மோடி பிறந்த நாளில் 'சம்பவம்' ?முன்கூட்டியே சட்டசபை தேர்தல் நடத்த கெஜ்ரிவால் கோரிக்கை- ஆட்சி கலைப்பு?

டெல்லி: டெல்லி முதல்வர் பதவியில் இருந்து செப்டம்பர் 17-ந் தேதி ராஜினாமா செய்வதாக அறிவித்துள்ளார் ஆம் ஆத்மி கட்சித் தலைவர் அரவிந்த் கெஜ்ரிவால். அத்துடன் டெல்லி யூனியன் பிரதேச ஆம் ஆத்மி ஆட்சியைக் கலைத்து நவம்பர் மாதம் தேர்தலை நடத்தவும் அரவிந்த் கெஜ்ரிவால் பரிந்துரைக்க திட்டமிட்டுள்ளார். பிரதமர் மோடியின் பிறந்த நாளான செப்டம்பர் 17-ந் தேதி தலைநகர் டெல்லியில் பரபர அரசியல் நிகழ்வுகள் அரங்கேற இருப்பதையே கெஜ்ரிவாலின் அறிவிப்பு வெளிப்படுத்தி இருக்கிறது.

டெல்லி மதுபான கொள்கை முறைகேடு வழக்கில் உச்சநீதிமன்றம், அரவிந்த் கெஜ்ரிவாலுக்கு ஜாமீன் வழங்கியது. இதனையடுத்து சிறையில் இருந்து விடுதலையான அரவிந்த் கெஜ்ரிவால் இன்று ஆம் ஆத்மி கட்சி தலைமை அலுவலகத்தில் கட்சி நிர்வாகிகளை சந்தித்து பேசினார். இந்த சந்திப்பின் போது, முதல்வர் பதவியில் இருந்து 2 நாட்களில் ராஜினாமா செய்யப் போவதாக அறிவித்தார் அரவிந்த் கெஜ்ரிவால்.

மேலும் தாம் மக்களை சந்தித்து மக்கள் மீண்டும் தீர்ப்பளித்தால்தான் முதல்வராக பதவியேற்பேன் எனவும் அரவிந்த் கெஜ்ரிவால் தெரிவித்துள்ளார். இதன் மூலம் டெல்லியில் ஆளும் ஆம் ஆத்மி கட்சியைக் கலைத்துவிட்டு முன்கூட்டியே தேர்தல் நடத்த முதல்வர் அரவிந்த் கெஜ்ரிவால் பரிந்துரைக்க திட்டமிட்டுள்ளது உறுதியாகி உள்ளது.

டெல்லி யூனியன் பிரதேச சட்டசபை தேர்தல் அடுத்த ஆண்டு பிப்ரவரியில்தான் நடத்தப்பட வேண்டும். தற்போதைய அரசியல் சூழ்நிலையில் ஆட்சியைக் கலைக்க கெஜ்ரிவால் பரிந்துரைக்க உள்ளார். இதனால் நவம்பர் மாதம் டெல்லியில் சட்டசபை தேர்தல் நடைபெற உள்ளது. தற்போது ஜம்மு காஷ்மீர், ஹரியானா சட்டசபை தேர்தல்கள் நடைபெறுகின்றன. இதனைத் தொடர்ந்து மகாராஷ்டிரா, ஜார்க்கண்ட் தேர்தல்கள் நடைபெற உள்ளன. இந்த பட்டியலில் தற்போது டெல்லி சட்டசபை தேர்தலும் இணைய உள்ளது.

ஆம் ஆத்மி கட்சி நிர்வாகிகளிடம் பேசிய கெஜ்ரிவால், 2 நாட்களில் ராஜினாமா செய்வேன் என அறிவித்துள்ளார். அதாவது செப்டம்பர் 17-ந் தேதி தமது பதவியை ராஜினாமா செய்ய திட்டமிட்டுள்ளார். அன்றைய தினம் பிரதமர் மோடியின் பிறந்த நாள். அன்றைய தினம் தலைநகர் டெல்லியில் முதல்வர் பதவி ராஜினாமா, ஆட்சியை கலைக்கப் பரிந்துரை என அடுத்தடுத்த பரபரப்புகளை அரங்கேற்ற இருக்கிறார் அரவிந்த் கெஜ்ரிவால்.

English summary

Delhi Chief Minister Arvind Kejriwal has demanded that the early elections for the Delhi Assembly instead of Feb 2025.