இடி, மின்னலுடன் வெளுக்க போகுது மழை! இன்று 4 மாவட்டங்களில் கனமழை அலர்ட்! கோடை வெயிலுக்கு ஜில் அப்டேட்

சென்னை: தமிழகத்தில் இன்று 4 மாவட்டங்களில் கனமழைக்கு வாய்ப்பு உள்ளதாக வானிலை ஆய்வு மையம் தெரிவித்துள்ளது. குறிப்பாக ஈரோடு, விருதுநகர், நீலகிரி, தேனி ஆகிய 4 மாவட்டங்களில் இன்று கனமழைக்கும், நாளை தமிழகத்தில் தேனி, திண்டுக்கல், விருதுநகர் ஆகிய 3 மாவட்டங்களில் கனமழைக்கு வாய்ப்பு உள்ளது. கோடை வெயில் சுட்டெரித்து வரும் நிலையில் வானிலை மையம் அறிவிப்பு மக்களுக்கு மகிழ்ச்சியை கொடுத்துள்ளது.

தமிழகத்தில் கோடை வெயிலுக்கு மத்தியில் ஒரு சில இடங்களில் மழையும் கொட்டி வருகிறது. நேற்றும் தமிழகத்தில் மழை பெய்த நிலையில் இன்றும் 4 மாவட்டங்களில் கனமழைக்கு வாய்ப்பு உள்ளதாக வானிலை மையம் கூறியுள்ளது.

இன்று 4 மாவட்டங்களில் கனமழை

இது தொடர்பாக வானிலை அறிவிப்பில் கூறப்பட்டிருப்பதாவது:- ராயலசீமா மற்றும் அதனை ஒட்டிய பகுதிகள் முதல் மன்னார் வளைகுடா வரை வரை, சுமார் 0.9 கிமீ உயரத்தில் தமிழகம் வழியாக ஒரு காற்றழுத்த தாழ்வு பாதை (Trough) நிலவுகிறது.

இதனால், இன்று (ஞாயிற்றுக்கிழமை) தமிழகம், புதுவை மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும். விருதுநகர், தேனி மாவட்டங்களின் மலைப்பகுதிகள், ஈரோடு மற்றும் நீலகிரி மாவட்டங்களில் ஓரிரு இடங்களில் கனமழை பெய்ய வாய்ப்பு உள்ளது.

விருதுநகர், தேனி, திண்டுக்கல்

6 ஆம் தேதி தென் தமிழகம் மற்றும் மேற்கு தொடர்ச்சி மலை மாவட்டங்கள் ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும். விருதுநகர், தேனி மற்றும் திண்டுக்கல் மாவட்டங்களில் ஓரிரு இடங்களில் கனமழை பெய்யக்கூடும். வடதமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

வரும் 7 ஆம் தேதி தமிழக கடலோர மாவட்டங்கள் மற்றும் புதுவை, காரைக்கால் பகுதிகளில் ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும். 08-04-2026 தமிழகம், புதுவை மற்றும் காரைக்கால் பகுதிகளில் ஒருசில இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும்.

தமிழக கடலோர மாவட்டங்கள்

9 ஆம் தேதி மேற்கு தொடர்ச்சி மலை மாவட்டங்கள் மற்றும் அதனை ஒட்டிய மாவட்டங்கள், தமிழக கடலோர மாவட்டங்கள், மற்றும் புதுவை, காரைக்கால் பகுதிகளில் ஓரிரு இடங்களில் லேசான மழை பெய்யக்கூடும். 10 ஆம் தேதி மேற்கு தொடர்ச்சி மலை மாவட்டங்கள் மற்றும் அதனை ஒட்டிய மாவட்டங்கள், தமிழக கடலோர மாவட்டங்கள், மற்றும் புதுவை, காரைக்கால் பகுதிகளில் ஓரிரு இடங்களில் லேசான மழை பெய்யக்கூடும்.

11 ஆம் தேதி மேற்கு தொடர்ச்சி மலை மாவட்டங்கள் மற்றும் அதனை ஒட்டிய மாவட்டங்களில் ஓரிரு இடங்களில் லேசான மழை பெய்யக்கூடும். ஏனைய தமிழக மாவட்டங்கள் மற்றும் புதுவை, காரைக்கால் பகுதிகளில் வறண்ட வானிலை நிலவக்கூடும்

அதிகபட்ச வெப்பநிலை பற்றிய முன்னறிவிப்பு:

05-04-2026 முதல் 07-04-2026 வரை: வடதமிழகம், புதுவை மற்றும் காரைக்கால் பகுதிகளில் ஓரிரு இடங்களில் அதிகபட்ச வெப்பநிலை 2-3' செல்சியஸ் வரை படிப்படியாக உயரக்கூடும். தென்தமிழகத்தில் அதிகபட்ச வெப்பநிலையில் குறிப்பிடத்தக்க மாற்றதிற்கான வாய்ப்பு குறைவு. 08-04-2026 மற்றும் 09-04-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் குறிப்பிடத்தக்க மாற்றதிற்கான வாய்ப்பு குறைவு.

சென்னையில் மழை பெய்யும்

சென்னையில் இன்று (05-04-2026) வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி, மின்னலுடன் கூடிய லேசான மழை பெய்யக்கூடும். அதிகபட்ச வெப்பநிலை 37° செல்சியஸை ஒட்டியும், குறைந்தபட்ச வெப்பநிலை 27° செல்சியஸை ஒட்டியும் இருக்கக்கூடும்

சென்னையில் நாளை (06-04-2026) வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 37-38° செல்சியஸை ஒட்டியும், குறைந்தபட்ச வெப்பநிலை 26-27° செல்சியஸை ஒட்டியும் இருக்கக்கூடும்.

மழை அளவு (செமீ)

* ஊத்து (திருநெல்வேலி) 7. நாலுமுக்கு (திருநெல்வேலி) 7,
* பொன்னை அணை (வேலூர்) 5. காக்காச்சி (திருநெல்வேலி) 5. பார்வூட் (நீலகிரி) 5, தொழுதூர் (கடலூர்) 5,

* சாத்தூர் (விருதுநகர்) 4. மாஞ்சோலை (திருநெல்வேலி) 4, வேப்பந்தட்டை (பெரம்பலூர்) 4, பெரம்பலூர் (பெரம்பலூர்) 4. TNAU CRI ஏத்தாப்பூர் (சேலம்) 4, வேப்பந்தட்டை ARG (பெரம்பலூர்) 4, திருத்தணி PTO (திருவள்ளூர்) 4, மணிமுத்தாறு (திருநெல்வேலி) 4, ஸ்ரீமுஷ்ணம் (கடலூர்) 4, பெலாந்துறை (கடலூர்) 4, கிருஷ்ணபுரம் (பெரம்பலூர்) 4,
* பெரியாறு (தேனி) 3, பாடலூர் (பெரம்பலூர்) 3, குப்பநத்தம் (கடலூர்) 3, விருதுநகர் AWS (விருதுநகர்) 3, மணிமுத்தாறு அணை ARG (திருநெல்வேலி) 3, தழுதலை (பெரம்பலூர்) 3, கீழச்செருவை (கடலூர்) 3 செமீ மழை பெய்துள்ளது" என்று கூறப்பட்டுள்ளது.

English summary

Heavy Rain: The India Meteorological Department has forecast heavy rainfall in Erode, Virudhunagar, Nilgiris and Theni today, with more showers expected in Theni, Dindigul and Virudhunagar tomorrow, bringing relief from the intense summer heat across Tamil Nadu.