நானும் ஒரு தாய்தான்.. நெடும்பாசேரி விபத்தில் குற்றம் சாட்டப்பட்டவரின் அம்மா உருக்கமான வீடியோ
கோவை: நெடும்பாசேரியில் மது போதையில் அதிவேகமாக வந்த வாகனம் மோதிய கோர விபத்தில் மூன்று பேர் உயிரிழந்த சம்பவம் கேரள மக்களிடையே பெரும் அதிர்ச்சியை ஏற்படுத்தியது. இந்தச் சம்பவம் தொடர்பாக 19 வயதான சுஹைலை போலீசார் கைது செய்தனர். அந்த இளைஞனின் பெற்றோரை இணையதளங்களில் பொதுமக்கள் கடுமையாக விமர்சித்து வருகிறார்கள். இந்த சூழலில் "3 குழந்தைகளின் இழப்பால் ஏற்படும் அதே வேதனை, என் மகனை நினைத்துப் பார்க்கும்போதும் எனக்கு இருக்கிறது" என்று நெடும்பாசேரி விபத்தில் குற்றம் சாட்டப்பட்டவரின் தாய் உருக்கமான வீடியோ வெளியிட்டுள்ளார்.
கேரளா மாநிலம் நெடும்பாசேரியில் மது போதையில் அதிவேகமாக வந்த வாகனம் மோதிய கோர விபத்தில் மூன்று பேர் உயிரிழந்த சம்பவம் அம்மாநில மக்களிடையே பெரும் அதிர்ச்சியை ஏற்படுத்தியது. இந்தச் சம்பவம் தொடர்பாக 19 வயதான சுஹைலை போலீசார் கைது செய்தனர். இந்நிலையில், தனது மகன் கைது செய்யப்பட்டது மற்றும் அவரை பற்றிய விமர்சனங்கள் தொடர்பாக சுஹைலின் தாயார் நூஹ் சமூக வலைதளத்தில் வீடியோ ஒன்றின் மூலம் தனது வேதனையை வெளிப்படுத்தியுள்ளார்.
அதில் அவர் கூறுகையில், "உங்களிடம் சில விஷயங்களைப் பகிர்ந்துகொள்ளவே இந்த வீடியோவைப் பதிவு செய்கிறேன். முன்பு கேமரா முன் எப்போதும் தயக்கமின்றிப் பேசுபவளாக இருந்தேன். ஆனால், கடந்த சில நாட்களுக்கு முன்பு நடந்த சம்பவத்திற்குப் பிறகு, ஒரு தாயாகவும் ஒரு பெண்ணாகவும் சில விஷயங்களைச் சொல்ல வேண்டிய நிலையில் இருக்கிறேன்.
நாம் இழந்திருப்பது விலைமதிப்பற்ற மூன்று குழந்தைகளின் உயிர்கள். அந்தக் குழந்தைகளின் குடும்பத்தினர் அனுபவிக்கும் துயரம் எனக்குப் புரிகிறது. குழந்தைகளை நெஞ்சோடு அணைத்துக்கொண்டு, ஏராளமான கனவுகளுடன் வாழ்க்கையை முன்னெடுத்துச் செல்லும்போது, திடீரென ஒருநாள் அவர்களை இழப்பது எவ்வளவு கொடுமையானது என்பதை என்னால் உணர முடிகிறது.
ஒரு குழந்தையை இழக்கும்போது பெற்றோர் அனுபவிக்கும் வேதனையை நான் முழுமையாகப் புரிந்துகொள்கிறேன். என்னுடைய வார்த்தைகளால் அவர்களின் துயரத்தைக் குறைக்க முடியாது என்பதும் எனக்குத் தெரியும். இருந்தாலும், அந்தக் குடும்பத்தினருக்கும் உயிரிழந்த குழந்தைகளுக்கும் எனது ஆழ்ந்த இரங்கலைத் தெரிவித்துக்கொள்கிறேன்.
இந்த விபத்து தொடர்பான விசாரணைகள் சட்டப்படி நடைபெறட்டும். உண்மைகள் அனைத்தும் நேர்மையாக வெளிவர வேண்டும் என்பதுதான் எனது விருப்பம். இந்த விவகாரம் சமூக வலைதளங்களில் பெரிதாகப் பேசப்படுவதையும், பலருக்கும் எங்கள் மீது கோபமும் வெறுப்பும் இருப்பதையும் நான் அறிவேன்.
இருந்தாலும், இந்தக் கடினமான சூழலில் எனக்கும் எனது குடும்பத்தினருக்கும் கொஞ்சம் தனிப்பட்ட இடத்தையும் தனிமையையும் வழங்குமாறு கேட்டுக்கொள்கிறேன். நாங்களும் நான்கு பேர் கொண்ட ஒரு சாதாரண குடும்பம்தான். ஆதாரமற்ற செய்திகள் பரப்பப்படும்போது, நாங்களும் மனிதர்கள்தான் என்பதையும், நானும் ஒரு தாய்தான் என்பதையும் தயவுசெய்து நினைத்துப் பாருங்கள்.
ஒருபுறம், எனது குழந்தையின் எதிர்காலம் குறித்த கவலை இருக்கிறது. அதே நேரத்தில், உயிரிழந்த மூன்று குழந்தைகளை நினைத்தும் மிகுந்த வேதனை அடைகிறேன். இந்த இரண்டு ஆழமான துயரங்களுக்கு இடையில் என்ன சொல்வது, என்ன செய்வது என்று தெரியாமல் தவித்துக்கொண்டிருக்கிறேன்.
கடந்த சில நாட்களாக எழுந்து உட்காரக்கூட முடியாத அளவுக்குக் கடினமான மனநிலையிலும் வேதனையிலும் இருக்கிறேன்.
நாங்கள் உயிருடன் இருக்கும் வரை, அந்தக் குடும்பத்தினருக்கு எங்களுடைய ஆதரவும் அனுதாபமும் இருக்கும். யாருடைய துயரத்தையும் குறைத்து மதிப்பிடவோ, இந்தச் சம்பவத்தை நியாயப்படுத்தவோ நான் இதைக் கூறவில்லை. நாங்கள் முற்றிலும் செய்வதறியாது தவித்துக்கொண்டிருக்கிறோம்.
எங்களைப் பற்றிய செய்திகள் வெளியிடப்படும்போதும் பரப்பப்படும்போதும், நாங்களும் சாதாரண மனிதர்கள்தான் என்பதையும், நானும் ஒரு சாதாரண தாய்தான் என்பதையும் அனைவரும் நினைவில் வைத்துக்கொள்ள வேண்டும்." இவ்வாறு கூறியுள்ளார்.
Click it and Unblock the Notifications
Sign in with Google
