வினையான திருடன்-போலீஸ் விளையாட்டு.. துப்பாக்கியால் சுட்ட பாஜக பிரமுகரின் மகன்.. 11 வயது சிறுவன் பலி

லக்னோ: உத்தர பிரதேசம் மாநிலத்தில் திருடன் போலீஸ் விளையாட்டின்போது பாஜக மாவட்ட பொதுச்செயலாளரின் மகன் பொம்மை துப்பாக்கி என நினைத்து உண்மையான கைத்துப்பாக்கியால் சுட்டதில் 11 வயது சிறுவன் குண்டு பாய்ந்து இறந்தது பெரும் சோகத்தை ஏற்படுத்தி உள்ளது.

வீட்டில் குழந்தைகள், சிறுவர்-சிறுமிகள் இருக்கும்போது அவர்களின் கைகளுக்கு கிடைக்கும் வகையில் கத்தி, அரிவாள் உள்ளிட்ட கூரிய ஆயுதங்கள் மட்டுமின்றி லைசென்ஸ் துப்பாக்கி உள்ளிட்ட ஆபத்தான பொருட்களை வைக்கக்கூடாது. இருப்பினும் சில வீடுகளில் பெற்றோர்கள் அலட்சியமாக செயல்படுகின்றனர்.

இதனால் தங்களின் குழந்தைகள் தேவையில்லாத பிரச்சனைகளில் சிக்க வாய்ப்புள்ளது. இந்த நிலையில் தான் உத்தர பிரதேசத்தில் லைசென்ஸ் கைத்துப்பாக்கியை சிறுவனின் கைக்கு கிடைக்கும்படி பாஜக தலைவர் வைத்த நிலையில் அது ஒரு சிறுவனின் உயிரை பறித்துள்ளது. இந்த சோக சம்பவம் பற்றிய விபரம் வருமாறு:

பாஜக பொதுச்செயலாளரின் மகன்

உத்தரபிரதேச மாநிலம் குஷாம்பி அருகே கராரி பகுதியை சேர்ந்தவர் சஞ்சய் ஜெய்ஸ்வால். இவர் பாஜக மாவட்ட பொதுச்செயலாளராக செயல்பட்டு வருகிறார். இவருக்கு 10 வயதில் மகன் உள்ளார். இவர் தனியார் பள்ளியில் படித்து வருகிறார். இந்நிலையில் நேற்று மாலையில் அவரது மகன் பக்கத்து வீட்டில் வசிக்கும் சிறுவர்களுடன் சேர்ந்து விளையாடினார்.

திருடன் போலீஸ் விளையாட்டு

சிறுவர்கள் அனைவரும் இணைந்து 'திருடன் போலீஸ்' விளையாட்டு விளையாடினர். இந்த வேளையில் வீட்டுக்கு சென்ற சஞ்சயின் மகன் வீட்டுக்கு சென்று தந்தையின் பாதுகாப்புக்காக வாங்கி வைத்திருந்த லைசென்ஸ் கைத்துப்பாக்கியை எடுத்துள்ளார். இதனை வீட்டில் இருந்தவர்கள், விளையாடிய சிறுவர்கள் மற்றும் அக்கம்பக்கத்து வீட்டில் வசிப்பவர்கள் யாரும் கவனிக்கவில்லை. இந்த வேளையில் திருடன் போலீஸ் விளையாட்டின்போது அந்த துப்பாக்கியை வைத்து சுடுவது போல் சஞ்சயின் மகன் ஆக் ஷன் செய்தான்.

குண்டு பாய்ந்து இறந்த சிறுவன்

அப்போது எதிர்பாராத விதமாக துப்பாக்கி திடீரென்று சுட்டது. இதனால் துப்பாக்கியில் இருந்து வெளியேறிய குண்டு பக்கத்து வீட்டில் வசித்து வரும் வேதாந்தா (11) என்ற சிறுவன் மீது பாய்ந்தது. இதில் குண்டு பாய்ந்த சிறுவன் சரிந்து விழுந்து உயிருக்கு போராடினார். வேதாந்தாவை மீட்டு அருகே உள்ள மருத்துவமனையில் அனுமதித்தனர். இருப்பினும் அவர் பரிதாபமாக இறந்தார்.

பொம்மை துப்பாக்கி என நினைத்து..

இதுபற்றி போலீசார் விசாரணையை துவங்கி உள்ளனர். முதற்கட்ட விசாரணையில் பொம்மை துப்பாக்கி என நினைத்து தான் சஞ்சயின் மகன் அதனை எடுத்து சுட்டதும், தோட்டா லோட் செய்யப்பட்ட நிலையில் துப்பாக்கியில் இருந்து குண்டு பாய்ந்து சிறுவன் இறந்ததும் தெரியவந்தது. இந்த சம்பவம் தொடர்பாக வழக்குப்பதிவு செய்த போலீசார் விசாரணை நடத்தி வருகின்றனர்.

English summary

An 11-year-old boy was shot dead in Uttar Pradesh when the son of the district general secretary of the BJP fired a real pistol, mistaking it for a toy gun during a thief police game.