிதி 2-வது தவணை ரூ2,000 வழங்குதல் உள்ளிட்ட பல்வேறு திட்டங்களை இன்று முதல்வர் மு.க.ஸ்டாலின் தொடங்கி வைக்கிறார். கருணாநிதி பிறந்த நாளை முன்னிட்டு முதல்வர் மு.க.ஸ்டாலின் இன்று தமது சமூகவலைதளப் பக்கங்களில 'தலைநிமிர்ந்து வருகிறேன்' என்ற தலைப்பில் #KalaignarForever என்ற ஹேஷ்டேக்குடன் வெளியிட்டுள்ளார். அதில் முதல்வர் ஸ்டாலின் கூறியுள்ளதாவது:

திருவாரூரில் கருவாகி தமிழகத்தையே தனது ஊராக ஆக்கிய தலைவர்களுக்கு எல்லாம் தலைவர்; முதல்வர்களுக்கு எல்லாம் முதல்வர்; முத்தமிழறிஞர் கலைஞர் அவர்களே! இன்று நீங்கள் பிறந்த ஜூன் 3.

ஒரு தொண்டன், தலைவருக்கு கொடுத்த வாக்குறுதியை நிறைவேற்றி காட்ட வேண்டும் என்பதற்காக உழைத்தேன். இன்று கம்பீரமாக வருகிறேன்...

கொடுத்த வாக்குறுதியை நிறைவேற்றிவிட்டேன் என்று சொல்ல தலைநிமிர்ந்து வருகிறேன்... நான் ஏற்றுக் கொண்ட உறுதிமொழியை நிறைவேற்றி காட்டி விட்டேன் என்று சொல்ல நெஞ்சை நிமிர்த்தி வருகிறேன்... வாழ்த்துகள் ஸ்டாலின் என சொல்வீரா தலைவர் அவர்களே? இவ்வாறு அதில் முதல்வர் மு.க.ஸ்டாலின் தெரிவித்துள்ளார்.

English summary

Tamilnadu Chief Minister MK Stalin today releasd a video on Former CM Karunanidhi's 98th Birthday.