ஹார்முஸ் ஜலசந்தியில்.. அமெரிக்கப் படை முற்றுகை.. ட்ரம்ப்பின் அதிரடி அறிவிப்பு.. உலகளவில் பதற்றம்!

Updated: Monday, April 13, 2026, 7:54 [IST]

Subscribe to Oneindia Tamil

டெல்லி: பாகிஸ்தானின் இஸ்லாமாபாத் நகரில் நடந்த 20 மணி நேரப் பேச்சுவார்த்தை தோல்வியில் முடிந்ததைத் தொடர்ந்து, ஈரான் மீது கடுமையான ராணுவ நடவடிக்கைகளை அமெரிக்க அதிபர் டொனால்ட் ட்ரம்ப் அறிவித்துள்ளார்.

பெரிய எதிர்பார்ப்புடன் தொடங்கப்பட்ட 'இஸ்லாமாபாத் பஞ்சாயத்து' இப்போது ஒரு சஸ்பென்ஸ் த்ரில்லர் போல முடிவின்றி நிற்கிறது.

15 மணி நேர மாரத்தான் பேச்சுவார்த்தை, ட்ரம்ப்பின் அதிரடி ட்வீட்கள், ஈரானின் பிடிவாதம் என களைகட்டிய அமைதிப் பேச்சுவார்த்தையின் முதல் அத்தியாயம், ஒரு 'சாலிட்' முடிவை எட்டாமலேயே முடிந்திருக்கிறது. அமெரிக்க துணை அதிபர் ஜே.டி. வேன்ஸ் தனது குழுவுடன் வாஷிங்டன் திரும்பியிருப்பது, 'அமைதி வருமா அல்லது போர் தொடருமா?' என்ற மில்லியன் டாலர் கேள்வியை அப்படியே விட்டுச் சென்றிருக்கிறது.

இஸ்லாமாபாத் பஞ்சாயத்து - முடிவற்ற மாரத்தான்:

சனிக்கிழமை நள்ளிரவு வரை நீண்ட 15 மணி நேரப் பேச்சுவார்த்தையில், ஹார்முஸ் நீரிணையைத் திறப்பது மற்றும் அணுசக்தி விவகாரங்கள் குறித்து மிகத் தீவிரமாக விவாதிக்கப்பட்டது. ஆனால், ஈரானின் முடக்கப்பட்ட சொத்துக்களை விடுவிப்பது மற்றும் லெபனான் போர் நிறுத்தம் ஆகிய நிபந்தனைகளில் இரு தரப்புக்கும் இடையே ஒருமித்த கருத்து எட்டப்படவில்லை. 'பேச்சுவார்த்தையில் முன்னேற்றம் இருக்கிறது' என்று ஒரு பக்கம் சொல்லப்பட்டாலும், 'முடிவு' என்னவோ இன்னும் எட்டாக் கனியாகவே இருக்கிறது.

என்ன நடந்தது இஸ்லாமாபாத்தில்?

ஈரானின் அணுசக்தித் திட்டம் மற்றும் ஹார்முஸ் ஜலசந்தியில் நிலவும் பதற்றத்தைத் தணிக்க, அமெரிக்கா மற்றும் ஈரான் பிரதிநிதிகள் இடையே இஸ்லாமாபாத்தில் தீவிரமான பேச்சுவார்த்தை நடைபெற்றது. கிட்டத்தட்ட 20 மணி நேரம் நீண்ட இந்தப் பேச்சுவார்த்தையில், பெரும்பாலான விவகாரங்களில் உடன்பாடு எட்டப்பட்டாலும், ஈரானின் 'அணுசக்தி கனவு' என்ற ஒற்றைப் புள்ளியில் முட்டுக்கட்டை விழுந்தது.

"ஈரான் தனது அணுசக்தி லட்சியங்களை விட்டுக்கொடுக்கத் தயாராக இல்லை. ஆனால், ஈரான் கைகளில் அணு ஆயுதம் ஒருபோதும் சேரப்போவதில்லை" என தனது 'ட்ரூத் சோஷியல்' (Truth Social) பக்கத்தில் ட்ரம்ப் கொந்தளித்துள்ளார்.

ட்ரம்ப்பின் அதிரடி 'பிளாக்-மெயில்' முறியடிப்பு

ஹார்முஸ் ஜலசந்தி வழியாகச் செல்லும் கப்பல்களிடம் ஈரான் சட்டவிரோதமாக சுங்கம் (Tolls) வசூலிப்பதாகக் குற்றம் சாட்டியுள்ள ட்ரம்ப், அதை "உலகளாவிய மிரட்டிப் பணம் பறித்தல்" (World Extortion) என்று வர்ணித்துள்ளார்.

இதனைத் தொடர்ந்து அவர் வெளியிட்டுள்ள அதிரடி உத்தரவுகள் இதோ:

கப்பல் போக்குவரத்து முடக்கம்: ஹார்முஸ் ஜலசந்தியை அமெரிக்க கடற்படை உடனடியாகத் தனது கட்டுப்பாட்டில் கொண்டு வந்து, முற்றுகையிடத் தொடங்கும்.

ஈரானுக்குப் பணம் கொடுத்தால் ஆபத்து: ஈரானிடம் சட்டவிரோத சுங்கக் கட்டணம் செலுத்திவிட்டுப் பயணிக்கும் எந்தக் கப்பலுக்கும் பாதுகாப்பு கிடையாது; அத்தகைய கப்பல்களை அமெரிக்கக் கடற்படை வழிமறித்துச் சோதனையிடும்.

கண்ணிவெடி அகற்றம்: அந்தப் பகுதியில் ஈரான் கண்ணிவெடிகளைப் புதைத்து வைத்திருப்பதாகக் கூறி, அவற்றை அகற்றும் பணியில் அமெரிக்கப் போர்க்கப்பல்கள் ஏற்கனவே இறங்கிவிட்டதாகப் பாதுகாப்புத் துறைச் செயலர் பீட் ஹெக்செத் (Pete Hegseth) உறுதிப்படுத்தியுள்ளார்.

பதறியடிக்கும் கச்சா எண்ணெய் சந்தை!

உலகளாவிய எண்ணெய் போக்குவரத்தின் இதயத்துடிப்பாக விளங்கும் ஹார்முஸ் ஜலசந்தி முற்றுகையிடப்படுவது, சர்வதேச அளவில் பெரும் பொருளாதாரப் பாதிப்பை ஏற்படுத்தும் என அஞ்சப்படுகிறது.

ஈரான் தரப்போ, "அமெரிக்கா தேவையில்லாமல் மிகைப்படுத்துகிறது; இந்தப் பகுதி எங்கள் கட்டுப்பாட்டிலேயே இருக்கிறது. வெளிநாட்டு ராணுவங்களின் எந்தவொரு அத்துமீறலுக்கும் தக்க பதிலடி கொடுக்கப்படும்" என எச்சரிக்கை விடுத்துள்ளது.

"யாருடைய பிடிவாதம் பெரியது?" என்ற அமெரிக்கா - ஈரான் இடையிலான இந்த 'ஈகோ' யுத்தம், உலக நாடுகளை மீண்டும் ஒரு போர் மேகத்தின் நிழலில் தள்ளியுள்ளது. ஏப்ரல் 21 வரை போர் வராது என பாகிஸ்தான் உத்தரவாதம் அளித்தாலும், ட்ரம்ப்பின் தற்போதைய நகர்வுகள் நிலைமையை விளிம்பிற்கே கொண்டு சென்றுள்ளன!