மிக மோசமான பாதிப்பு..இந்திய கொரோனா வகையை 'கவலையளிக்கும் கொரோனா' வகையாக பட்டியலிட்ட உலக சுகாதார மையம்

Updated: Tuesday, May 11, 2021, 21:09 [IST]

Subscribe to Oneindia Tamil

ஜெனீவா: இந்தியாவில் வேகமாகப் பரவி வரும் B.1.617 என்ற உருமாறிய கொரோனா வகையைக் கவலையளிக்கும் கொரோனா வகை என தற்போது உலக சுகாதார அமைப்பு பட்டியலிட்டுள்ளது.

B.1.617 கொரோனா வகை

இந்த B.1.617 கொரோனா வகையை இத்தனை காலம் உலக சுகாதார அமைப்பு 'கவனிக்கப்பட வேண்டிய கொரோனா வகை' என பட்டியலிட்டிருந்தது. இந்நிலையில், இந்த கொரோனா வகை வேகமாகப் பரவுவதை உறுதி செய்யும் வகையில் சில சான்றுகள் இருப்பதால் இதனைக் கவலையளிக்கும் கொரோனா வகை எனப் பட்டியலிடுவதாக உலக சுகாதார அமைப்பின் மரியா வான் கெர்கோவ் தெரிவித்தார்.

கவலையளிக்கும் கொரோனா கவலை

இது குறித்து மரியா வான் கெர்கோவ் கூறுகையில், தற்போதுள்ள தரவுகள் B.1.617 கொரோனா வகை வேகமாகப் பரவுவதைக் காட்டுகின்றது. மேலும் ஒருவரது உடலில் தோன்றும் ஆன்டிபாடிகளையும் இதை அழிக்க வாய்ப்புள்ளது. இந்தியாவில் கண்டறியப்பட்டுள்ள இந்த உருமாறிய கொரோனாவால் சர்வதேச அளவில் பெரிய பாதிப்பு ஏற்படக்கூடும். எனவே, இதனைக் கவலையளிக்கும் கொரோனா வகை என பட்டியலிடுகிறோம் என்று அவர் தெரிவித்தார்.

எப்படி வகைப்படுத்தப்படுகிறது

ஏற்கனவே பிரிட்டன், அமெரிக்கா ஆகிய நாடுகளின் ஆராய்ச்சியாளர்கள் B.1.617 வகையைக் கவலையளிக்கும் கொரோனா வகை என்றே குறிப்பிட்டு வருகின்றனர். சீனாவில் 2019இல் பரவ தொடங்கிய கொரோனாவை விட அதிகப்படியான பாதிப்புகளை ஏற்படுத்தும் கொரோனா வகையை உலக சுகாதார அமைப்பு கவலையளிக்கும் வகை எனப் பட்டியலிடும். அதேபோல தடுப்பூசிகளில் இருந்து தப்ப வாய்ப்புள்ள கொரோனா வகைகளும் கவலையளிக்கும் கொரோனா எனப் பட்டியலிடப்படும்.

தடுப்பூசிக்குக் கட்டுப்படுமா

அதேநேரம் இந்தியாவில் தற்போது வேகமாகப் பரவி வரும் B.1.617 கொரோனா வகை தடுப்பூசிகளுக்குக் கட்டுப்படாது என்பதை உறுதி செய்யும் தரவுகள் எதுவும் இல்லை என்றும் மரியா வான் கெர்கோவ் தெரிவித்தார். இதுவரை பிரிட்டன், பிரேசில் மற்றும் தென்னாப்பிரிக்கா ஆகிய நாடுகளில் கண்டறியப்பட்ட உருமாறிய கொரோனாவை உலக சுகாதார அமைப்பு கவலையளிக்கும் கொரோனா வகை என பட்டியலிட்டுள்ளது குறிப்பிடத்தக்கது.