குடிசைகள் இல்லாத நகரமாக மாறும் மும்பை.. 2030 தான் டார்கெட்! ஏக்நாத் ஷிண்டே அறிவிப்பு

மும்பை: 2030-ஆம் ஆண்டிற்குள் மும்பை நகரை முற்றிலுமாக குடிசைகள் இல்லாத நகராக மாற்றுவது குறித்து மகாராஷ்டிர அரசு பிரம்மாண்ட லட்சியத் திட்டத்தை அறிவித்திருக்கிறது. மகாராஷ்டிரா மாநில துணை முதல்வர் ஏக்நாத் ஷிண்டே இந்த அறிவிப்பை வெளியிட்டிருக்கிறார்.

மகாராஷ்டிர உள்கட்டமைப்பு மாநாட்டில் (Infrastructure Conclave) மாநில அரசு வெளியிட்டுள்ள இந்த அதிரடித் திட்டத்தின் முக்கியப் புள்ளிகள் இதோ:

2030 இலக்கு மற்றும் 15 லட்சம் வீடுகள்:

மும்பை மாநகரப் பகுதியில் உள்ள ஒட்டுமொத்த குடிசைகளையும் அகற்றிவிட்டு, அங்குள்ள மக்களுக்கு நவீன வசதிகளுடன் கூடிய 15 லட்சம் மறுவாழ்வு வீடுகளை கட்டி முடிக்க அரசு இலக்கு நிர்ணயித்துள்ளது.

மும்பையின் இந்த மிகப்பெரிய மாற்றத்திற்கு 'தானே கிளஸ்டர் மாதிரி' பயன்படுத்தப்பட உள்ளது. இதன் அர்த்தம் தனித்தனி கட்டிடங்களாகவோ அல்லது சிறிய குடிசை பகுதிகளாகவோ தனித்தனியாகப் பிரித்து மேம்படுத்தாமல், ஒட்டுமொத்தப் பகுதியையும் ஒரே பெரிய தொகுப்பாக எடுத்துக்கொண்டு அரசாங்கம் மறுவடிவமைப்பு செய்யும். இதற்காக மும்பை பெருநகரப் பகுதி முழுவதும் 19 கிளஸ்டர் மறுமேம்பாட்டு மண்டலங்கள் ஏற்கனவே கண்டறியப்பட்டுள்ளன.

தாராவி மறுசீரமைப்பு மற்றும் 300 ஹெக்டேர் திறந்தவெளி:

ஆசியாவின் மிகப்பெரிய குடிசைப் பகுதியான தாராவியில் மட்டும் சுமார் 1.5 லட்சம் நவீன மறுவாழ்வு வீடுகள் கட்டப்பட முன்மொழியப்பட்டுள்ளது. இந்த பிரம்மாண்ட திட்டத்தின் மூலம், பந்தய மைதானங்கள் மற்றும் உலாப் பாதைகள் (Promenade) போன்ற நவீன உள்கட்டமைப்புகள் உருவாக்கப்பட்டு, மும்பை நகரத்திற்கு கூடுதலாக 300 ஹெக்டேர் பரப்பளவிலான திறந்தவெளிகள் (Open Spaces/பூங்காக்கள்) பொதுமக்களின் பயன்பாட்டிற்குக் கிடைக்கும்.

அனுமதிகளில் அதிரடி மாற்றம்

திட்டங்களை மிக வேகமாகச் செயல்படுத்தும் நோக்கில் அரசு சில முக்கிய விதிமுறைகளை மாற்றியுள்ளது. இதற்கு முன்பு, குடிசைகளை மறுசீரமைப்பு செய்ய அங்கு வாழும் மக்களின் தனிப்பட்ட ஒப்புதல் தேவைப்பட்டது. இதனால் திட்டங்கள் பல ஆண்டுகள் தாமதமாயின.

ஆனால், புதிய கொள்கையின்படி பொதுமக்கள் நலன் கருதி மக்களின் தனிப்பட்ட ஒப்புதல் பெற வேண்டிய கட்டாயம் நீக்கப்பட்டுள்ளது. மேலும், அரசு அமைப்புகளிடம் இருந்து பெற வேண்டிய தடையில்லாச் சான்றிதழ்களும் எளிமையாக்கப்பட்டுள்ளன.

English summary

The Government of Maharashtra has announced an ambitious plan to transform Mumbai into a completely slum-free city by the year 2030. Maharashtra Deputy Chief Minister Eknath Shinde made this announcement.