இதுதான் விராட் கோலி.. 37 வயதிலும் ஆரஞ்ச் கேப் வென்ற கிங்.. சொந்த கையில் சூனியம் வைத்து கொண்ட குஜராத்

பெங்களூர்: குஜராத் அணிக்கு எதிரான போட்டியில் ஆர்சிபி அணியின் நட்சத்திர வீரர் விராட் கோலி 44 பந்துகளில் 4 சிக்ஸ், 8 பவுண்டரி உட்பட 81 ரன்களை விளாசி தள்ளினார். இதன் மூலமாக இந்த ஐபிஎல் தொடரில் அதிக ரன்களை விளாசிய வீரர்கள் பட்டியலில் முதலிடம் பிடித்த விராட் கோலி, ஆரஞ்ச் கேப்பையும் வென்று அசத்தி இருக்கிறார்.

ஐபிஎல் தொடரின் 34வது லீக் போட்டியில் குஜராத் அணியை எதிர்த்து ஆர்சிபி அணி விளையாடியது. இந்தப் போட்டியில் முதலில் பேட்டிங் ஆடிய குஜராத் அணி 20 ஓவர்களில் 3 விக்கெட்டுகள் இழப்பிற்கு 205 ரன்களை விளாசியது. தொடக்க வீரர் சாய் சுதர்சன் 58 பந்துகளில் 5 சிக்ஸ், 11 பவுண்டரிகள் உட்பட 100 ரன்களை எடுத்தார்.

இதன்பின் களமிறங்கிய ஆர்சிபி அணி 18.5 ஓவர்களில் 5 விக்கெட்டுகள் இழப்பிற்கு 206 ரன்களை எடுத்து வெற்றி பெற்றது. சிறப்பாக ஆடிய விராட் கோலி 44 பந்துகளில் 4 சிக்ஸ், 8 பவுண்டரி உட்பட 81 ரன்களை விளாசி தள்ளினார். அதேபோல் தேவ்தத் படிக்கல் 27 பந்துகளில் 6 சிக்ஸ், 2 பவுண்டரி உட்பட 55 ரன்களை குவித்தார். கடைசி நேரத்தில் வந்த க்ருணால் பாண்டியா 12 பந்துஇல் 23 ரன்களை எடுத்து வெற்றிபெற வைத்தார்.

தொடக்கம் முதலே சிறப்பாக ஆடிய விராட் கோலி பவுண்டரியும், சிக்சருமாய் விளாசி தள்ளினார். இதன் காரணமாக ஆட்டநாயகன் விருதையும் தட்டிச் சென்றார். இந்த சீசனில் விராட் கோலி அடித்துள்ள 3வது அரைசதம் இதுவாகும். இதன் மூலமாக 7 இன்னிங்ஸில் ஆடி 328 ரன்களை எடுத்து ஆரஞ்ச் கேப் வென்று அசத்தி இருக்கிறார்.

அபிஷேக் சர்மா 323 ரன்களுடனும், கிளாசன் 320 ரன்களுடனும் அடுத்தடுத்த இடங்களில் இருக்கின்றனர். இந்தப் போட்டியில் சிராஜ் வீசிய முதல் ஓவரிலேயே விராட் கோலி ஃபிளிக் ஷாட் அடிக்க முயன்று வாஷிங்டன் சுந்தரிடம் ஒரு அல்வா கேட்ச்சை கொடுத்தார். அதனை வாஷிங்டன் சுந்தர் கோட்டைவிட, அடைமழை வெளுத்து வாங்குவது போல் விராட் கோலி ரன் மழையை பொழிந்தார்.

அந்த கேட்ச்சை பிடித்திருந்தாலே, ஆர்சிபி அணியை எளிதாக கட்டுக்குள் வைத்திருந்திருக்க முடியும். இதனால் குஜராத் அணியின் ஃபீல்டிங் சொதப்பலை பயன்படுத்தி கொண்ட விராட் கோலி, அரைசதத்தை விளாசியதோடு மட்டுமல்லாமல், ஆரஞ்ச் கேப்பையும் கைப்பற்றி அசத்தி இருக்கிறார். இதனால் ஆர்சிபி அணியின் ரசிகர்கள் உற்சாகம் அடைந்துள்ளனர்.

English summary

Virat Kohli: Virat Kohli scored 81 runs off 44 balls against Gujarat and won the orange cap with 328 runs in 7 innings of IPL 2026