14 அமைச்சர்களிடம் நேருக்கு நேர் மோதல் இல்லை.. பாஜக, அமமுகவை கோர்த்துவிட்ட எடப்பாடி பழனிசாமி!

சென்னை: திமுக அமைச்சர்கள் 14 பேரை எதிர்த்து அதிமுக நேருக்கு நேர் போட்டியிடாமல், கூட்டணி கட்சிகளை எடப்பாடி பழனிசாமி கோர்த்துவிட்டுள்ளார். அதிமுக வேட்பாளர்களுக்கு பதிலாக பாஜகவை 6 தொகுதிகளிலும், அமமுகவை 3 தொகுதிகளிலும், தமாகாவை 3 தொகுதிகளிலும், பாமக மற்றும் ஐஜேகேவை தலா 1 தொகுதியிலும் எடப்பாடி பழனிசாமி மாட்டிவிட்டிருப்பதாக பார்க்கப்படுகிறது.

அதிமுக தலைமையிலான என்டிஏ கூட்டணியில் எந்தெந்த கட்சிகள் எந்த தொகுதியில் போட்டியிடுகின்றன என்ற அறிவிப்பை எடப்பாடி பழனிசாமி வெளியிட்டுள்ளார். அதிமுக தொடர்ச்சியாக தோல்வி அடையும் தொகுதிகளையும், திமுக அமைச்சர்களுடன் அதிமுக வேட்பாளர்கள் நேரடியாக மோதலை தடுக்கும் வகையில் எடப்பாடி பழனிசாமி கச்சிதமாக செயல்பட்டிருக்கிறார்.

அதிலும் திமுக அமைச்சர்கள் 14 பேருக்கு எதிர்த்து நேருக்கு நேர் போட்டியிடாமல் அந்த தொகுதிகளை கூட்டணி கட்சிகளுக்கு ஒதுக்கி இருக்கிறார். அதிலும் 6 அமைச்சர்களுக்கு எதிரான பாஜகவை கோர்த்துவிட்டுள்ளார் எடப்பாடி பழனிசாமி. அமைச்சர் எவ வேலுவின் திருவண்ணாமலை தொகுதி, அமைச்சர் பெரியகருப்பனின் திருப்பத்தூர் தொகுதி, அமைச்சர் மனோ தங்கராஜின் பத்மநாபபுரம் தொகுதி பாஜகவுக்கு ஒதுக்கப்பட்டுள்ளது.

அதேபோல் அமைச்சர் நாசரின் ஆவடி தொகுதி, அமைச்சர் அனிதா ராதாகிருஷ்ணனின் திருச்செந்தூர் தொகுதி, அமைச்சர் மதிவேந்தனின் ராசிபுரம் தொகுதி பாஜகவுக்கு ஒதுக்கப்பட்டுள்ளது. அதேபோல் திமுகவின் 3 அமைச்சர்களை எதிர்த்து அமமுகவை கோர்த்துவிட்டிருக்கிறார். அமைச்சர் கே.என்.நேருவின் திருச்சி மேற்கு தொகுதியை எடப்பாடி பழனிசாமி ஒதுக்கி இருக்கிறார்.

தொடர்ந்து அமைச்சர் டிஆர்பி ராஜாவின் மன்னார்குடி தொகுதியையும், அமைச்சர் மா.சுப்பிரமணியனின் சைதாப்பேட்டை தொகுதியையும் அமமுக பக்கம் எடப்பாடி பழனிசாமி தள்ளிவிட்டுள்ளார். அதேபோல் அமைச்சர் சக்கரபாணியின் ஒட்டன்சத்திரம் தொகுதி, அமைச்சர் முத்துசாமியின் ஈரோடு மேற்கு தொகுதி, அமைச்சர் காந்தியின் ராணிப்பேட்டை தொகுதி தமாகாவுக்கு ஒதுக்கப்பட்டுள்ளது.

அதேபோல் அமைச்சர் ராஜேந்திரனின் சேலம் வடக்கு தொகுதி பாமகவுக்கும் மற்றும் அமைச்சர் சிவசங்கரின் குன்னம் தொகுதி ஐஜேகேவுக்கு ஒதுக்கப்பட்டுள்ளது. இதனால் கூட்டணி கட்சி நிர்வாகிகளும், வேட்பாளர்களும் புலம்ப தொடங்கி இருக்கின்றனர். இதனால் அதிமுக வேட்பாளர்கள் பலரும் நிம்மதி அடைந்திருக்கின்றனர்.

English summary

TN Election Exclusive: Instead of fielding AIADMK candidates to contest directly against 14 DMK ministers, Edappadi Palaniswami has strategically deployed his alliance partners. It is perceived that, in place of AIADMK nominees, Edappadi Palaniswami has positioned the BJP to contest in six constituencies, the AMMK in three, the TMC in three, and the PMK and IJK in one constituency each.