Loka OTT: லோகா சாப்டர் 1! பெண் சூப்பர் ஹீரோ படமே 300 கோடி வசூல்! ஓடிடியில் வந்தாச்சு! எந்த தளத்தில் தெரியுமா?

சென்னை: மலையாளத் திரையுலகில் இந்த ஆண்டு ஆகஸ்டில் வெளியாகி, ஒட்டுமொத்த இந்திய சினிமா ரசிகர்களின் கவனத்தையும் ஈர்த்துள்ள திரைப்படம் 'லோகா சாப்டர் 1 சந்திரா'. நடிகை கல்யாணி பிரியதர்ஷன் சூப்பர் ஹீரோ கதாபாத்திரத்தில் நடித்த இந்தப் படம், வசூலில் மலையாள சினிமாவின் வரலாற்றையே மாற்றி எழுதி, புதிய சாதனை படைத்துள்ளது.

வசூலில் ஒரு மைல்கல்

இந்த படத்தை நடிகர் துல்கர் சல்மானின் 'வேஃபாரர் ஃபிலிம்ஸ்' தயாரிப்பு நிறுவனம் தயாரிக்க, டாமினிக் அருண் இயக்கியுள்ளார். ஜேக்ஸ் பிஜாய் இசையமைத்துள்ள இப்படம், வெளியான குறுகிய நாட்களிலே 100 கோடி வரை வசூலித்தது. இதன் மூலம், சூப்பர் ஹீரோ கதாபாத்திரத்தில் பெண் கதாபாத்திரத்தை மையமாக வைத்து எடுக்கப்பட்ட ஒரு இந்திய படம் முதல் முறையாக 100 கோடி கிளப்பில் இணைந்தது என்ற பெரும் சாதனையை 'லோகா' படைத்தது.

மலையாளத்தின் பிரம்மாண்டம்

அதுமட்டுமின்றி, இந்தப் படம் இப்போது மலையாளத் திரையுலகிலே அதிக வசூலித்த படமாக 300 கோடிக்கு மேல் வசூலித்து புதிய சாதனை படைத்துள்ளது. 'லோகா சாப்டர் 1 சந்திரா' திரைப்படம், கல்யாணி பிரியதர்ஷன் ஏற்று நடித்திருக்கும் 'சந்திரா' என்ற பெண் சூப்பர் ஹீரோவைச் சுற்றிச் சுழல்கிறது. ஒரு பெண், சமூகத்தில் நடக்கும் அநீதிகளைத் தனக்குக் கிடைத்த அமானுஷ்ய சக்திகளைக் கொண்டு எப்படி எதிர்கொள்கிறாள், குறிப்பாகத் தனது தனிப்பட்ட வாழ்க்கையில் நிகழும் சவால்களைச் சக்தியின் துணை கொண்டு அவள் எப்படிச் சமாளிக்கிறாள் என்பதே படத்தின் மையக் கருத்தாக இருந்தது.

நடிகர்கள்

இப்படத்தில் நஸ்லன், நடன இயக்குநர் சாண்டி உள்ளிட்டப் பலர் நடித்துள்ளனர். கல்யாணி பிரியதர்ஷனின் அழுத்தமான நடிப்பு, ஆக்ஷன் காட்சிகளில் அவர் காட்டிய நேர்த்தி ஆகியவை விமர்சகர்கள் மற்றும் ரசிகர்களிடம் பெரும் வரவேற்பைப் பெற்றது. சூப்பர் ஹீரோ படங்களுக்கே உரிய ஆக்ஷன், பிரம்மாண்டம் மற்றும் எமோஷன் ஆகியவை சரியான கலவையில் இருந்ததால், ரசிகர்கள் மத்தியில் படம் பெரும் வரவேற்பைப் பெற்றது. பெண்களுக்கு அதிகாரம் அளிக்கும் கதையமைப்பு (Empowerment) பாராட்டப்பட்டது.

ஓடிடி ரிலீஸ் தேதி அறிவிப்பு

தியேட்டர்களில் சாதனைக் குவித்த இந்தப் படத்தைப் பார்க்கத் தவறிய ரசிகர்களுக்காக, தற்போது ஓடிடி ரிலீஸ் தேதி குறித்த அறிவிப்பு வெளியாகியுள்ளது. 'லோகா சாப்டர் 1 சந்திரா' திரைப்படம் விரைவில் ஜியோ ஹாட்ஸ்டார் தளத்தில் வெளியாகும் என்று சமீபத்தில் தெரிவிக்கப்பட்டது. தற்போது ரிலீஸ் தேதியும் வெளியாகியுள்ளது. அதன்படி, வரும் 31ஆம் தேதி (நவம்பர் 31) இப்படம் வெளியாகவுள்ளது.

பெரும் ஹிட்டடித்த இப்படத்தை ஓடிடியிலும் காண ரசிகர்கள் ஆர்வமாக இருக்கின்றனர். இதன் இரண்டாம் பாகம், நடிகர் டொவினோ தாமஸ் கதாபாத்திரத்தை முதன்மையாக வைத்து உருவாக்கப்பட உள்ளது குறிப்பிடத்தக்கது.

English summary

Loka Chapter 1: The Malayalam blockbuster Loka Chapter 1: Chandra, directed by Dominic Arun and produced by Dulquer Salmaan’s Wayfarer Films, has rewritten box office history. Starring Kalyani Priyadarshan as India’s first full-fledged female superhero lead, the film has grossed over ₹300 crore, making it the highest-grossing Malayalam film of all time. Within days of release, the movie joined the prestigious ₹100 crore club, marking a milestone for female-centric superhero cinema in India.The story follows Chandra, a woman who gains supernatural powers and uses them to fight injustice while facing her own personal struggles. Critics and audiences have praised Kalyani Priyadarshan’s power-packed performance, the film’s world-class action choreography, and its strong message of female empowerment. The cast also includes Naslen and choreographer Sandy, with music composed by Jakes Bejoy.After its monumental theatrical success, Loka Chapter 1: Chandra will premiere on Jio Hotstar on November 31, 2025, allowing fans who missed it in cinemas to experience it at home. The sequel, Loka Chapter 2, will reportedly focus on Tovino Thomas’s character, further expanding the cinematic universe.