காங்கிரஸ் திமுக இடையில் உண்மையில் என்னதான் பிரச்சனை? தவெக விஜயுடன் சேர திட்டம்? உண்மை என்ன?

சென்னை: தமிழ்நாட்டில் சட்டசபை தேர்தல் நெருங்கும் நேரத்தில்.. திமுக தலைமையிலான கூட்டணியில் சிறுசலசலப்பு ஏற்பட்டுள்ளது. காங்கிரஸ் கட்சியின் ஒரு முக்கிய பிரிவினர் அதிக சட்டமன்ற இடங்களையும், ஆட்சி அதிகாரத்தில் பெரிய பங்கையும் கோரி வருவதே இந்த சலசலப்புக்குக் காரணம்.

நடிகரும் அரசியல்வாதியுமான விஜய்யின் தமிழக வெற்றிக் கழகம் (TVK), காங்கிரஸை தனது "இயற்கையான கூட்டாளி" என்று கருதுவதாகத் தெரிவித்துள்ளதும் இந்தப் பதற்றத்திற்கு மேலும் வலு சேர்க்கிறது. அதே நேரத்தில், வெற்றிக் கூட்டணியில் இருந்தபோதிலும், மாநிலத்தில் தனது அமைப்புக் கட்டமைப்பை விரிவுபடுத்துவதில் காங்கிரஸ் தோல்வியடைந்திருப்பது குறித்து அக்கட்சியின் ஒரு பகுதியினர் மத்தியில் அதிருப்தி நிலவுகிறது.

அதிருப்தியில் காங்கிரஸ்

கடந்த டிசம்பர் 28 அன்று, காங்கிரஸ் கட்சியின் தரவு பகுப்பாய்வுப் பிரிவின் தலைவர் பிரவீன் சக்ரவர்த்தி, தமிழ்நாட்டின் கடன் நிலையை அச்சுறுத்தும் வகையில் இருக்கிறது என்று வர்ணித்து பரபரப்பைக் கிளப்பினார். ஒட்டுமொத்த நிலுவையில் உள்ள பொறுப்புகள், அதிகரித்து வரும் வட்டிச் சுமை மற்றும் மொத்த மாநில உள்நாட்டு உற்பத்திக்குக் கடன் விகிதம் ஆகியவற்றைக் குறிப்பிட்டு அவர் இந்தக் கருத்தைத் தெரிவித்தார்.

சக்ரவர்த்தியின் கருத்துகள் குறித்து பொது விவாதத்தில் ஈடுபட திமுக மறுத்துவிட்டது. விஜய்யுடன் அவர் சமீபத்தில் சந்தித்ததை சுட்டிக்காட்டிய திமுக, காங்கிரஸுக்கு ஏதேனும் பிரச்சனை இருந்தால், அதை உட்கட்சிக்குள் பேசித் தீர்த்திருக்க வேண்டும் என்று குறிப்பிட்டது.

முன்னாள் நிதியமைச்சரும் மூத்த காங்கிரஸ் தலைவருமான ப. சிதம்பரம், திமுக தலைமையிலான கூட்டணிக்கு காங்கிரஸின் உறுதிப்பாட்டை பொதுவெளியில் மீண்டும் உறுதிப்படுத்தினார். ஆனால், அக்கட்சியின் மக்களவை கொறடாவான மாணிக்கம் தாகூர், எந்தக் கட்சியாலும், "திமுக உட்பட, தனிப் பெரும்பான்மை பெற முடியாது" என்பதால், ஆட்சி அதிகாரத்தில் அதிக பங்கு வேண்டும் என்ற தனது கோரிக்கை நியாயமானது என்று திங்கள்கிழமை தெரிவித்தார்.

அகில இந்திய காங்கிரஸ் கமிட்டியின் (AICC) மாநிலப் பொறுப்பாளர் கிரிஷ் சோடங்கர் தலைமையிலான ஒரு குழு, கடந்த டிசம்பர் 3 அன்று தமிழக முதல்வர் மு.க. ஸ்டாலினைச் சந்தித்து தொகுதிப் பங்கீடு குறித்துப் பேசியதாக காங்கிரஸ் வட்டாரங்கள் தெரிவிக்கின்றன. ஆனால், அதன்பிறகு திமுக தரப்பில் எந்த முடிவும் எடுக்கப்படாமல் காலம் தாழ்த்தி வருவதாகக் கூறப்படுகிறது.

