திருப்பூர் தப்பியது! இந்தியா மீதான வரியை குறைத்த டிரம்ப்! எந்த துறைகள் பலன் பெறும்? விவரம்

டெல்லி: இந்தியா மீது அமெரிக்கா 25% அளவுக்கு பரஸ்பர வரியை விதித்திருந்தது. வரி குறைப்பு தொடர்பாகவும், அமெரிக்காவுடனான வர்த்தகம் தொடர்பாகவும் இந்தியா பேச்சுவார்த்தையில் ஈடுபட்டு வந்திருந்த நிலையில், தற்போது பேச்சுவார்த்தை வெற்றியடைந்துள்ளது. இதனால் இந்தியா மீதான பரஸ்பர வரியானது 25%லிருந்து 18% ஆக குறைக்கப்பட்டிருக்கிறது. இதனால் பல துறைகள் பலனடையும் என்று சொல்லப்படுகிறது.

இந்த வர்த்தக ஒப்பந்தம் உடனடியாக அமலுக்கு வரும் என்று அமெரிக்க அதிபர் டிரம்ப் அறிவித்துள்ளார். இது இந்தியாவுக்கு உடனடி வரிச் சலுகையை உறுதிப்படுத்துகிறது.

வரிச்சுமை குறைந்ததால், அமெரிக்கச் சந்தையில் கணிசமான வர்த்தகம் கொண்ட நிறுவனங்கள் தங்கள் லாப வரம்புகளில் நிவாரணம், மேம்பட்ட போட்டித்திறன் மற்றும் சிறந்த ஆர்டர் திட்டமிடல் ஆகியவற்றை எதிர்பார்க்கலாம். இந்திய ஏற்றுமதியாளர்களிடையே ஜவுளி, கடல் உணவு, வாகன உதிரி பாகங்கள், ரசாயனங்கள் மற்றும் தேர்ந்தெடுக்கப்பட்ட நுகர்வோர் நிறுவனங்கள் இதில் முக்கியப் பயனாளிகளாக இருக்கும் எனத் தெரிகிறது.

குறிப்பாக திருப்பூரின் ஜவுளி உற்பத்தி மீண்டும் புத்துயிர் பெரும் என சொல்லப்படுகிறது. இந்திய பின்னலாடைகளுக்கு அமெரிக்கா ஏற்கனவே சுமார் 16% வழக்கமான வரி விதித்து வந்தது. அதனுடன் 2025-ல் அறிவிக்கப்பட்ட கூடுதல் அபராத வரிகளும் சேர்ந்தபோது, மொத்த வரிச்சுமை 65% வரை உயர்ந்தது.

வரி அதிகரிப்பால் இந்திய ஆடைகளின் விலை அமெரிக்கச் சந்தையில் மிக அதிகமாக உயர்ந்தது. இதனால் வங்கதேசம், வியட்நாம் போன்ற நாடுகளுடன் போட்டியிட முடியாமல் திருப்பூர் நிறுவனங்கள் பல பில்லியன் டாலர் மதிப்புள்ள ஆர்டர்களை இழந்தன. அதிக வரி காரணமாக ஏற்கனவே உற்பத்தி செய்யப்பட்ட ஆடைகள் துறைமுகங்களிலும், கிடங்குகளிலும் தேக்கமடைந்தன. பல சிறு மற்றும் குறு நிறுவனங்கள் நஷ்டத்தை ஈடுகட்ட முடியாமல் உற்பத்தியை நிறுத்தும் நிலைக்குத் தள்ளப்பட்டன.

வாடிக்கையாளர்களைத் தக்கவைக்க ஏற்றுமதியாளர்கள் தங்களின் லாபத்தை முழுமையாகத் தியாகம் செய்து 20% முதல் 25% வரை தள்ளுபடி வழங்க வேண்டியிருந்தது. இந்நிலையில் இன்று அறிவிக்கப்பட்ட ஒப்பந்தத்தின் மூலம் அமெரிக்கா தனது வரியை 18% ஆகக் குறைத்துள்ளதால், திருப்பூர் நிறுவனங்களுக்கு நன்மைகள் கிடைக்கும்.

65% லிருந்து 18% ஆக வரி குறைந்திருப்பது, அமெரிக்கச் சந்தையில் இந்திய ஆடைகளின் விலையை உடனடியாகக் குறைக்கும். இது மீண்டும் பழைய ஆர்டர்கள் இந்தியாவுக்குத் திரும்ப வழிவகுக்கும். வரிக் குறைப்பால் நிறுவனங்களின் லாப வரம்பு உயரும். இது கடந்த சில மாதங்களாக ஏற்பட்ட நஷ்டத்தை ஈடுகட்ட உதவும்.

English summary

Tiruppur Exporters: The United States had imposed a 25% reciprocal tariff on India. While India had been engaged in negotiations regarding tariff reduction and trade with the US, these talks have now been successful. As a result, the reciprocal tariff on India has been reduced from 25% to 18%. It is said that several sectors will benefit from this.