சமாஜ்வாதி கூட்டணியில் விரிசல்.. என்ன செய்யப்போகிறார் அகிலேஷ் யாதவ்? அடுத்தடுத்த திருப்பங்கள்

By Logi

Published: Friday, February 4, 2022, 18:52 [IST]

Subscribe to Oneindia Tamil

லக்னோ: உத்தரப்பிரதேச தேர்தல் தேதி நெருங்கிவரும் நிலையில், சமாஜ்வாதி கூட்டணியில் இருக்கும் அப்னா தளத்துக்கும், சமாஜ்வாதி கட்சிக்கும் இடையே விரிசல் ஏற்பட்டிருக்கிறது.

உத்தரப்பிரதேசம், பஞ்சாப், உத்தரகண்ட், மணிப்பூர், கோவா ஆகிய 5 மாநிலங்களுக்கான தேர்தல் தேதிகள் விரைவில் நடைபெறவுள்ளன. இதற்கான வேலைகளை அனைத்து மாநில கட்சிகளும் துரிதமாக செயல்படுத்தி வருகின்றன.

உத்தரப்பிரதேசத்தில் 403 தொகுதிகளுக்குமான சட்டசபைத் தேர்தல் வரும் பிப்ரவரி 10-ஆம் தேதி முதல் மாா்ச் 7-ஆம் தேதி வரை 7 கட்டங்களாக நடைபெறவுள்ளது. மார்ச் 10ம் தேதி வாக்கு எண்ணிக்கை நடைபெறுகிறது.

உத்தரப்பிரதேசம்

உத்தரப்பிரதேசத்தில் ஆளும் பாஜக, சமாஜ்வாதி கட்சி, காங்கிரஸ், பகுஜன் சமாஜ் கட்சிகள் நான்கு முனை போட்டி நிலவுகிறது. உத்தரப்பிரதேசத்தில் கடந்த முறை ஆட்சியில் இருந்த சமாஜ்வாதி கட்சிக்கும் தற்போது ஆட்சியில் இருக்கும் பாஜக-வுக்கும் தான் நேரடி போட்டி நிலவுகிறது. கருத்துக்கணிப்புகள் பாஜக தான் மீண்டும் ஆட்சியைப் பிடிக்கும் என்று தெரிவித்துள்ளன. இதனால் பாஜக இன்னும் துரிதமாக பிரசாரத்தை முன்னெடுத்துள்ளன.

சமாஜ்வாதி கட்சி

ஆனால் பாஜகவுக்கு சமாஜ்வாதி கட்சி தொடர் போட்டியைக் கொடுத்து வருகிறது. சமாஜ்வாதி கட்சி கடந்த தேர்தலில் பாஜக-விடம் தோல்வியைத் தழுவியது. அதற்கு முன் நடந்த சட்டசபைத் தேர்தலில் சமாஜ்வாதி கட்சி மிகப்பெரிய வெற்றியைப் பெற்றது. குடும்ப கட்சி, ஜாதி அரசியல் உள்ளிட்ட பிரச்சனைகளால் கடந்த தேர்தலில் சமாஜ்வாதி தோற்றது.

அகிலேஷ் யாதவ்

கடந்த தேர்தலில் செய்த தவறுகளை மாற்றிக்கொண்டு, இந்த தேர்தலில் குடும்பத்தினருக்கு அதிக இடம் கொடுக்காமல் பார்த்துக்கொண்டார் அகிலேஷ் யாதவ். அதே சமயம் பாஜக-வில் இருந்த பல ஒபிசி தலைவர்களை சமாஜ்வாதிக்கு அழைத்து வந்தார் அகிலேஷ் யாதவ். இது பாஜகவுக்கு மிகப்பெரிய நெருக்கடியாக அமைந்தது.

கூட்டணி

பாஜக தலைமையிலான கூட்டணியில் அங்கம் வகிக்கும் முக்கிய கட்சியாக அனுப்பிரியா படேலின் அப்னா தளம் விளங்குகிறது. இதிலிருந்து பிரிந்துவந்த அனுப்பிரியாவின் தாயார் கிருஷ்ணா படேல் அப்னா தளம் (கமரவாடி) என்ற கட்சியை நடத்திவருகிறார். உத்தரப்பிரதேச தேர்தல் நடைபெறுவதற்கு ஒரு வாரம் கூட இல்லாத நிலையில், சமாஜ்வாதி தலைமையிலான கூட்டணியில் முக்கிய கட்சியாக கருதப்படும் அப்னா தளத்தால்(கமராவடி) சிக்கல் நிலவி வருகிறது. கூட்டணியில் தொடருமா அல்லது வெளியேறுமா என்பது இன்று அகிலேஷ் யாதவுடன் நடைபெறும் பேச்சுவார்த்தைக்கு பிறகுதான் தெரியவரும்.

போட்டி

உத்தரப்பிரதேச துணை முதல்வர் கேசவ பிரசாத் மெளரியா போட்டியிடும் சிரத்து தொகுதியில், சமாஜ்வாதி சார்பாக பல்லவி படேல் களமிறங்கியுள்ளார். இந்த அறிவிப்பு அந்தத் தொகுதியில் இருக்கும் சமாஜ்வாதி கட்சியினருக்குப் பிடிக்கவில்லை. அவர் எந்த கட்சி சின்னத்தில் போட்டியிடுவார் என்று இன்னும் தெளிவு கிடைக்கவில்லை. இதன் காரணமாக, பல்லவி படேல் அதிருப்தியில் இருப்பதாக தகவல் வெளியாகியுள்ளது. அதேபோல, பாஜகவின் துணை முதல்வருக்கு எதிராக போட்டியிடுவதை அவர் விரும்பவில்லை.

Published On February 4, 2022