ஆமா.. அது என்ன 'ஹவுடி' மோடி? அர்த்தம் இதுதான் பாஸ்!

வாஷிங்டன்: அமெரிக்காவில் நேற்று இந்திய பிரதமர் நரேந்திர மோடி மற்றும் அந்நாட்டு அதிபர் டொனால்டு டிரம்ப் ஆகியோர் கூட்டாக இணைந்து பங்கேற்ற ஹவுடி மோடி நிகழ்ச்சி பெரும் வெற்றி பெற்றது.

இருப்பினும் ஹவுடி என்ற வார்த்தை இந்தியர்களுக்கு ரொம்பவே அறிமுகமில்லாத ஒரு வார்த்தை என்பது தான் உண்மை.

டெக்சாஸ் மாகாணத்தில் உள்ள ஹூஸ்டன் நகரில் இந்த நிகழ்ச்சி நடைபெற்றதால், ஒருவேளை ஆங்கிலத்தில் ஹூஸ்டன் என்ற வார்த்தையின் தொடக்கத்தை முன்வைத்து இவ்வாறு ஒரு பெயர் வந்து இருக்குமா? அல்லது வேறு ஏதேனும் காரணமா என்பது பற்றி பல்வேறு சந்தேகங்கள் மக்கள் மனதில் நிழலாடிக் கொண்டிருக்கின்றன.

இதில் ஒரு சுவாரசியமான பொருள் ஒளிந்து கொண்டு இருக்கிறது. அதாவது டெக்சாஸ் மற்றும் பிற தென்மேற்கு அமெரிக்க மாகாணங்களில் 'ஹவ் டு யூ டூ' என்ற ஆங்கில வார்த்தையின் சுருக்கம்தான் ஹவுடி என்ற சொல்வழக்கு.

சுமார், 50,000 அமெரிக்க வாழ் இந்தியர்கள் பங்கேற்ற இந்த கூட்டத்தில், பங்கேற்க வரும் நரேந்திர மோடியை பார்த்து, எப்படி இருக்கிறீர்கள்.. என்று பொருள்படும் வகையில் ஹவுடி என்ற பெயர் இதற்கு சூட்டப்பட்டது.

மோடி 2014 ஆம் ஆண்டு, முதன் முறையாக இந்திய பிரதமராக பதவிக்கு வந்தபிறகு, அமெரிக்காவில் பங்கேற்ற மூன்றாவது மிகப்பெரிய பொதுக்கூட்டம் ஹவுடி மோடி நிகழ்ச்சியாகும்.

முதல் கூட்டம் 2014ஆம் ஆண்டு நியூயார்க் நகரில் உள்ள மேடிசன் சதுக்கம் கார்டன் பகுதியில் நடைபெற்றது. இரண்டாவது கூட்டம், 2016ஆம் ஆண்டு சிலிக்கான் வேலியில் நடைபெற்றது.

English summary

What is the meaning of howdy in Howdy Modi? here is the detail.