வாக்களிப்பது நமது உரிமை... 100 வயதிலும் தவறாமல் வாக்களித்த ஸ்ரீநகர் தாத்தா

ஸ்ரீநகர்: ஸ்ரீநகரில் 100 வயது முதியவர் ஒருவர் தனது தள்ளாத வயதிலும் வாக்குப்பதிவு செய்துள்ளார். இந்த நாளை தனது வாழ்நாளில் தான் மறக்க இயலாது என அவர் தெரிவித்துள்ளார்.

வாக்களிப்பது நமது கடமை, உரிமை என்ற விழிப்புணர்வு பெருவாரியான மக்களிடையே ஏற்பட்டுள்ளது. அதிகரித்து வரும் வாக்குப்பதிவு சதவீதம் இதை உண்மை என நிரூபிப்பது போல் அமைந்துள்ளது.

இந்நிலையில் 16வது லோக்சபா தேர்தலில், நேற்று 7வது கட்ட வாக்குப்பதிவில் காஷ்மீர் மாநிலத்தில் 100 வயது முதியவர் ஒருவர் வாக்களித்துள்ளார். அவர் தவறாமல் வாக்களித்து வந்துள்ளாராம். தனது வாழ்நாளில் இதற்கு முந்தைய தேர்தல்களில் அவர் வாக்களிக்காமல் இருந்ததில்லையாம். முடிந்தவரை வாக்களித்து விடுவாராம்.

அந்த 100 வயது முதியவரின் பெயர் ஹாஜி முகமது சுல்தான். அவர் தனது வாக்களித்த அனுபவம் பற்றிக் கூறும் போது, ‘நான் வாக்களிக்கும் வாய்ப்பை தவற விட விரும்பவில்லை. வாக்களிப்பது நமது உரிமை. இதை நான் வீணடிக்க விரும்பவில்லை. ஜனநாயகத்திற்கான வாக்குப்பதிவு செய்யும் இந்த நாளை நான் என்றும் மறந்ததில்லை'' என்றார்.

இதற்கிடையே, ஹுரியத் மாநாட்டுக் கட்சியின் முன்னாள் தலைவரான அப்துல் ஹுசைன் மோசவி நேற்று ஸ்ரீநகர் லோக்சபா தொகுதியில் அமைந்துள்ள ஒரு வாக்குச்சாவடியில் தனது வாக்கை பதிவு செய்தார். இதற்கு முன் இவர் தேர்தலில் வாக்களித்தது இல்லையாம். இதுவே முதல் முறையாகும். இவர் பாராமுல்லா தொகுதியில் சுயேட்சையாக போட்டியிடுவது குறிப்பிடத்தக்கது.

English summary

A 100-year-old man cast his vote while former Hurriyat Conference leader Abdul Hussain Mosavi exercised his franchise for the first time as polling for Srinagar Lok Sabha seat was held yesterday amid tight security.