மோடி வழியில் இணையதளம் துவங்கிய பாஜக தலைவர் அமித் ஷா

டெல்லி: பாஜக தேசிய தலைவர் அமித் ஷாவின் அதிகாரப்பூர்வ இணையதளத்தை அக்கட்சியின் பொதுச் செயலாளர் ராம் லால் துவக்கி வைத்தார்.

பிரதமர் நரேந்திர மோடி நாட்டு மக்களுடன் தொடர்பில் இருக்க தனது பெயரில் அதிகார்ப்பூர்வ இணையதளத்தை வைத்துள்ளார். இந்நிலையில் பாஜக தேசிய தலைவர் அமித் ஷாவின் அதிகாரப்பூர்வ இணையதளத்தை "www.amitshah.co.in" அக்கட்சியின் பொதுச் செயலாளர் ராம் லால் துவங்கி வைத்துள்ளார்.

இணையதள துவக்க நிகழ்ச்சியில் கலந்து கொண்ட அமித் ஷா கூறுகையில்,

நான் ஊடகத்துடன் அவ்வளவாக தொடர்பில் இல்லை என்று எனக்கு மக்களிடம் இருந்து புகார்கள் வந்து கொண்டே இருக்கிறது. அதை நான் ஒப்புக் கொள்கிறேன். நாட்டு மக்கள் அதிலும் குறிப்பாக கட்சித் தொண்டர்களுடன் தொடர்பில் இருக்க எளிய வழியை கண்டுபிடித்துள்ளேன். அமித் ஷா இணையதளம் மூலம் நான் அவர்களுடன் இனி தொடர்பில் இருப்பேன்.

கட்சி, அரசு மற்றும் என்னுடைய செயல்கள் பற்றி www.amitshah.co.in என்ற இணையதளத்தில் வெளியிடப்படும். இன்னும் ஒரு வாரத்திற்குள் இணையதளம் முழுமையாக செயல்படும். ராம் லால் தனது வாழ்க்கையை கட்சிக்காக அர்ப்பணித்தவர். அதனால் தான் அவரை இந்த இணையதளத்தை துவக்கி வைக்குமாறு கேட்டுக் கொண்டேன் என்றார்.

English summary

BJP general secretary Ram Lal launched the website of party chief Amit Shah, who hoped it will help interact with the people of the country and party workers.