காவி பிகினியில் ஆபாசம்.. மாலில் ‛பதான்’ பட பேனர்களை கிழித்தெறிந்த பஜ்ரங்தள அமைப்பு.. பரபர குஜராத்!
அகமதாபாத்: ஷாருக்கான், தீபிகா படுகோன் நடிப்பில் ‛பதான்' திரைப்படம் உருவாகி உள்ளது. இந்த படத்தில் வரும் பாடலில் தீபிகா படுகோன் காவி பிகினி அணிந்து ஷாருக்கானுடன் ஆபாசமாக நடனமாடும் காட்சிகள் இடம்பெற்றுள்ளன. இதற்கு பாஜக, இந்துத்துவ அமைப்பினர் கடும் எதிர்ப்பு தெரிவித்து வரும் நிலையில் ‛பதான்' படத்தின் புரோமோசனுக்காக அகமதாபாத் மாலில் வைக்கப்பட்ட பேனர்களை ‛ஜெய்ஸ்ரீராம்' கோஷத்துடன் பஜ்ரங் தளத்தை சேர்ந்தவர்கள் கிழித்து சேதப்படுத்தியது அதிர்ச்சியை ஏற்படுத்தி உள்ளது.
நடிகர் ஷாருக்கான், தீபிகா படுகோன் நடிப்பில் உருவாகி உள்ள படம் பதான். இந்த படத்தை சித்தார்த் ஆனந்த் இயக்கியுள்ளார். படத்தின் படப்பிடிப்புகள் முழுமையாக முடிவடைந்துள்ளன.
பான் இந்தியா படமாக உருவாகி உள்ள பதான் ஜனவரி 25ம் தேதி திரைக்கு வர உள்ளது. இந்நிலையில் தான் படத்தின் போஸ்டர்கள், பாடல்கள் வெளியிடப்பட்டன. பர்ஸ்ட் சிங்கிள் கடந்த டிசம்பர் 12ம் தேதி வெளியானது.
காவி நிற பிகினி சர்ச்சை
அதில் ஷாருக்கான், தீபிகா படுகோன் ஆகியோர் கவர்ச்சியாக ஆடும் நடனம் சர்ச்சையை கிளப்பியது. மேலும் தீபிகா படுகோன் அணிந்திருந்த காவி நிற பிகினி ஆடை பெரும் விவாதத்தை கிளப்பியது. இந்தப் படத்தில் இடம்பெற்றுள்ள 'பேஷரம் ரங்' பாடல் காட்சியில், தீபிகா படுகோன் காவி நிறத்தில் பிகினி உடை அணிந்த புகைப்படம், நடனம் தான் பிரச்சனைக்கு முக்கிய காரணமாகும்.
‛பாய்காட்’ செய்ய பிரசாரம்
இதற்கு பாஜகவினர், இந்து அமைப்பினர் கடும் எதிர்ப்பு தெரிவித்தனர். ஷாருக்கான், தீபிகா படுகோனேவுக்கு எதிராக அவர்கள் தொடர்ந்து கருத்துகள் தெரிவித்து வரும் நிலையில் இந்தியாவில் பதான் திரைப்படத்தை பாய்காட் செய்ய வேண்டும் என பலரும் தொடர்ந்து பேசி வருகின்றனர். பல இடங்களில் ஷாருக்கான், தீபிகா படுகோனின் உருவபடங்கள் எரிக்கப்பட்டன.
குஜராத்தில் போஸ்டர்கள் கிழிப்பு
இந்நிலையில் தான் பதான் படத்தின் புரோமோஷனுக்காக குஜராத் மாநிலம் அகமதாபாத் அருகே உள்ள தனியார் மாலில் ‛பதான்' படத்தில் நடித்துள்ள ஷாருக்கான் உள்ளிட்ட நடிகர்களின் படங்களுடன் பேனர்கள் வைக்கப்பட்டு இருந்தன. இதற்கு எதிர்ப்பு தெரிவித்து இந்துத்துவா அமைப்பினர் ஆக்ரோஷமாக போராட்டம் நடத்தினர். அதன்படி ‛ஜெய் ஸ்ரீராம்' கோஷத்துடன் மாலுக்குள் நுழைந்த இந்து அமைப்பினர் அங்கிருந்த பதான் பட போஸ்டர்களை கிழித்து எரிந்து சேதப்படுத்தினர். மேலும் மாலின் சில இடங்களை அவர்கள் சேதப்படுத்தியதாக கூறப்படுகிறது.
வெளியான போட்டோ-வீடியோக்கள்
தற்போது இதுதொடர்பான வீடியோக்கள், போட்டோக்கள் இணையதளங்களில் வெளியாகி வருகின்றன. அதன்படி இந்த போராட்டத்தை இந்துத்துவா அமைப்பான பஜ்ரங்கதளத்தை சேர்ந்தவர்கள் செய்துள்ளனர். மேலும் சம்பவம் குறித்து போலீசில் புகார் செய்வது குறித்து மால் நிர்வாகம் ஆலோசனை செய்து வருகிறது.
திட்டமிட்டபடி வெளியாகுமா?
பதான் படம் வெளியாக இன்னும் 20 நாட்கள் மட்டுமே உள்ள நிலையில் இந்துத்துவ அமைப்பினர் தொடர்ந்து எதிர்ப்பு தெரிவித்து வருகின்றனர். இதனால் பதான் படம் திட்டமிட்டபடி வெளியாகுமா? வெளியானாலும் பிரச்சனைகள் இன்றி திரையரங்குகளில் படம் ஓடுமா? என்ற கேள்வி எழுந்துள்ளது. இருப்பினும் படத்தை திட்டமிட்டபடி வெளியிடுவதில் படக்குழு உறுதியாக உள்ளது.
Click it and Unblock the Notifications
Sign in with Google