ஹவுடி மோடி நிகழ்ச்சியில் தேசிய கீதம் பாடிய ராப் இசை சிறுவன் ஸ்பார்ஷ் ஷா!

ஹூஸ்டன்: ஹவுடி மோடி நிகழ்ச்சியில் பிரதமர் மோடி, அமெரிக்க அதிபர் டொனால்ட் டிரம்ப் முன்பு தேசிய கீதத்தை 16 வயதான ரேப் இசை பாடகர் பாடியுள்ளார்.

அமெரிக்காவில் ஹவுடி மோடி நிகழ்ச்சிக்காக அமெரிக்காவுக்கு ஒரு வாரம் பயணம் மேற்கொண்டுள்ளார் பிரதமர் நரேந்திர மோடி. இதற்காக டெக்சாஸ் மாகாணத்தில் உள்ள ஹூஸ்டனுக்கு வந்தார்.

ஹூஸ்டன் விமான நிலையத்தில் இந்தியா, அமெரிக்காவை சேர்ந்த அதிகாரிகள் மோடிக்கு சிவப்பு கம்பள வரவேற்பு அளித்தனர். இந்த நிலையில் ஹூஸ்டனில் என்ஆர்ஜி ஸ்டேடியத்தில் 50 ஆயிரம் இந்தியர்கள் கலந்து கொண்ட ஹவுடி மோடி நிகழ்ச்சி நடைபெற்றது.

தேசிய கீதம்

டெக்சாஸ் உள்ளிட்ட மாகாணங்களில் எப்படி இருக்கிறீர்கள் (How do you do?) என்பதன் சுருக்கமே ஹவுடியாகும். இந்த கூட்டத்தில் இந்திய வம்சாவளியை சேர்ந்த 16 வயது ராப் பாடகர் ஸ்பார்ஷ் ஷா கலந்து கொண்டு தேசிய கீதத்தை மோடி, டிரம்ப் முன்பு பாடினார்.

கனவு நனவு

16 வயதான ஷா ஒரு வகை எலும்பு தொடர்பான அரிய வகை நோயினால் அவதிப்பட்டு வருகிறார். இவர் நியூ ஜெர்சியில் வசித்து வருகிறார். ராப் பாடகரான இவர் பாடலாசிரியர், உத்வேகமளிக்கும் பேச்சாளர் ஆவார். நீண்ட நாட்களாக மோடியை சந்திக்க விரும்பிய இவரது கனவு ஞாயிற்றுக்கிழமை நனவானது.

முதல் முறை

இதுகுறித்து அவர் கூறுகையில் ஏராளமானோர் முன்னிலையில் நான் தேசிய கீதம் பாடியது பெரிய விஷயமாகும். அதை பாடும் போது நான் மகிழ்ச்சி அடைந்தேன். மடிசன் ஸ்கொயர் கார்டனில் முதல் முறையாக மோடியை பார்த்தவுடன் அவரை சந்திக்க விரும்பினேன்.

400 பாடகர்கள்

எனினும் அவரை டிவியில் மட்டுமே பார்த்தேன். கடவுள் கிருபையால் அவரை சந்தித்து அவர் முன் நான் தேசிய கீதம் பாடும் வாய்ப்பு கிடைத்தது என்றார். தேசிய கீதம் பாடிய 400 பாடகர்களில் ஸ்பார்ஷும் ஒருவர்.

English summary

Teenage Rapper Sparsh Shah sings National Anthem in front of PM Narendra Modi and US President Donald Trump in Howdy Modi programme.