இந்தியா தான் உலகத்திலேயே முதல்முயற்சி .. இன்று காலை தொடங்கியது 'சந்திராயன் 2' கவுன்ட்டவுன்

ஸ்ரீஹரிகோட்டா : நிலவின் தென்துருவ பகுதியை ஆராய்ச்சி செய்வதற்காக சந்திராயன் -2 விண்கலம் நாளை அதிகாலை விண்ணில் ஏவப்பட உள்ளது. இதற்கான கவுன்ட்டவுன் இன்று காலை 6.51 மணிக்கு தொடங்கியது.

உலக நாடுகளிலேயே முதல்முறையாக நிலவின் தென்துருவ பகுதிகளை ஆராயும் முயற்சியில் இந்தியா இறங்கி உள்ளது. இதற்காக சந்திராயன்-2 விண்கலத்தை இந்தியா உருவாக்கி வந்தது. இந்நிலையில் இறுதிகட்ட பணிகள் முடிந்த நிலையில் சந்திராயன் 2 விண்கலதை விண்ணில் ஏவ இந்தியா தயாராகி வருகிறது. நாளை அதிகாலை 2.51 மணியளவில் 3850 கிலோ எடைகளுடன் சந்திராயன்-2 விண்கலம், ஸ்ரீஹரிகோட்டாவில் உள்ள சதீஷ் தவான் விண்வெளி மையத்தில் இருந்து விண்ணில் ஏவப்பட உள்ளது.

இதற்கான கவுன்ட் டவுன் காலை 6.51 மணிக்கு தொடங்கியது. சந்திரயான்-2 விண்கலத்தை வெற்றிகரமாக விண்ணில் ஏவ ஜி.எஸ்.எல்.வி மார்க் 3 ராக்கெட் பயன்படுத்தப்படவுள்ளது. வெற்றிகரமான விண்ணில் ஏவப்பட்ட உடன், இரண்டு மாத பயணங்களுக்கும் பின் சந்திராயன் -2 நிலவின் தென் துருவப் பகுதியை அடையும்.

3.84 லட்சம் கிலோமீட்டர் பயணம் செய்து நிலவை அடையப்போகிறது சந்திராயன் 2. இந்த சந்திராயன் 2 திட்டத்தை செயல்படுத்த 978 கோடி ரூபாயை இந்தியா செலவழித்துள்ளது. இதுவரை எந்த விண்கலமும் கால் பதிக்காத இடத்தை சந்திராயன் - 2 தனது தடத்தை பதிக்க உள்ளதால் பெரும் எதிர்பார்ப்பு ஏற்பட்டுள்ளது.

இதுவரை எந்த நாடும் இதற்காக முயற்சியில் இறங்கவில்லை . எனவே இந்த முயற்சியானது நிலவு குறித்த அறிவியலில் நிறைய புதிய தகவல்களை வெளி உலகுக்கு இந்தியா தெரிவிக்க வாய்ப்பு உள்ளது. சந்திராயன் -2 விண்கலத்தை விண்ணில் ஏவுவது என்பது இந்தியாவின் முக்கியமான மற்றும் மதிப்புமிக்க பணியாகும். இதன் மூலம் விண்வெளி துறையில் இந்தியா தனது அடுத்த மைல்கல்லை எட்டும்.

English summary

Chandrayaan-2, countdown started at 6.51 a.m in this morning , ISRO to launch moon landing mission at 2.51 a.m. on Monday