மீனவர்கள் படுகொலை-"இந்தியாவை வெறுக்க நேரும்" என வார்னிங்! நாடாளுமன்றத்தை அதிரவைத்த கனிமொழி, வைகோ!

Updated: Wednesday, August 7, 2024, 7:41 [IST]

Subscribe to Oneindia Tamil

டெல்லி: இலங்கை கடற்படையால் தமிழ்நாட்டு மீனவர்கள் படுகொலை செய்யப்படுவதும் கைது செய்யப்படுவதும் தொடர்ந்து நடைபெற்றுக் கொண்டிருந்தாலும் மத்திய அரசு இதனைத் தடுக்கவில்லை; தமிழ்நாட்டு மீனவர்கள் மீதான தாக்குதல்களை மத்திய அரசு தடுத்து நிறுத்த உடனே நடவடிக்கை எடுக்க வேண்டும் என லோக்சபாவில் திமுக நாடாளுமன்ற குழுத் தலைவர் கனிமொழி, ராஜ்யசபாவில் மதிமுக பொதுச்செயலாளர் வைகோ எம்பி ஆகியோர் ஆவேசமாக குரல் கொடுத்தனர்.

லோக்சபாவில் நேற்று திமுக எம்பி கனிமொழி பேசுகையில், தமிழ்நாட்டு மீனவர்கள் தொடர்ந்து கைது செய்யப்படுகின்றனர். இந்த ஆண்டு 22 படகுகள் கைப்பற்றப்பட்டுள்ளன. இலங்கை கடற்படையானது மொத்தம் 177 படகுகளை கைப்பற்றி வைத்துள்ளது. 22 மீனவர்கள் தற்போது கைது செய்யப்பட்டுள்ளனர். 2 படகுகள் பறிமுதல் செய்யப்பட்டுள்ளன. இதனை தடுத்து மீனவர்களை விடுதலை செய்ய நடவடிக்கை எடுக்க வேண்டும் என்றார்.

இதேபோல ராஜ்யசபாவில் பேசிய வைகோ எம்பி, நான்கு மீனவர்களைக் கைது செய்திருக்கிறார்கள். ஒரு மீனவரைக் கொன்றுவிட்டார்கள். தமிழக மீனவர்கள் இந்தியாவின் குடிமக்கள் இல்லையா? இலங்கைச் சிறையில் உள்ள தமிழக மீனவர்கள் அனைவரையும் விடுதலை செய்ய நரேந்திர மோடி அரசு நடவடிக்கை எடுக்க வேண்டும். தமிழர்களை ஓரவஞ்சகமாக அடிமைப்படுத்தியும், பலத்த காயங்களை ஏற்படுத்தியதற்கு சிங்களப் படைகளும், சிங்கள அரசும் பொறுப்பேற்க வேண்டும் என்றார்.

அப்போது, ராஜ்யசபா துணைத் தலைவர் ஹரிவன்ஸ்சிங் தலைமை தாங்கும் நாற்காலியில் வந்து அமர்ந்தார். சீக்கிரம் முடியுங்கள்; சீக்கிரம் முடியுங்கள் என்று மணியை அடித்துக்கொண்டே இருந்தார். இதற்கும் ஆவேசப்பட்ட வைகோ, , நீங்கள் ஓரவஞ்சகமாகவே நடக்கிறீர்கள். வாய்ப்புக்களை மறுக்றீர்கள். சிறையில் உள்ள தமிழக மீனவர்களை உடனடியாக விடுதலை செய்ய ஒன்றிய அரசு ஏற்பாடு செய்ய வேண்டும். தமிழர்களைக் கிள்ளுக் கீரையாக நினைத்து இந்த மோடி அரசு பாதகம் செய்கிறது. இந்த நிலைமை தொடர்ந்துகொண்டே இருந்தால், தமிழக மீனவர்களின் இளம் தலைமுறையினரிடம் இந்தியா மீது வெறுப்புத்தான் உருவாகும். இப்படி ஓரவஞ்சகமாக செயல்படத்தான் நீங்கள் இந்த நாற்காலியில் உட்கார்ந்திருக்கிறீர்கள் என்று குற்றம் சாட்டுகிறேன். காலம் மாறும். தமிழக மீனவர்களை பாதுகாக்கின்ற நடவடிக்கைகளை இந்திய அரசு மேற்கொள்ளும் காலம் வரும் என்றார்.