விளையாட்டு பல்கலைக்கழக மசோதா.. ஆளுநருக்கு எதிராக சுப்ரீம் கோர்ட்டில் வழக்கு.. இன்று விசாரணை

Updated: Friday, October 17, 2025, 10:02 [IST]

Subscribe to Oneindia Tamil

டெல்லி: தமிழ்நாடு சட்டசபையில் நிறைவேற்றப்பட்ட உடற்கல்வியியல், விளையாட்டு பல்கலைக்கழக மசோதாவை குடியரசுத் தலைவருக்கு அனுப்பி வைத்த ஆளுநருக்கு எதிராக தமிழக அரசு உச்சநீதிமன்றத்தில் மனுத்தாக்கல் செய்துள்ளது. இந்த மனு மீதான விசாரணை உச்சநீதிமன்றத்தில் இன்று நடக்கவுள்ளது.

தமிழ்நாடு உடற்கல்வியியல், விளையாட்டு பல்கலைக்கழகத்தின் துணைவேந்தரை நியமிப்பது மற்றும் நீக்குவதற்கான அதிகாரத்தை அரசுக்கு வழங்கும் சட்டத் திருத்த மசோதா கடந்த ஏப்ரல் 29ஆம் தேதி சட்டசபையில் நிறைவேற்றப்பட்டது. இந்த மசோதாவை ஆளுநரின் ஒப்புதலுக்கு தமிழக அரசு மே 5ஆம் தேதி அனுப்பி வைத்தது.

இதனையடுத்து ஆளுநர் மாநில அரசின் ஆலோசனையை மதிக்காமல், யுஜிசி விதிகளுக்கு முரணாக இருப்பதாகக் கூறி குடியரசுத் தலைவரின் பரிசீலனைக்கு ஜூலை 14ஆம் தேதி அனுப்பி வைத்தார். இதுதொடர்பாக தமிழக அரசு உச்சநீதிமன்றத்தை நாடி இருக்கிறது. தமிழக அரசு சார்பாக வழக்கறிஞர்கள் பி.வில்சன் மற்றும் ஹரீஷ் குமார் ஆகியோர் மனுத்தாக்கல் செய்துள்ளனர்.

அதில், தொழில்நுட்ப கல்வி, மருத்துவக் கல்வி, பல்கலைக்கழகங்கள் ஆகியவை பொதுப்பட்டியலில் உள்ளதால், அந்த மசோதாவுக்கு ஒப்புதல் அளிக்கும் அதிகாரம் ஆளுநருக்கு உள்ளது. தவிர, அந்த பல்கலைக்கழகத்தின் 2004ஆம் ஆண்டு சட்டத்துக்கு குடியரசுத் தலைவர் கடந்த 2005 ஆகஸ்ட் 4ஆம் தேதி ஒப்புதல் அளித்துள்ளார்.

தற்போதைய சட்டத்திருத்த மசோதாவும் மத்திய அரசின் சட்டத்துடன் முரண்படவில்லை. இதுதொடர்பாக மாநில அமைச்சரவையின் ஆலோசனையை அறிந்த பிறகும், யுஜிசி விதிகளுக்கு முரணாக உள்ளது என ஆளுநர் கருதியுள்ளார். இந்த விவகாரத்திற்கு யுஜிசி விதிகள் பொருந்தாது. உச்ச நீதிமன்ற தீர்ப்புகளால் முடிவான சட்டத்தை மறந்துவிட்டு, தமிழக அரசின் உண்மையான முயற்சிகளுக்கு ஆளுநர் முட்டுக்கட்டை போட்டு வருகிறார்.

இதனால் மேற்கண்ட சட்டத்திருத்த மசோதாவை குடியரசுத் தலைவருக்கு அனுப்பி வைத்ததும், இதன் மீதான மேற்படி நடவடிக்கைகளையும் சட்டத்துக்கு முரணானது என அறிவிக்க வேண்டும். அந்த மசோதாவை ஆளுநருக்கே திருப்பி அனுப்ப யுஜிசிக்கு உத்தரவிட வேண்டும். அமைச்சரவையின் ஆலோசனைப்படி மசோதாவை பரீசிலிக்க ஆளுநருக்கும் உத்தரவிட வேண்டும் என்று தெரிவிக்கப்பட்டுள்ளது. இந்த மனு மீதான இப்ன்று உச்சநீதிமன்றத்தில் நடக்க உள்ளது.