ஆப்கானில் அட்டூழியம்: தீவிரவாதிகள் திருமணம் செய்ய சிறுமிகள், விதவைகள் பட்டியல் கேட்கும் தலிபான்கள்

காபூல்: ஆப்கானிஸ்தானில் தலிபான்கள் கைகள் ஓங்கி வரும் நிலையில் தீவிரவாதிகளுக்கு கட்டாய திருமணம் செய்ய சிறுமிகள், விதவைகள் பட்டியல்களை கேட்டு மதகுருமார்களுக்கு கட்டளையிடப்பட்டுள்ளதாக தகவல்கள் வெளியாகி உள்ளன.

ஆப்கானிஸ்தானில் அமெரிக்கா தலைமையிலான நேட்டோ படைகள் பாதுகாப்பு பணியில் ஈடுபட்டிருந்தன. நேட்டோ படைகள் அந்நாட்டை விட்டு வெளியேற தொடங்கி இருந்ததும் அடங்கி இருந்த தலிபான்கள் தலையெடுக்க தொடங்கிவிட்டனர்.

ஆப்கான் ராணுவம் சரண்

ஆப்கானிஸ்தானின் பல பகுதிகள் இப்போது தலிபான்கள் வசமாகிவிட்டன. பல்லாயிரக்கணக்கான ஆப்கானிஸ்தான் ராணுவத்தினர் தலிபான்களிடம் எவ்வித எதிர்ப்பும் தெரிவிக்காமல் சரணடைகின்றனர். சில ஆயிரம் பேர் அண்டை நாடான தஜகிஸ்தானுக்கு தப்பி ஓடிவிட்டனர்.

சிறுமிகள் பட்டியல்

இந்நிலையில் ஆப்கானில் வாழும் அனைத்து மதகுருமார்களுக்கும் தலிபான்கள் கட்டளை ஒன்றை பிறப்பித்துள்ளனர். அதில் தங்கள் பகுதிகளில் வசிக்கும் 15 வயதுக்கும் மேற்பட்ட சிறுமிகள், விதவைகள் பட்டியலை அனுப்பி வைக்க உத்தரவிடப்பட்டுள்ளது.

மதமாற்றம் செய்து திருமணம்

தலிபான் தீவிரவாதிகளுக்கு கட்டாய திருமணம் செய்து வைக்கவே இந்த பட்டியல் கேட்கப்பட்டுள்ளதாம்; பிற மதங்களைச் சேர்ந்த சிறுமிகள், விதவைகள் பாகிஸ்தான் எல்லைப் பகுதிக்கு கொண்டு செல்லப்பட்டு மதமாற்றம் செய்யப்பட்டு பின் திருமணம் செய்து வைக்கப்படும் என்றும் தலிபான்கள் உத்தரவிட்டுள்ளனர்.

ஆண்கள், பெண்களுக்கு கட்டுப்பாடுகள்

அத்துடன் பெண்கள் இனிமேல் தனியாக வீதிகளில் நடமாடக் கூடாது; ஆண்களின் துணையுடன்தான் கடைவீதிகளுக்கு வரவேண்டும்; ஆண்கள் தாடியை ஷேவ் செய்வதற்கும் தலிபான்கள் தடை விதித்துள்ளனர். மதத்தின் பெயரால் தலிபான்கள் விதிக்கும் கட்டுப்பாடுகள் உலகம் முழுவதும் பெரும் அதிர்ச்சியை ஏற்படுத்தி வருகிறது.

English summary

After Nato Troops Exit from Afghan, Now Talibans ordered to submit list of girls, widows to be married Terrorists.