மோடி ஆட்சியமைந்த பிறகு.. 8 வருடங்களில் இந்தியா வியத்தகு அளவில் வளர்ந்துவிட்டது- எல்.முருகன் பேட்டி

Updated: Saturday, June 11, 2022, 21:42 [IST]

Subscribe to Oneindia Tamil

கிருஷ்ணகிரி: இந்தியா 8 ஆண்டுகள் வியக்கத்தக்க அளவில் வளர்ச்சி அடைந்துள்ளது. மேலும் தொடர்ந்து முன்னேறி வருகிறது. இதனால் நாடு முழுவதும் மத்திய அரசின் 8 ஆண்டு சாதனை சிறப்பாக கொண்டாடப்பட்டு வருகிறது என மத்திய இணை அமைச்சர் எல் முருகன் பெருமையாக கூறினார்.

கிருஷ்ணகிரி மாவட்டம் ஓசூர் அருகே மத்திகிரியில் ஆசியாவின் மிகப்பெரிய கால்நடை பண்ணை உள்ளது. இந்த பண்ணையை மத்திய தகவல் ஒலிபரப்புத்துறை இணை அமைச்சர் எல் முருகன் நேற்று பார்வையிட்டார்.

அதன்பிறகு அவர் நிருபர்களை சந்தித்தார். மத்திய அரசின் திட்டங்கள், சாதனை பற்றி அவர் எடுத்து கூறினார். இதுபற்றி அவர் கூறியதாவது:

டிஜிட்டல் இந்தியா திட்டம்

இந்தியா முழுவதும் மத்திய அரசின் 8 ஆண்டு சாதனைகள் சிறப்பாக கொண்டாடப்பட்டு வருகிறது. டிஜிட்டல் இந்தியா திட்டத்தின் கீழ் அரசின் நலத்திட்டங்கள் இடைத் தரகர்களின் தலையீடு இன்றி மக்களை சென்று சேர்ந்துள்ளன. டிஜிட்டல் பணப்பரிவர்த்தனையில் இந்தியா முன்னனியில் உள்ளது.

வங்கி கணக்கில்

ஏழை மக்கள் பயன்பெறும் வகையில், ஜன் தன் வங்கிக் கணக்கு, விவசாயிகள் கெளரவ நிதி, இலவச எரிவாயு இணைப்பு, சுகாதாரமான குடிநீர், கழிப்பிடங்கள், 5 லட்சம் ரூபாய் மதிப்பில் ஆயுஷ்மான் பாரத் காப்பீடு உள்ளிட்ட பல்வேறு திட்டத்தை மத்திய அரசு செயல்படுத்தி வருகிறது. இது வெளிப்படையான மற்றும் ஊழலற்ற நிர்வாகத்தை எடுத்துக்காட்டும் வகையில் உள்ளது.

மீன்வளத்துறை அமைச்சகம்

நாட்டில் கப்பல் போக்குவரத்து, விண்வெளி என அனைத்து துறைகளின் வளர்ச்சிக்கு முக்கியத்துவம் கொடுக்கப்பட்டு வருகிறது. 2014க்கு பிறகுதான் மீன் வளத்துறைக்கென்று தனி அமைச்சகம் உருவாக்கப்பட்டது. 2022 ஆம் ஆண்டு வரை கிட்டத்தட்ட ரூ. 32 ஆயிரம் கோடி இந்தத் துறைக்கு ஒதுக்கீடு செய்யப்பட்டுள்ளது. சென்னை காசிமேடு துறைமுகத்தை உலக அளவில் நவீனப்படுத்தும் பணிகள் நடந்து வருகிறது. வல்லமை மிக்க திட்டத்துடன் மத்திய அரசு செயல்பட்டு வருகிறது.

50 சதவீத மானிய திட்டம்

சென்னை காசிமேடு ஹார்பரை உலக அளவுக்கு நவீனப்படுத்தும் வகையில் விவசாயிகள், இளைஞர்கள், தொழில் முனைவோர்களாக மாற வேண்டும்.இதற்காக கிட்டத்தட்ட 50 சதவீத மானியத்தோடு ஆடு, கோழி, பன்றி, மடு வளர்ப்பு என பல வாய்ப்புகளை மத்திய அரசு வழங்குகிறது. ஒட்டுமொத்தமாக இந்த நாடு கடந்த 8 ஆண்டுகளில் வியக்கத்தக்க வளர்ச்சி பெற்று மேலும் முன்னேறி வருகிறது'' என்றார்.