உ.பி, பீகாரில் அதிக தொகுதிகளை பாஜக கைப்பற்றும்- ஏ.பி.பி.- நீல்சன் கருத்து கணிப்பு

By Mathi

Published: Saturday, February 22, 2014, 13:34 [IST]

Subscribe to Oneindia Tamil

டெல்லி: லோக்சபா தேர்தலில் நாட்டில் அதிக தொகுதிகளைக் கொண்ட உத்தரப்பிரதேசம் மற்றும் பீகார் மாநிலங்களில் பாரதிய ஜனதா கட்சியே அதிக இடங்களைக் கைப்பற்றும் என்று ஏ.பி.பி.- நீல்சன் கருத்து கணிப்பில் தெரிவிக்கப்பட்டுள்ளது.

உத்தரபிரதேசத்தில் 80. பீகாரில் 40 தொகுதிகள் என மொத்தம் இந்த இரு மாநிலங்களில் மட்டும் 120 தொகுதிகள் இருக்கின்றன. இந்த இரு மாநிலங்களும் மத்தியில் யார் ஆட்சியை அமைப்பது என்பதில் தீர்மானிக்கக் கூடிய முக்கிய சக்திகளாக இருக்கின்றன.

இந்த இரு மாநிலங்களிலும் ஏ.பி.பி. மற்றும் நீல்சன் நிறுவனம் இணைந்து ஒரு கருத்து கணிப்பை நடத்தியது. இதில் பாரதிய ஜனதா கட்சியே இரண்டு மாநிலங்களிலும் அதிக இடங்களைக் கைப்பற்றும் என்று தெரிவிக்கப்பட்டுள்ளது.

உ.பி.யில் பாஜகவுக்கு 40

உத்தரப்பிரதேச மாநிலத்தில் மொத்தம் உள்ள 80 தொகுதிகளில் 40ஐ பாஜக கைப்பற்றக் கூடுமாம். இம்மாநிலத்தில் 2009 தேர்தலில் பாஜக 10 தொகுதிகளைத்தான் கைப்பற்றியிருந்தது.

சமாஜ்வாடி, பகுஜனுக்கு பின்னடைவு

பாஜக விஸ்வரூபமெடுத்திருப்பதால் 2009 தேர்தலில் 20 தொகுதிகளைக் கைப்பற்றிய பகுஜன் சமாஜ் கட்சிக்கு இம்முறை 13 முதல் 15 தொகுதிகள்தான் கிடைக்குமாம். அதேபோல் கடந்த தேர்தலில் 23 தொகுதிகளைக் கைப்பற்றிய சமாஜ்வாடிக்கு இம்முறை 14 தான் கிடைக்குமாம்.

உ.பி.யில் காங்கிரஸ்

உத்தரப்பிரதேசத்தில் காங்கிரஸ்- ராஷ்டிரிய ஜனதா தள கூட்டணிக்கு 11 இடம் கிடைக்குமாம்.

பீகாரிலும் பாதிக்கு பாதி பாஜகவுக்கு

பீகார் மாநிலத்தில் 40 தொகுதிகளில் 21 தொகுதிகள் பா.ஜ.க.வுக்கு கிடைக்கும் என்கிறது கருத்து கணிப்பு. ஆனால் கடந்த மாதம் நடந்த கருத்து கணிப்பில் பா.ஜ.க.வுக்கு பீகாரில் 24 இடங்கள் வரை கிடைக்கும் என்று கூறப்பட்டிருந்தது குறிப்பிடத்தக்கது.