இந்தியாவில் அமெரிக்க பொருட்கள் மீதான வரி.. பூஜ்ஜியமாகிறது! டிரம்ப் கொடுத்த முக்கிய அப்டேட்
வாஷிங்டன்: இந்தியா மீது அமெரிக்கா 50% வரியை போட்டிருந்தது. இந்த வரியை நீக்க கோரி, அமெரிக்காவுடன் வர்த்தக பேச்சுவார்த்தையை இந்தியா நடத்தி வந்தது. தற்போது இந்த பேச்சுவார்த்தையில் உடன்பாடு எட்டப்பட்டிருப்பதாகவும், எனவே இந்தியா மீதான பரஸ்பர வரியை 25% லிருந்து 18% ஆக குறைத்திருப்பதாகவும் டிரம்ப் அறிவித்திருக்கிறார். அதேபோல தங்கள் நாட்டு பொருட்கள் மீதான வரியை பூஜ்ஜியமாக்க இந்தியா முன்வந்திருப்பதாகவும் கூறியுள்ளார்.
இது குறித்து அவர் விடுத்திருக்கும் அறிவிப்பில், பிரதமர் மோடியை தனது சிறந்த நண்பர்களில் ஒருவர் என்றும், ஒரு வலிமையான தலைவர் என்றும் ட்ரம்ப் புகழ்ந்துள்ளார்.
உக்ரைன் போரை முடிவுக்குக் கொண்டு வருவது குறித்து, இருவரும் விவாதித்ததாகக் கூறப்பட்டிருக்கிறது. குறிப்பாக, இந்தியா ரஷ்யாவிடமிருந்து எண்ணெய் வாங்குவதை நிறுத்திவிட்டு, அமெரிக்கா மற்றும் வெனிசுலாவிலிருந்து அதிகப்படியான எண்ணெயை வாங்க ஒப்புக்கொண்டதாக டிரம்பின் அறிவிப்பில் தெரிவிக்கப்பட்டிருக்கிறது.
அமெரிக்கா மற்றும் இந்தியா இடையே ஒரு வர்த்தக ஒப்பந்தம் எட்டப்பட்டதாகக் கூறப்படுகிறது. இதன்படி, அமெரிக்கா விதிக்கும் பரஸ்பர வரி (Reciprocal Tariff) 25% லிருந்து 18% ஆகக் குறைக்கப்படுவதாகவும், இந்தியா அமெரிக்கப் பொருட்களுக்கு விதிக்கும் வரிகள் மற்றும் பிற தடைகளை பூஜ்ஜியமாக குறைக்க ஒப்புக்கொண்டது என்றும் டிரம்ப் தனது அறிக்கையில் தெரிவித்திருக்கிறார்.
அதேபோல இந்தியா அமெரிக்காவிலிருந்து எரிசக்தி, தொழில்நுட்பம், விவசாயம் மற்றும் நிலக்கரி போன்ற துறைகளில் 500 பில்லியன் டாலர் மதிப்பிலான பொருட்களை வாங்க உறுதி அளித்துள்ளதாகக் கூறப்பட்டுள்ளது.
இந்தியாவை பொறுத்தவரை அமெரிக்காவின் பல்வேறு பொருட்களுக்கு நாம், வெவ்வேறு விகிதங்களில் வரியை விதிக்கிறோம். பொதுவாக, அமெரிக்கப் பொருட்களின் மீது இந்தியா விதிக்கும் சராசரி வரி விகிதம் சுமார் 17% முதல் 18% வரை இருந்தது. ஆனால், அமெரிக்க மதுபானங்களுக்கு 150%, ஹார்லி டேவிட்சன் பைக்குக்கு 40%, விவசாய பொருட்களுக்கு 30-70% வரை வரி விதிக்கப்பட்டிருந்தது.
இந்நிலையில் எல்லா பொருட்களுக்கும் வரியை ஜீரோவாக மத்திய அரசு மாற்றுகிறதா? அல்லது குறிப்பிட்ட சில பொருட்களுக்கு மட்டுமா? என்பதை இந்த அறிக்கையின் மூலம் முழுமையாக தெரிந்துக்கொள்ள முடியவில்லை.
Click it and Unblock the Notifications
Sign in with Google