காங்கிரஸ் தலைவர்கள் அதிருப்தி

இதுகுறித்து தமிழ்நாட்டிலுள்ள ஒரு காங்கிரஸ் தலைவர் கூறுகையில், "முக்கியமான விஷயம் என்னவென்றால், நாங்கள் டிசம்பர் 15-ஆம் தேதிக்குள் தொகுதிப் பங்கீட்டை இறுதி செய்ய விரும்பினோம். எங்கள் தலைவர்கள் விரைவில் பிரச்சாரத்தைத் தொடங்க வேண்டும். எந்தெந்தத் தொகுதிகளில் போட்டியிடுகிறோம் என்பது தெரிந்தால் மட்டுமே அது சாத்தியம். பீகாரில் நடந்த தவறுகளில் இருந்து நாங்கள் பாடம் கற்றுக்கொண்டோம். கடைசி நிமிடம் வரை தொகுதிப் பங்கீட்டுப் பேச்சுவார்த்தை இழுத்தடித்த அதே தவறை மீண்டும் செய்ய விரும்பவில்லை" என்று தெரிவித்தார்.

பீகாரில், காங்கிரஸ் 70-க்கும் மேற்பட்ட தொகுதிகளைக் கோரியது. ஆனால், இறுதியில் 61 தொகுதிகளுக்கு ஒப்புக்கொண்டது. ஆனாலும், தேர்தல் களத்தில் பல இடங்களில் நட்புப் போட்டிகள் நிகழ்ந்தன. இதன் காரணமாகப் பெரும் கூட்டணி தோல்வியைச் சந்தித்தது குறிப்பிடத்தக்கது.

மாணிக்கம் தாக்கூர்

முன்னதாக இந்தியன் எக்ஸ்பிரஸ் நாளிதழிடம் பேசிய மாணிக்கம் தாகூர், "காங்கிரஸ் தொண்டர்களின் கருத்துப்படி, மாநிலத்தில் கூட்டணி வெறும் தொகுதிப் பங்கீட்டுடன் முடிந்துவிடக் கூடாது; இதில் அதிகாரப் பகிர்வும் இருக்க வேண்டும்" என்று கூறினார். மேலும், "ஏனென்றால், தமிழ்நாட்டில் எந்தக் கட்சியும் தனித்து வெற்றி பெற முடியாது. ஒவ்வொரு கட்சிக்கும் கூட்டாளிகள் தேவை. நாங்கள் மத்தியிலும் (ஐக்கிய முற்போக்குக் கூட்டணி ஆட்சிக்காலத்தில்) திமுகவுக்கு அதிகாரத்தை வழங்கினோம். அதே சூத்திரம் மாநிலத்திலும் பின்பற்றப்பட வேண்டும். இது தமிழ்நாட்டு மக்களுக்கு அளித்த வாக்குறுதிகளை காங்கிரஸ் நிறைவேற்ற விரும்புவதால் தான்" என்றும் அவர் விளக்கமளித்தார்.

காங்கிரஸ் வளர்ச்சி இல்லையா?

காங்கிரஸ் கட்சி கூட்டணியின் ஒரு பகுதியாகப் போட்டியிட்ட தொகுதிகளின் எண்ணிக்கை தொடர்ந்து குறைந்து வருகிறது. 2011-இல் 63 தொகுதிகளிலிருந்து ஐந்து ஆண்டுகளுக்குப் பிறகு 41 ஆகவும், 2021-இல் 25 ஆகவும் குறைந்துள்ளது. அதேபோல, அக்கட்சியின் ஒட்டுமொத்த வாக்கு சதவீதமும் குறைந்துள்ளது. 2011-இல் 9.3% ஆக இருந்தது 2016-இல் 6.42% ஆகவும், 2021-இல் 4.27% ஆகவும் சரிந்துள்ளது.

