கர்நாடக சட்டசபை தேர்தல்! குமாரசாமிக்காக கோவையில் தயாராகும் பிரச்சார வேன்! குவியும் ஆர்டர்கள்!

கோவை: கர்நாடக சட்டசபை தேர்தல் நெருங்கும் நிலையில், மதச்சார்பற்ற ஜனதா தளம் கட்சித் தலைவர் குமாரசாமிக்காக கோவையில் பிரத்யேக பிரச்சார வேன் தயாரிக்கப்பட்டு வருகிறது.

பிரச்சாரத்தின் போது எந்த அயர்வும், இடையூறும் ஏற்படாத வகையில் அனைத்து சவுகர்யங்களுடன் கூடிய பிரச்சார வாகனம் தயாரிக்கப்பட்டு வருகிறது.

கோவையை பொறுத்தவரை கோயாஸ், ஜீப் கிளினிக் என பல நிறுவனங்கள் வாகன உட்கட்டமைப்பை மேம்படுத்தி தருகின்றன.

கர்நாடக தேர்தல்

கர்நாடக சட்டசபை தேர்தல் 2023ஆம் ஆண்டு ஏப்ரல் அல்லது மே மாதத்தில் நடைபெறக் கூடும் என்பதால் இப்போதே அதற்கான ஆயத்தப் பணிகளை அரசியல் கட்சிகள் கவனிக்கத் தொடங்கிவிட்டன. காங்கிரஸ் கட்சிக்கு வலு சேர்க்கும் விதமாக கர்நாடகாவில் ராகுல் ஒரு பக்கம் நடைபயணம் மேற்கொண்டு வருகிறார். பாஜக மேல் மட்டத்தலைவர்கள் ஆலோசனைக் கூட்டங்களில் பங்கேற்பதற்காக தொடர்ந்து கர்நாடகாவுக்கு படையெடுத்த வண்ணம் உள்ளனர். இவர்களை எல்லாம் விட ஒரு படி மேலாக மதச்சார்பற்ற ஜனதா தளம் தலைவர் குமாரசாமி பிரச்சார களத்துக்கே தயாராகிவிட்டார்.

பிரச்சார வாகனங்கள்

இதனிடையே குமாரசாமிக்காக கோவையில் பிரத்யேக முறையில் பிரச்சார வாகனங்கள் தயாரிக்கப்பட்டுள்ளன. ஹை குவாலிட்டி ஆடியோ, ஃபோகஸ் லைட், மக்களை பார்ப்பதற்கு ஏதுவாக படிக்கட்டுகள், கட்சியின் சின்னம் பொறிக்கப்பட்ட லோகோ ஸ்டிக்கர் என குமாரசாமிக்காக பார்த்து பார்த்து பணிகள் நடைபெற்று வருகின்றன. பிரச்சார வேன் மட்டுமல்லாமல் பிரச்சாரத்துக்காக திறந்தவெளி ஜீப்களும் இந்த முறை உருவாக்கப்பட்டுள்ளன.

டிசம்பர் மாதம்

ஏ டூ இசட் எல்லா பணிகளும் நிறைவடைந்து டிசம்பர் மாதத்திற்குள் மதச்சார்பற்ற ஜனதா தளம் கட்சி தலைமையகத்தில் அவர்கள் ஆர்டர் செய்த பிரச்சார வாகனங்கள் ஒப்படைக்கப்படும் என எதிர்பார்க்கப்படுகிறது. இதையடுத்து டிசம்பர் இறுதியிலோ அல்லது ஜனவரி மாதமோ குமாரசாமி பிரச்சாரத்தை தொடங்கிவிடுவார் எனத் தெரிகிறது. இதனிடையே குமாரசாமிக்காக கோவையில் உள்ள ஜீப் கிளினிக் நிறுவனத்தில் இரவு பகலாக வேலைகள் நட்ந்து வருகின்றன.

கோவையில் அதிகம்

பிரச்சார வாகனங்களை கஸ்டமைஸ் செய்து கொடுக்கும் நிறுவனங்கள் கோவையில் ஏராளமாக உள்ளன. ஆனால் அவற்றில் கோயாஸ் நிறுவனத்திற்கும், ஜீப் கிளினிக் நிறுவனத்திற்குமே ஆர்டர்கள் அதிகம் குவிந்து வருகின்றன. காரணம் இந்த இரண்டு நிறுவனங்களின் பணிகளும், உட்கட்டமைப்பு வசதிகளும் தலைவர்களுக்கு மிகவும் பிடித்துப் போனதே. இதனிடையே ஜீப், வேன்களை தவிர்த்து பிரத்யேக முறையில் பிரச்சார பேருந்தும் குமாரசாமிக்காக பெங்களூருவிலேயே தயாராகி வருவது குறிப்பிடத்தக்கது.

English summary

As the Karnataka assembly elections heading towards, a special campaign van is being prepared in Coimbatore for Secular Janata Dal leader Kumaraswamy. This campaign vehicle is being prepared with all amenities so that there is no fatigue or disturbance during the campaign. As for Coimbatore, there are many companies like Goyas, Jeep Clinic that are involved in vehicle infrastructure.