திருப்பதியிலிருந்து ஆன்மீக தலங்களுக்கு விமான சேவை! குட் நியூஸ் சொன்ன மத்திய அமைச்சர்

திருப்பதி: திருப்பதியிலிருந்து இந்தியாவின் முக்கிய ஆன்மிக மையங்கள் மற்றும் வெளிநாடுகளுக்குக் குறைந்த நேரத்தில் பயணிக்க புதிய விமானச் சேவைகள் தொடங்க திட்டமிடப்பட்டுள்ளன. இதை மத்திய விமானப் போக்குவரத்துத் துறை அமைச்சர் கிஞ்சரப்பு ராம்மோகன் நாயுடு அறிவித்துள்ளார்.

இந்த அறிவிப்பை அவர், முன்னாள் நாடாளுமன்ற உறுப்பினர் கல்லா ஜெயதேவுடன் ஸ்ரீ காளஹஸ்தீஸ்வரர் கோயிலுக்குச் சென்றபோது வெளியிட்டார்.

திருப்பதி சுற்றுவட்டாரப் பகுதியிலிருந்து அதிகப் பயணிகள் வளைகுடா நாடுகளுக்குச் செல்வதால், ரேணிகுண்டா விமான நிலையத்திலிருந்து சர்வதேசச் சேவைகளை இயக்க ஆராய்ந்து வருவதாகக் குறிப்பிட்டார். தனது விமானப் போக்குவரத்துத் துறைக்கு மத்திய பட்ஜெட்டில் கணிசமான நிதி ஒதுக்கப்பட்டுள்ளதாகவும் ராம்மோகன் நாயுடு விளக்கினார்.

இதற்கிடையே, காணிப்பாக்கம் ஸ்ரீ வரசித்தி விநாயகர் சுவாமி கோயிலில் அண்மையில் ஓர் அநாகரிகச் சம்பவம் நிகழ்ந்தது. சுவாமியின் மூலவர் கருவறையின் புகைப்படங்களை எடுப்பது கோயில் மரபுக்கு எதிரானது. பிப்ரவரி 18ஆம் தேதி இரவு, ஜெர்மனியின் ஸ்ரீ பரமஹம்ச விஸ்வநாத குருஜி தலைமையிலான சுமார் 170 வெளிநாட்டுப் பக்தர்கள் விநாயகரை தரிசித்தனர்.

அப்போது, அவரது சீடர்களில் ஒருவர் கருவறையிலும், ஸ்ரீ வீர ஆஞ்சநேய சுவாமிக்கு ஆரத்தி காட்டியபோதும் புகைப்படங்கள் எடுத்து இன்ஸ்டாகிராமில் பதிவிட்டார். இவை சமூக வலைத்தளங்களில் பரவி, பக்தர்களிடையே கடும் கோபத்தை ஏற்படுத்தின.

கோயில் செயல் அலுவலர் , புகைப்படம் எடுத்தவரைக் கண்டறிந்து நடவடிக்கை எடுக்கப்படும் எனவும், எதிர்காலத்தில் இச்சம்பவம் மீண்டும் நிகழாத வகையில் பாதுகாப்பு பலப்படுத்தப்படும் எனவும் உறுதியளித்தார்.