மைக் கூட பிடித்து பேசாமலேயே நாட்டின் 3வது பெரிய கட்சி தலைவரான சசிகலா!

மைக் பிடித்து பொதுக் கூட்டத்தில் பேசியறியாத சசிகலா, நேரடியாக அதிமுகவின் பொதுச்செயலாளர் பதவிக்கு வந்துள்ளார்.

சென்னை: அதிமுக பொதுச்செயலாளராக மறைந்த முதல்வர் ஜெயலலிதாவின் தோழி, சசிகலா இன்று பொறுப்பேற்றுக் கொண்டார். போயஸ் இல்லத்தில் இருந்து மதியம் 12.10 மணியளவில் அவர் காரில் கிளம்பி, ராயப்பேட்டையிலுள்ள அதிமுக தலைமை அலுவலகம் வந்தார்.

எம்ஜிஆர் சிலைக்கு மாலை அணிவித்து மரியாதை செலுத்திய சசிகலா பின்னர் ஜெயலலிதா புகைப்படத்திற்கு மலர் தூவி அஞ்சலி செலுத்தினார். பிறகு, அதிமுக பொதுச்செயலாளருக்கான இருக்கையில் அமர்ந்து தனது பொறுப்பை ஏற்றுக்கொண்டார்.

அதிமுக பொதுச்செயலாளராக சசிகலாவை நியமித்து கடந்த வியாழக்கிழமை அதிமுக பொதுக்குழு தீர்மானம் நிறைவேற்றிய நிலையில் அதை ஏற்றுக்கொண்டு சசிகலா இப்பதவிக்கு வந்துள்ளார்.

கடந்த 2014ம் ஆண்டு நடந்த லோக்சபா தேர்தலில், தமிழகத்தில் உள்ள 39 தொகுதிகளில், 37 தொகுதிகளை அதிமுக கைப்பற்றியது. இதன்மூலம், மக்களவையில் பாஜக (282), காங்கிரஸுக்கு (44) அடுத்தபடியாக 3வது இடத்தை அதிமுக பிடித்தது.

மாநிலங்களவையை பொறுத்த வரை, தமிழகத்தில் 11 மற்றும் புதுச்சேரியில் 1 என மொத்தம் 12 எம்பிக்களுடன் 4வது இடத்தில் அதிமுக இருந்தது. சமீபத்தில் நடந்த மாநிலங்களவை எம்பிக்களுக்கான தேர்தலில் அதிமுகவுக்கு கூடுதலாக ஒரு இடம் கிடைத்தது. இதன்மூலம், மாநிலங்களவையில் அதிமுக எம்பிக்கள் எண்ணிக்கை 13 ஆக உயர்ந்தது.

மாநிலங்களவையில் காங் கிரஸுக்கு 64, பாஜகவுக்கு 49 மற்றும் சமாஜ்வாதிக்கு 15 உறுப்பினர்கள் உள்ளனர். 4வது இடத்தில் 13 எம்பிக்களுடன் அதிமுக உள்ளது. எனவே நாடாளுமன்றத்தின் இரு அவைகளிலும் சேர்த்து அதிமுகவின் பலம் 50ஆக உயர்ந்தது. இதுவரை தமிழகத்தின் எந்த கட்சியும் இந்த அளவு எம்பிக்கள் பலத்தை கொண்டிருந்ததில்லை.

ராஜ்யசபா எம்.பி சசிகலா புஷ்பா கட்சியிலிருந்து நீக்கப்பட்டதால் மொத்த எம்.பிக்கள் எண்ணிக்கை 49ஆக உள்ளது. இருப்பினும் லோக்சபாவில் அதிமுகவுக்கு 3வது இடம் அப்படியேதான் உள்ளது. இப்படிப்பட்ட ஒரு கட்சியின் தலைமை பதவியான பொதுச்செயலாளராக சசிகலா தேர்ந்தெடுக்கப்பட்டுள்ளார். முன்பு எப்போதுமே, மைக் பிடித்து பொதுக் கூட்டத்தில் பேசியறியாத சசிகலா, நேரடியாக இப்பதவிக்கு வந்துள்ளார்.

பதவியேற்ற பிறகே, சசிகலா முதல் முறையாக மைக்கை பிடித்து பேசியது குறிப்பிடத்தக்கது.

English summary

Sasikala now chief of India's 3rd largest political party of AIADMK.