தமிழ்நாட்டிலுள்ள அனைத்து காங்கிரஸ் எம்.பி.க்களும், கூட்டணி களத்தில் செயல்படும் விதம் குறித்து கட்சித் தொண்டர்கள் அதிருப்தியில் இருந்ததை ஒப்புக்கொண்டனர். இருப்பினும், கூட்டணியின் எதிர்காலம் குறித்து அவர்களுக்குள் கருத்து வேறுபாடுகள் நிலவின.

தமிழக வெற்றிக் கழகம் குறித்து மற்றொரு காங்கிரஸ் நிர்வாகி கூறுகையில், "கருத்தியல் ரீதியான போராட்டத்தில் விஜய் எந்த நிலையில் நிற்கிறார் என்பது யாருக்கும் தெரியாது. அத்தகைய ஒருவருடன் நாம் எப்படி கூட்டணி வைக்க முடியும்? தமிழ்நாட்டில் நமக்கு இருக்கும் கருத்தியல் பலத்தை நாம் இழந்துவிட முடியாது. அவர் நாளை எங்கே இருப்பார், என்னவாக இருப்பார் என்பது கடவுளுக்குத்தான் தெரியும். நாம் சந்தர்ப்பவாதிகளைப் போலத் தோற்றமளிக்க முடியாது" என்று விமர்சித்தார்.

முன்னாள் தலைவர் சோனியா காந்திதான் 2004-இல் திமுகவுடன் கூட்டணியை உருவாக்கினார் என்பதை அந்த எம்.பி. சுட்டிக்காட்டி, "யாராவது அவரிடம் கேட்டார்களா? யாராவது சென்று கேட்கத் துணிவார்களா? தமிழ்நாட்டில் நாம் கேலிக்குரியவர்களாகிவிட்டோம். பொதுவெளியில் அறிக்கை வெளியிடுபவர்களை மாநிலத் தலைவரால் கட்டுப்படுத்த முடியவில்லை. டெல்லியும் இதில் தலையிடவில்லை" என்று அங்கலாய்த்தார்.

காங்கிரஸ் அப்செட்

காங்கிரஸ் தலைவர் ராகுல் காந்திக்கும் முதல்வர் ஸ்டாலினுக்கும் இடையே சிறந்த உறவு இருப்பதாக அந்த காங்கிரஸ் நிர்வாகி தெரிவித்தார். அவர் ஸ்டாலினை அண்ணன் என்று அழைக்கிறார். நாளை, நாம் தமிழக வெற்றிக் கழகத்துடன் கூட்டணி வைத்தால், திமுகவை 'தீய சக்தி' என்று சொன்ன விஜய்யுடன் அவர் மேடை பகிர்வாரா? ராகுல் என்ன நினைக்கிறார் என்பது யாருக்கும் தெரியுமா? என்றும் கேள்வி எழுப்பினார்.

தற்போதைய கூட்டணி நமக்குப் பயனளிக்கவில்லை என்று நாம் நினைத்தாலும், "மோசமான கூட்டணியுடன் செல்வதற்கு எந்தக் காரணமும் இல்லை" என்று மற்றொரு எம்.பி. கருத்து தெரிவித்தார்.

காங்கிரஸ் தனது திறனையும், செல்வாக்கையும் மீறி இடங்களை நாடுவதாக திமுக தலைவர்கள் தெரிவித்தனர். "காங்கிரஸுக்கு சுமார் 25-30 இடங்களை வழங்க திமுக தயாராக உள்ளது. ஆனால், காங்கிரஸ் மேலும் 10 இடங்களை விரும்புகிறது. இந்த விவகாரம் தொடர்பாக காங்கிரஸ் உயர் தலைமைடன் பேசுவோம், ஒரு சந்திப்புக்காக காத்திருக்கிறோம்" என்று ஒரு திமுக எம்.பி. கூறினார். இதனால் வரும் நாட்களில் இந்த கூட்டணியில் என்ன நடக்கும் என்பது தெரிய வரும் என்கிறார்கள் காங்கிரஸ் தரப்பினர்.

English summary

What is really happening between DMK - Congress - TVK Alliance: What is the real problem here?