SaReGaMaPa: ஜீ தமிழ் சரிகமப ஃபினாலே மேடையில் உருக்கம்! 'தைய தைய' பாடிய சின்னு செந்தமிழனுக்கு கிடைத்த பரிசு

Published: Sunday, November 23, 2025, 22:01 [IST]

Subscribe to Oneindia Tamil

சென்னை: ஜீ தமிழ் தொலைக்காட்சியில் வெற்றிகரமாக ஓடி முடிந்துள்ள சரிகமப சீனியர் சீசன் 5 இறுதிச் சுற்றில், போட்டியாளர்களுக்குக் கிடைத்த சர்ப்ரைஸ் பரிசுகள் மற்றும் உணர்ச்சிப்பூர்வமான நிகழ்வுகள் ரசிகர்கள் மத்தியில் பேசப்பட்டு வருகின்றன. குறிப்பாக, போட்டியாளர் சின்னு செந்தமிழன்-க்கு கிடைத்த அன்பளிப்பு அனைவரையும் கண்கலங்கச் செய்துள்ளது.

உருகிய மேடையும், கிடைத்த கிஃப்ட்டும்

கிராண்ட் பினாலே போட்டியில் சின்னு செந்தமிழன் பிரபலமான 'தைய தைய' பாடலைத் தன்னுடைய அசத்தலான குரலில் பாடினார். இந்தப் பாடலுக்காக அவருக்குப் பல பாராட்டுகள் கிடைத்தது. அவர் பாடி முடிந்த பிறகு தான் மேடையில் ஒரு பெரிய சர்ப்ரைஸ் காத்திருந்தது. சின்னுவுக்கு ஒரு ரசிகர் தான் சம்பாதித்த பணத்தில் ஒரு புதிய பைக் ஒன்றை வாங்கிப் பரிசாக அனுப்பி வைத்தார்.

கண்ணீர் விட்ட சின்னு

எதிர்பாராத இந்த பரிசை பார்த்ததும் சின்னு மேடையிலேயே கதறி அழத் தொடங்கினார். அப்போது அவர், தான் சம்பாதித்தப் பணத்தைக் கொண்டு ஒரு பழைய ஸ்கூட்டர் தான் வாங்க முடிந்தது என்றும், 'உன் வயதினர் எல்லோரும் புது கார் பைக் என வாங்கிவிட்டார்கள், ஆனால் நீ இப்படி இருக்கிறாய்' என வீட்டில் அப்பா கேட்டதை நினைவு கூர்ந்து கண்ணீர் விட்டதாகவும் கூறினார்.

மெக்கானிக் கடையில் இருந்து மேடை

சின்னு செந்தமிழனின் பின்னணி அனைவரையும் உருகச் செய்தது. அவர் ஒரு மெக்கானிக் செட்டில் பாட்டுப் பாடி, அந்த வீடியோக்களை வலைதளங்களில் வெளியிட்டுப் பிரபலமானார். சரிகமப நிகழ்ச்சியில் அவர் பாடுவதற்கு வாய்ப்பு கிடைக்கக் காரணமாக இருந்தவர் பாடலாசிரியர் சினேகன் தான். செந்தமிழன் பாடலை சமூக வலைதளத்தில் கேட்டு அவரை எப்படியாவது மேலே கொண்டு வர வேண்டும் என்று தான் ஆசைப்பட்டதாகவும், நிகழ்ச்சியின் முதல் நாள் ஆடிஷனுக்கு செந்தமிழனுக்குத் துணையாக வந்ததாகவும் சினேகன் கூறியிருந்தார்.

ஆனாலும், இந்த கிராண்ட் ஃபினாலேவுக்கு சினேகனால் வர முடியவில்லை. சில நாட்களுக்கு முன்புதான், சினேகனின் மனைவி அவருக்கு வைரஸ் காய்ச்சல் பாதித்திருப்பதாக ஒரு பதிவு போட்டிருந்தார். அதனால் தான் அவரால் வர முடியாமல் போயிருக்கும் என்று நம்பப்படுகிறது.

பல நல்லவர்களின் ஆதரவால் இவ்வளவு உயர்ந்த இடத்திற்கு வந்திருக்கும் சின்னு செந்தமிழன், இந்த அன்பளிப்பை பெற்று பெருமையும், மகிழ்ச்சியும் அடைந்துள்ளார். இன்னும் மேலும் வளர வேண்டும் என்று பலரும் அவருக்கு வாழ்த்துகளைத் தெரிவித்து வருகிறார்கள்.

Published On November 23, 2025