விஜய் இதுவரை பத்திரிகையாளர்களை சந்தித்தது உண்டா? உதயநிதி ஸ்டாலின் பதிலடி!
சென்னை: திமுகவை தீயசக்தி என்று தவெக தலைவர் விஜய் விமர்சித்திருந்த நிலையில், துணை முதல்வர் உதயநிதி ஸ்டாலின் பதிலடி கொடுத்துள்ளார். சென்னை விமான நிலையத்தில் பத்திரிகையாளர்களை சந்தித்த உதயநிதி ஸ்டாலின், விஜய் பத்திரிகையாளர்களை சந்தித்தது உண்டா? அவரை பேசவிட்டு பாருங்கள்.. அப்போது தெரியும் என்று தெரிவித்துள்ளார்.
ஈரோடு மாவட்டத்தில் நடந்த தவெக பொதுக்கூட்டத்தில் தவெக தலைவர் விஜய் பேசுகையில், எம்ஜிஆரும், ஜெயலலிதாவும் ஒரே வார்த்தையில் பேசி திமுகவை காலி செய்தார்கள். ஏன் இப்படி கடுமையாக பேசுகிறார்கள் என அப்போது நினைத்தேன். இப்போது அவங்க சொன்னதை தான் நானும் சொல்கிறேன்.. திமுக ஒரு தீய சக்தி.. திமுக ஒரு தீய சக்தி.. திமுக ஒரு தீய சக்தி.
ஈரோடு மக்களே.. திமுக ஒரு தீய சக்தி.. தவெக ஒரு தூய சக்தி.. இந்த முறை தீய சக்தி திமுகவுக்கும், தூய சக்தி தவெகவுக்கும் இடையில்தான் போட்டி. அதேபோல் எதிரிகள் யார் என்று கூறிவிட்டு நாங்கள் களத்துக்கு வந்துள்ளோம். நாங்கள் கூறியுள்ள எதிரிகளை மட்டும் தான் எதிர்ப்போம். களத்துல இருக்கிறவங்களை மட்டும் தான் நாங்கள் எதிர்ப்போம். களத்தில் இல்லாதவர்களையும் எதிர்க்கும் ஐடியா இல்லை என்று தெரிவித்தார்.
திமுகவை விஜய் தீய சக்தி என்று ஆவேசமாக விமர்சித்திருப்பது பேசுபொருளாகி இருக்கிறது. அதேபோல் சுமார் 30 நிமிடங்களுக்கும் அதிகமான விஜய் பேசி இருப்பதால், வேகமாக முன்னேறி வருவதாக பார்க்கப்படுகிறது. அதேபோல் களத்தில் அதிமுகவின் இடத்தை பிடிக்க திமுக vs தவெக என்ற சூழலை விஜய் உருவாக்கி வருவதாகவும் அரசியல் விமர்சகர்கள் கூறுகின்றனர்.
இந்த நிலையில் சென்னை விமான நிலையத்தில் துணை முதல்வர் உதயநிதி ஸ்டாலின் செய்தியாளர்களை சந்தித்த போது, திமுக இளைஞரணியின் அடுத்த மண்டல மாநாடு எப்போது நடத்தப்படும் என்பதை கட்சித் தலைவர் முடிவு எடுப்பார் என்று தெரிவித்தார். தொடர்ந்து விஜய்யின் தீயசக்தி விமர்சனம் குறித்து கேள்வி எழுப்பப்பட்டது. அதற்கு உதயநிதி ஸ்டாலின், என்றாவது விஜய்யிடம் இப்படி கேள்வி கேட்டிருக்கிறீர்களா?
அவரை பேசவிட்டு பாருங்கள்.. அப்போது தெரியும் என்று தெரிவித்துள்ளார். தவெக என்ற அரசியல் கட்சியை தொடங்கியதில் இருந்து விஜய் இதுவரை ஒருமுறை கூட பத்திரிகையாளர்களை சந்திக்கவில்லை. இதனால் விஜய்யை சீண்டும் வகையில் உதயநிதி ஸ்டாலின் கேள்வி எழுப்பி இருப்பதாக பார்க்கப்படுகிறது. இதற்கு தவெக தலைவர் விஜய் என்ன பதில் அளிப்பார் என்ற எதிர்பார்ப்பும் அதிகரித்துள்ளது.
Click it and Unblock the Notifications
Sign in with Google