126 மணி நேரம் இடைவிடாமல் நடனமாடி.. கின்னஸ் உலக சாதனை படைத்த இளம்பெண்!

126 மணிநேரம் இடைவிடாது நடனமாடி, நேபாள இளம்பெண் கின்னஸ் சாதனை படைத்துள்ளார்.

காத்மாண்டு: நேபாளத்தில் தொடர்ந்து 126 மணி நேரம் நடனமாடி இளம்பெண் ஒருவர் கின்னஸ் சாதனை புரிந்துள்ளார்.

நேபாளத்தைச் சேர்ந்தவர் பண்டனா நேபாள் (18) என்ற இளம்பெண். நடனம் மீது தீராக் காதல் கொண்ட இவர், அதிலேயே ஏதாவது கின்னஸ் சாதனை படைக்க வேண்டும் என முடிவு செய்தார்.

அதன்படி, தனி ஒருவராக தொடர்ந்து 126 மணி நேரங்கள் அவர் நடனமாடி உலக சாதனை புரிந்துள்ளார். நேபாள தலைநகர் காத்மாண்டுவில் வைத்து கடந்தாண்டு நவம்பர் மாதம் இச்சாதனையை அவர் செய்துள்ளார். இதற்கான அங்கீகார சான்றிதழை கின்னஸ் பிரதிநிதிகள் பண்டனாவிடம் தற்போது அளித்துள்ளனர்.

இதற்கு முன்னர் இந்தியாவைச் சேர்ந்த கலாமண்டலம் ஹேமலதா என்பவர் கடந்த 2011ம் ஆண்டு 123 மணி நேரம் 15 நிமிடங்கள் நடனம் ஆடி உலக சாதனை புரிந்திருந்தார். தற்போது அவரது சாதனையை பண்டனா நேபாள் முறியடித்துள்ளார்.

பண்டனாவின் இந்த சாதனை குறித்து கேள்விப்பட்ட நேபாள் பிரதமர் ஷர்மா ஒலி, அவரை தனது இல்லத்திற்கு நேரில் அழைத்து பரிசு தந்து, தனது வாழ்த்துக்களைத் தெரிவித்துள்ளார்.

நடனம் மட்டுமின்றி சமூகசேவையிலும் அதிக ஆர்வம் கொண்டவர் பண்டனா. இவர் பண்டனா நேபாள் பவுண்டேசன் என்ற பெயரில் அப்பகுதியில் உள்ள ஏழைப் பெண்களின் முன்னேற்றத்திற்கு உதவும் சமூக சேவையில் ஈடுபட்டு வருகிறார் என்பது குறிப்பிடத்தக்கது.

English summary

Nepal teenage dancing sensation Bandana Nepal set a new Guinness World Record on 'Longest Dancing Marathon by an Individual' by dancing continuously for 126 hours.