கமல்ஹாசன் ஒரு பைத்தியம்! அவர் நம்மை மாதிரி கிடையாது வெளிப்படையாக பேசிய ஊர்வசி! பாராட்டும் ரசிகர்கள்

Updated: Monday, August 11, 2025, 17:30 [IST]

Subscribe to Oneindia Tamil

சென்னை: சினிமா உலகில் 'விண்வெளி நாயகன்' என்று அழைக்கப்படும் நடிகர் கமல்ஹாசனை ஒரு 'பைத்தியம்' என்று நடிகை ஊர்வசி கூறியதை ரசிகர்கள் உண்மை என்றே ஏற்றுக் கொள்கிறார்கள். தனது சினிமா மீதான பேரார்வம் காரணமாகவே அவர் அப்படிப்பட்டவர் தான் என்று ஊர்வசி பேசியதை பாராட்டி வருகிறார்கள்.

ஊர்வசியின் பாராட்டு

பல்வேறு படங்களில் கமல்ஹாசனுடன் இணைந்து நடித்த நடிகை ஊர்வசி, சமீபத்தில் ஒரு பேட்டியில், கமல்ஹாசனின் திறமையைப் பாராட்டிப் பேசியுள்ளார். அவர் பேசியதாவது: "கமல் சார் செய்வது போல் வேறு எந்த நடிகராலும் செய்ய முடியாது. அவர் ஒரு பைத்தியம். என்ன செய்யச் சொன்னாலும் செய்வார்". "மாடியில் இருந்து குதிக்கச் சொன்னால் கூட குதித்துவிடுவார்"."ஒரு காட்சிக்காக 25 முறை ஒத்திகை பார்க்கச் சொன்னால், அத்தனை முறையும் செய்து காட்டுவார். நாமெல்லாம் ஒரு கட்டத்தில் 'டேக்' போகலாம் என்று நினைப்போம். ஆனால், அவர் அப்படிப்பட்டவர் அல்ல". "இயக்குநர் ஒரு காட்சியில் நடந்து செல்லச் சொன்னால், அந்த நடையில் என்னென்ன நடிப்புத் திறனைக் காட்டலாம் என்று சிந்திப்பவர் கமல் சார்".

கமல்ஹாசனின் சினிமாப் பைத்தியம்

நடிகை ஊர்வசி கூறியது முற்றிலும் சரி என்று ரசிகர்கள் கருதுகிறார்கள். கமல்ஹாசனுக்கு சினிமா மீது ஒரு தனிப்பட்ட பைத்தியம் இருக்கிறது. அந்தப் பைத்தியம், நாளுக்கு நாள் குறையாமல், ஒவ்வொரு படத்திலும் புதிய பரிசோதனைகளை மேற்கொள்ளத் தூண்டுகிறது. வெற்றி, தோல்வி என்பது சினிமாவில் ஒரு சகஜமான விஷயம் என்று கமல்ஹாசன் உணர்ந்துள்ளார். ஒரு படம் தோல்வியடைந்தால் கூட, அதை நினைத்து கவலைப்படாமல், அடுத்த படத்தில் கூடுதல் கவனம் செலுத்துவது அவரது வழக்கம்.

இந்தியன் 3 மீது நம்பிக்கை

சமீபத்தில் வெளியான கமல்ஹாசனின் 'தக் லைஃப்' மற்றும் 'இந்தியன் 2' ஆகிய திரைப்படங்கள் எதிர்பார்த்த வெற்றியைப் பெறவில்லை. இருப்பினும், அவர் தனது நம்பிக்கையை இழக்கவில்லை. 'இந்தியன் 3' திரைப்படத்தில் பார்த்துக்கொள்ளலாம் என்ற நம்பிக்கையுடன் அவர் தனது வேலையைத் தொடர்ந்து செய்து வருகிறார். 'தக் லைஃப்' திரைப்படம், நன்றாக இருந்தும், சமூக வலைத்தளங்களில் வேண்டுமென்றே எதிர்மறையான கருத்துக்கள் பரப்பப்பட்டு, படம் தோல்வியடைந்ததாக ஒரு பேச்சு அடிபட்டது. இதனால், ரஜினிகாந்தின் 'கூலி' படத்திற்கும் இதே நிலை வந்துவிடக் கூடாது என்று ரஜினி ரசிகர்கள் பிரார்த்தனை செய்து கொண்டிருக்கிறார்கள்.

அரசியல் பயணமும், நட்புப் பிணைப்பும்

நடிகர், தயாரிப்பாளர், பாடகர், அரசியல் கட்சித் தலைவர் எனப் பல தளங்களில் இயங்கி வந்த கமல்ஹாசன், தற்போது ஒரு மாநிலங்களவை உறுப்பினராக (ராஜ்யசபா எம்.பி) தனது புதிய பயணத்தைத் தொடங்கியுள்ளார். இந்தப் புதிய பயணத்தைத் தொடங்குவதற்கு முன்பு, தனது நெருங்கிய நண்பரான ரஜினிகாந்தையும் அவர் சந்தித்துப் பேசியது குறிப்பிடத்தக்கது.

இது ஒரு பக்கம் இருந்தாலும் நடிகர் கமல்ஹாசன் உடன் இணைந்து நடித்த பலரும் அவருடைய உழைப்பு மற்றும் அவருடைய பெருந்தன்மையை பாராட்டி இருக்கிறார்கள் நடிப்பு என்று வந்து விட்டால் ஒரே டேக்கில் நடித்து முடித்து அனைவரையும் வியக்க வைத்து இருக்கிறாராம். அதோடு ஒவ்வொரு திரைப்படங்களிலும் தன்னுடைய நடிப்பால் புதுமையை காட்டி வரும் கமல்ஹாசன் பற்றி இப்போது நடிகை ஊர்வசி பைத்தியம் என்று சொன்னது சரிதான் என்று கமல்ஹாசன் ரசிகர்களும் பாராட்டி வருகிறார்கள்.