முதன் முறையாக அந்த வார்த்தையை பயன்படுத்திய சீனா! வெனிசுலா விஷயத்தில்.. அமெரிக்காவுக்கு வார்னிங்

Published: Sunday, January 4, 2026, 13:47 [IST]

Subscribe to Oneindia Tamil

பெய்ஜிங்: வெனிசுலா அதிபர் நிக்கோலஸ் மதுரோ, அமெரிக்காவால் கைது செய்யப்பட்டிருப்பது சர்வதேச அளவில் சலசலப்பை ஏற்படுத்தியிருக்கிறது. இந்நிலையில், இந்த நடவடிக்கைக்கு அமெரிக்காவுக்கு கண்டனம் தெரிவித்து சீனா பயன்படுத்தியிருக்கும் வார்த்தைகள் கவனம் பெற்றிருக்கிறது.

வெனிசுலாவிலிருந்து அமெரிக்காவுக்கு கொகைன் போன்ற போதைப்பொருட்கள் கடத்தப்படுவதாகவும், இந்த கடத்தலுக்கு தலைமையாக மதுரோ இருக்கிறார் என்று கூறியும், அவரை அமெரிக்க ராணுவம் கைது செய்திருக்கிறது.

இப்படி இருக்கையில், இந்த நடவடிக்கைக்கு சர்வதேச அளவில் கடும் கண்டனங்களை தெரிவித்து வருகின்றன. வெனிசுலா அதிபர் நிக்கோலஸ் மாதுரோ மற்றும் அவரது மனைவியை அமெரிக்கா உடனடியாக விடுவிக்க வேண்டும் என சீன வெளியுறவு அமைச்சகம் வலியுறுத்தியுள்ளது. மேலும், வெனிசுலா நிலவரத்தை பேச்சுவார்த்தை மூலம் தீர்க்கவும் கோரிக்கை விடுத்துள்ளது.

வெளியுறவுத்துறை விடுத்துள்ள அறிக்கையில், "வெனிசுலா அதிபர் நிக்கோலஸ் மாதுரோவையும் அவரது மனைவியையும் உடனடியாக விடுவிக்க வேண்டும், அவர்களின் தனிப்பட்ட பாதுகாப்பை உறுதிப்படுத்த வேண்டும், வெனிசுலா அரசாங்கத்தை கவிழ்ப்பதை நிறுத்த வேண்டும்" என அமெரிக்காவை நேரடியாக வலியுறுத்தியுள்ளது. இந்த நடவடிக்கை சர்வதேச சட்டத்தின் தெளிவான மீறல் என்றும் சாடியுள்ளது.

இந்த அறிக்கையில் சீனா 'Shēn biǎo zhènjīng' என்கிற வார்த்தையை பயன்படுத்தியிருக்கிறது. இந்த வார்த்தையை இதற்கு முன் ஈரான் மீதான தாக்குதலின் போது கூட சீனா பயன்படுத்தவில்லை. உலக தலைவர்கள் படுகொலை செய்யப்பட்ட போதுதான் இதற்கு முன்பு சீனா இந்த வார்த்தையை பயன்படுத்தி உள்ளது. இந்த வார்த்தைக்கு 'அமெரிக்கா ஆழ்ந்த அதிர்ச்சியை ஏற்படுத்தியுள்ளது' என்று அர்த்தம்.

இன்று வெனிசுலா அதிபரை கடத்தியவர்கள், நாளை சீன அதிபரையோ, ரஷ்ய அதிபரையோ கடத்த மாட்டார்கள் என்பதற்கு என்ன நிச்சயம் இருக்க முடியும்? எனவேதான் சீனா இந்த விஷயத்தை ஆழமாக பார்க்கிறது. அதன் வெளிப்பாடுதான் 'Shēn biǎo zhènjīng' என்கிற வார்த்தையின் பயன்பாடு என்று சர்வதேச அரசியல் நிபுணர்கள் கூறுகின்றனர்.

ரஷ்யாவும் இந்த விவகாரத்தில் காட்டமாக கருத்து தெரிவித்திருந்தது. அமெரிக்காவின் ஆயுதம் ஏந்திய ஆக்கிரமிப்பு செயல் என்று ரஷ்யா கண்டனம் தெரிவித்திருந்தது. சீனாவும், ரஷ்யாவும் இதை சீரியஸாக பார்க்க காரணம் இருக்கிறது. வெனிசுலாவின் எண்ணெய் வளம் கைப்பற்றப்பட்டால், அது அமெரிக்காவின் ஆயுத விரிவாக்கத்திற்கு ஊக்கம் கொடுக்கும். உக்ரைனுக்கு இதுவரை இல்லாத அளவிலான ஆயுதங்களை அமெரிக்கா வழங்கும். இதன் மூலம் ரஷ்யாவை கட்டுப்படுத்தும்.

அடுத்தப்படியாக ஈரானை மொத்தமாக காலி செய்யவும் தயங்காது. ஈரான் போனால், சீனா தடுமாற வாய்ப்பு இருக்கிறது. இப்படியாக சீனாவையும், ரஷ்யாவையும் கட்டுக்குள் கொண்டுவர அமெரிக்கா முயற்சிக்கிறது என்றும் சொல்லப்படுகிறது.

Published On January 4, 2026