விஜய் இந்த தேர்தலில் ஆட்டக்காரர் தான்.. மே 4 தவெகவுக்கு பல பாடங்களை கற்பிக்கும்.. இயக்குநர் அமீர்!

Updated: Thursday, April 9, 2026, 10:49 [IST]

Subscribe to Oneindia Tamil

மதுரை: தவெக தலைவர் விஜய் இந்த தேர்தலில் ஆட்டக்காரர் தான் என்று இயக்குநர் அமீர் கூறியுள்ளார். இந்த சட்டசபைத் தேர்தல் விஜய்க்கு நிறைய பாடங்களை கற்றுக் கொடுக்கும் என்று கூறியுள்ள அமீர், திமுக மீதான வெறுப்பு மட்டும் அரசியல் ஆகாது என்றும், திமுகவை தீய சக்தி என்று சொல்லிவிட்டால், அது தீய சக்தியாக மாறாது என்றும் தெரிவித்துள்ளார்.

சட்டசபைத் தேர்தலுக்கு இன்னும் 13 நாட்கள் மட்டுமே உள்ளது. தவெக தலைவர் விஜய் நேற்று தமிழ்நாட்டில் பிரச்சாரத்தை தொடங்கி இருக்கும் நிலையில், தவெகவினர் உற்சாகம் அடைந்துள்ளனர். ஆளும் கட்சியான திமுகவை தொடர்ச்சியாக விஜய் அட்டாக் செய்து வருகிறார். அதேபோல் பாஜகவை மென்மையான போக்குடன் அணுகி வருகிறார்.

இருந்தாலும் விஜய்க்கு இளைஞர்கள் மற்றும் இளம் பெண்கள் ஆதரவு அதிகளவில் இருக்கிறது. ஒவ்வொரு தொகுதியிலும் இளைஞர்கள் மற்றும் முதல் தலைமுறை வாக்குகளை விஜய் அறுவடை செய்வார் என்று பார்க்கப்படுகிறது. இந்த நிலையில் விஜய்யின் அரசியல் தொடர்பாக இயக்குநர் அமீர் பேசுகையில், நாம் எல்லாவற்றையும் மிகைப்படுத்துகிறோம். அதையே விஜய்யும் நம்புகிறார்.

விஜய் அரசியலுக்கு வந்ததை வரவேற்கிறேன். அவர் பின் மிகப்பெரிய அளவில் ரசிகர்கள் திரள்கிறார்கள். அந்த இளைஞர்கள் சக்தியை விஜய் சரியான வழியில் பயன்படுத்த வேண்டும். ஆனால் விஜய் இதுவரை அப்படி எதையும் செய்யவில்லை. இந்த சட்டசபைத் தேர்தலில் விஜய் ஆட்டக்காரர் தான். அதனை ஏற்க எந்த தயக்கமும் இல்லை.

ஆனால் விஜய்யுடன் இருக்கும் அரசியல்வாதிகள் அவரை சரியான வழியில் அழைத்து செல்லவில்லை. தமிழ்நாட்டிற்கான தேவை என்ன? அவர் எந்த வழியில் செல்லப் போகிறார்? அவருக்கு பின் இருக்கும் இளைஞர்களை எப்படி வழிநடத்த போகிறார்? அவர்களை அரசியல்மயப்படுத்துவது எப்படி என்ற எந்த திட்டமும் அவரிடம் இல்லை. இருந்தாலும் எந்த சிந்தனையும் இல்லாமல் ஒரு கூட்டம் அவர் பின்னால் இருக்கிறது.

அதுதான் மிகப்பெரிய கொடுமை. விஜய்யின் குரலுக்கும், பார்வைக்கும் அந்த கூட்டம் கட்டுப்படுகிறது. ஆனால் அவர்களை அரசியல்மயப்படுத்த எந்த யோசனையும் விஜய்யிடம் இல்லை. தவெகவில் 2ஆம் கட்ட தலைவர்களே இல்லை. விஜய்யை காட்சிப்பொருளாக மட்டுமே பார்க்கிறார்கள். திமுக மீதான வெறுப்பு மட்டுமே அரசியல் ஆகாது.

தீய சக்தி திமுக என்று சொல்லிவிட்டால், அது தீய சக்தியாக ஆகாது. விஜய் இந்த தேர்தலுக்கு பின் நிறையப் பாடம் கற்றுக் கொள்வார். அவரின் கட்சியில் மாற்றங்கள் வரும். உதயநிதியிடம் தொடக்கத்தில் இருந்ததை விட நிறைய பக்குவமும், முதிர்ச்சியும் வந்திருக்கிறது. இப்போது உதயநிதியை கடந்து அந்தக் கட்சிக்கு அடுத்த தலைமைக்கு வேறு மாற்றே இல்லை.

இதனை வாரிசு அரசியலில் சுருக்கிட முடியாது. விஜய்யால் சலசலப்பை மட்டுமே உண்டாக்க முடிகிறது. விஜய்க்கு அனைத்து தரப்பிலும் ஆதரவு இருக்கிறது. ஆனால் அதனை அரசியலில் மிகப்பெரிய சக்தியாக மாற்ற முடியுமா என்பதை தேர்தல் முடிவுகளில் தான் தெரியும் என்று கூறியுள்ளார்.