உ.பி. தேர்தல்.. இந்த ஒரு எக்ஸிட் போல்தான் ரிசல்ட்டை துல்லியமாக கணித்துள்ளது.. நீங்களே பாருங்கள்!

By Logi

Updated: Friday, March 11, 2022, 17:05 [IST]

Subscribe to Oneindia Tamil

லக்னோ: உத்தரப்பிரதேசத்தில் பாஜக மீண்டும் ஆட்சியைப் பிடிக்கிறது. தேர்தல் முடிவுகளுடன், மேட்ரிக்ஸ் நிறுவனம் வெளியிட்டுள்ள கருத்துக் கணிப்பு ஒத்துப்போகிறது.

உத்தரப்பிரதேசம், பஞ்சாப், மணிப்பூர், கோவா, உத்தரகாண்ட் என ஐந்து மாநிலத்துக்கும் தேர்தல் நடந்து, நேற்று அதன் முடிவுகள் வெளியாகின.

பஞ்சாப் மாநிலத்தில் ஆம் ஆத்மியும், மற்ற நான்கு மாநிலங்களிலும் பாஜகவும் ஆட்சியைப் பிடித்தன. உத்தரப்பிரதேசத்தில் யோகி அரசு மீண்டும் ஆட்சிக்கு வருகிறது.

தேர்தலுக்கு முந்தைய கருத்துக்கணிப்பு

உத்தரப்பிரதேசத்தில் பாஜக ஆட்சியைப் பிடித்துள்ளது. அங்கு பாஜக தான் ஆட்சியைப் பிடிக்கும் என தேர்தலுக்கு முன்பே பல கருத்துக்கணிப்புகள் வெளியானது. ரிபப்ளிக் டிவி நடத்திய தேர்தலுக்கு முந்தைய கருத்துக்கணிப்பில் பாஜக 283 இடத்தையும், சமாஜ்வாதி 62 இடத்தையும் பெறும் என கணித்திருந்தது. ஏபிபி சி -வோட்டர் நடத்திய கருத்துக்கணிப்பில் பாஜக 263 இடத்தையும், சமாஜ்வாதி 113 இடத்தையும் பெறும் என கணித்திருந்தது. ஜீ டிவி நடத்திய தேர்தலுக்கு முந்தைய கருத்துக்கணிப்பில் பாஜக 255 இடத்தையும், சமாஜ்வாதி 199 இடத்தையும் பெறும் என கணித்திருந்தது.

எக்ஸிட் போல்

உத்தரப்பிரதேசத்தில் 7 கட்டங்களாக தேர்தல் நடந்தது. 7வது கட்ட தேர்தல் முடிவடைந்ததும், உத்தரப்பிரதேச தேர்தல் எக்ஸிட் போல் முடிவுகள் வெளியாகின. கிட்டத்தட்ட பத்துக்கும் மேற்பட்ட நிறுவனங்கள் தேர்தலுக்குப் பிந்தைய‌ கருத்துக்கணிப்புகள் வெளியாகின. அதில், நியூஸ் எக்ஸ் கருத்துக்கணிப்பில் பாஜக 218, சமாஜ்வாதி 153 இடங்கள் பெறும் என கணிக்கப்பட்டது. டைம்ஸ் நவ் பாஜக 225, சமாஜ்வாதி 151 எனவும், ஜீ நியூஸ் 235, சமாஜ்வாதி 147 என்றும், ஏபிபி கருத்துக்கணிப்பில் பாஜக 236, சமாஜ்வாதி 140 என்றும் கணித்தது.

கருத்துக்கணிப்பு

இந்தியா டுடேவில் பாஜக 307, சமாஜ்வாதி 86 இடமும் பெறும் என கணித்தது. ரிபப்ளிக் டிவி பாஜக 240, சமாஜ்வாதி 140 எனவும் கூறியது. சாணக்யா டுடே பாஜக 294, சமாஜ்வாதி 105, ஜான்கி பாத் பாஜக 241, சமாஜ்வாதி 150 என்று கருத்து கணிப்பு வெளியிட்டது. மேட்ரிஸ் கருத்துக்கணிப்பில் பாஜக 269, சமாஜ்வாதி 126 என்றது, இடிஜி ரிசர்ச் பாஜக 237, சமாஜ்வாதி 157 என்று கருத்துக் கணிப்பு வெளியிட்டது.

தேர்தல் முடிவுகள்

நடந்து முடிந்துள்ள சட்டசபைத் தேர்தலில் பாஜக 273 இடத்திலும், சமாஜ்வாதி கட்சி 125 இடத்திலும் வெற்றி பெற்றுள்ளது. தேர்தலுக்கு பிந்தைய கருத்துக் கணிப்பின்படி மேட்ரிக்ஸ் கருத்துக்கணிப்பு தேர்தல் முடிவுகளுடன் ஒத்துவருகிறது. மேட்ரிஸ் கருத்துக்கணிப்பில் பாஜக 269, சமாஜ்வாதி 126 இடங்களைப் பெறும் என கூறியது. ஆனால் அனைத்து கருத்துகணிப்புகளும் பாஜக தான் ஆட்சியைப் பிடிக்கும் என்றது, அதே போல் பாஜக இரண்டாவது முறையாக தொடர்ந்து ஆட்சியைப் பிடித்துள்ளது.