நிதி தாங்க.. இறந்த மகனின் அஸ்தியை நிலவிற்கு அனுப்பும் பெற்றோர்.. பின்னனியில் நெகிழ்ச்சி கதை!

Updated: Friday, July 15, 2022, 19:32 [IST]

Subscribe to Oneindia Tamil

வாஷிங்டன்: அமெரிக்காவின் புளோரிடா மாகாணத்தில் உள்ள ஒரு பெற்றோர், நிலாவுக்கு செல்ல வேண்டும் என்ற தங்கள் மகனின் ஆசையை, மகன் இறந்துவிட்டாலும் எப்படியாவது அவனது ஆசையை நிறைவேற்றிவிட வேண்டும் என்ற எண்ணத்தில் நிதி திரட்டி வருகின்றனர்.

மனதை கரைய வைக்கும் இந்த உருக்கமான சம்பவம் குறித்த தகவல்கள் வருமாறு;- புளோரிடா மாகாணத்தை சேர்ந்த தம்பதி கோரி மற்றும் ஸ்காட் கல்லாகர். இந்த தம்பதியின் மகன் மேத்யூ.

இவனுக்கு 5 வயதில் இருந்தே எப்படியாவது விண்வெளி வீரர் ஆகிவிட வேண்டும் என்பது கனவு. மற்ற சிறுவர்கள் போல் அல்லாமல் விளையாட்டிலும் கூட தன்னை விண்வெளி வீரர் என நினைத்துக்கொண்டு அவர்களின் அசைவுகள் படியே செய்து காட்டி குறும்புத்தனம் காட்டி வந்தான். விண்வெளி வீரர்களைக் கண்டு அவர்களுடன் புகைப்படம் எடுப்பதிலும் அலாதி பிரியம் காட்டிவந்துள்ளான்.

இறந்துபோன மகன்

இந்த நிலையில், கடந்த மே மாதம் 18-ந் தேதி, 11 வயதான மேத்யூ துரதிர்ஷ்டவசமாக இறந்து போயுள்ளான். பேரிடி போல வந்த செய்தியைக் கேட்டு துடிதுடித்து போயினர் மேத்யூவின் பெற்றோர்களான கோரி மற்றும் ஸ்காட் கல்லாகர். மகனின் கனவும் இப்படி தகர்ந்து போய்விட்டதே என்று சோகம் அடைந்த பெற்றோருக்கு, ஒரு யோசனை தோன்றியிருக்கிறது.

நினைவு விண்வெளி விமானங்கள்

மகன் இறந்தாலும் அவனது அஸ்தியை எப்படியாவது விண்வெளிக்கு அனுப்பிவிட வேண்டும் என நினைத்துள்ளனர். மகனின் கனவை நிறைவேற்றுவதாக இது இருக்கும் என்று எண்ணி இதற்கான நடவடிக்கைகளில் இறங்கினர். அப்போது தான் இறந்தவர்களின் அஸ்தியை விண்வெளிக்கு அனுப்பும் நிறுவனமான "செலஸ்டிஸ் நினைவு விண்வெளி விமானங்கள்" என்ற நிறுவனம் குறித்து கேள்வி பட்டு இருக்கின்றனர்.

மகனின் அஸ்தியை விண்ணுக்கு அனுப்ப

இதை உடனடியாக அறிந்த மேத்யூவின் பெற்றோர் இந்த நிறுவனத்தின் உதவியால் தனது மகனின் அஸ்தியை விண்ணுக்கு அனுப்ப திட்டமிட்டுள்ளனர். அடுத்த ஆண்டில் இறந்தவர்களின் அஸ்தியை விண்ணுக்கு அனுப்பும் திட்டம் செயல்படுத்தப்படுகிறது. இதில் தங்கள் மகனின் அஸ்தியை நிலவுக்கு அனுப்ப திட்டமிட்டுள்ளனர்.

14 ஆயிரம் அமெரிக்க டாலர்கள்

இதற்காக தற்போது அவர்கள் நிதி திரட்டும் பணியில் இறங்கியுள்ளனர். 14 ஆயிரம் அமெரிக்க டாலர்கள் இதற்காக தேவைப்படும் எனவும் 11 ஆயிரம் டாலர் திரட்டிவிட்டோம் என்றனர்.