• search

முகத்தில் தெளித்த சாரல்...

By Staff
FOLLOW ONEINDIA TAMIL ON
For Quick Alerts
ALLOW NOTIFICATIONS
For Daily Alerts

    மனிதன் எதையுமே முழுமையாக ரசிப்பதில்லை-
    இனியவை அனைத்தையும் ஒரு சேரப் பருகத் துடிக்கிறான்-

    இளநீரைப் பறிக்க தென்னையையே சாய்க்கிறான்-
    மாங்கனியைப் பறிக்க மரக்கிளையை முறிக்கிறான்-

    அவனுக்கு அனைத்திலும் குரூரத்துடன் கூடிய ஆசை.
    அனைத்து இனிமைகளையும் அடுத்தவர்கள் தட்டிப் பறிக்குமுன்
    தான் மட்டுமே அள்ளி விழுங்க வேண்டும் எனும் பேரவா-

    சாப்பிடும் போதும் சரி-
    பருகும் போதும் சரி-
    அவன் வன்மம் அப்பட்டமாக வெளிவருகிறது-

    அவனால் தன் ஏக்கத்தைக் கூட விழிகளுக்குள் திணித்து
    மறைக்க முடிவதில்லை.

    அவனால் தனித் தனியாகப் பிரித்து ருசிக்க முடியாததாலேயே
    எந்த ருசியுமே இறுதிவரை அவனுக்குத் தெரியாமலேயே போய்விடுகிறது.

    குளிரில் கனல் மூட்டிக் கொள்கிறான்-
    கோடையில் குளிர்சாதனம் கோருகிறான்-

    இருப்பதில் இருப்பதில்லை அவனுக்கு திருப்தி-
    இல்லாததை உருவாக்குவதில் இருத்தலோடு அவனுக்கு எப்போதும் போட்டி-

    விளக்கு இருட்டைத் தேடுவதாக இருந்தால் தேவலை
    இருட்டை விலக்குவதாக இருக்கும் போது மட்டுமே
    தொல்லை எல்லையை மீறுகிறது,

    இரவும் நிலவும்
    என் அண்டைவீட்டுக்காரர் புல்லாங்குழலில்-
    ஜதி கெட்டு

    ஆங்கில மொழிபெயர்ப்பை வாசிக்க விரும்புபவர்களுக்கு
    Night, and The moon
    My neighbours, playing on his flute -
    out of tune
    Kojo
    இரவு முழுமையாக இருப்பதால் தான் நிலவு
    அழகாக இருக்கிறது.

    எப்போது போர்கடுமையாக இருக்கிறதோ
    அப்போது தான் வெற்றி மகிழ்ச்சியாக இருக்கும்.-

    அசாத்தியமான வெற்றியை கைகளுக்குள் கொண்டு வரும்போதுதான்
    மனத்தில் இனிமை வழியும்-

    நிலவுக்கு இருக்கும் அழகிற்கு இருட்டுதான் மூலகாரணம்-
    இருட்டு தீவிரமடைய தீவிரமடையத்தான் நிலவின் நுட்பமான கிரணங்கள்
    சிலிர்க்க வைக்க முடியும்.

    கோஜோ சொல்லும் நிலவு
    நிச்சயம் முழு நிலவாகத்தான் இருக்க முடியும்-

    கவிதையை வாசிக்கும் போது-
    மலைக்கான நெடிய பயணம்
    மலையுச்சியிலிருந்து தொடங்குவதைப்போல
    நம் இலட்சியம் நிலவு என்றதும் பெளர்ணமியிலிருந்து தொடங்கட்டும்.

    நிலவின் அழகு இரவின் நிசப்தத்தில் அடங்கியிருக்கிறது-
    பகலில் நாம் தேவையில்லாமல் தேய்ந்து கொண்டிருக்கிறோம்--
    அன்று நிகழ்த்தியவற்றை இரவில்
    நினைத்துப் பார்த்தால் எவ்வளவு வியர்த்தம் எனத் தெரியும்.

    உதயத்தைக் கவிதைகள் பாடுகின்றன-
    மனிதன் - ஆனால் சபித்துக் கொண்டே இருக்கிறான்-
    அவன் தன் நிம்மதியை இரவின் கருப்பைக்குள் தேடுகிறான்.

    பதற்றமில்லாத போது நிசப்தமான இரவு-
    நிர்மலமான இரவு-
    உலகமே நின்று போனது போன்ற நிதானம் - அமைதி - நிம்மதி.

    வெளிச்சம் தீவிரமாக வேண்டுமெனில் காதுகள் மூட வேண்டும்-
    இசை தீவிரமாக வேண்டுமெனில் கண்களை மூட வேண்டும்-

    முழுநிலவு மாதத்தில் ஒரு முறை வாய்த்தாலும்-
    எத்தனை முழு நிலவுகளை வாழ்நாளில் முழுமையாக ரசித்திருக்கிறோம்-

    நாம் பிறை கண்டவர்கள் - நிலாக் கண்டவர்கள் இல்லை -
    இன்று மேகங்கள் முந்தானையால் மூடாத முழுநிலவு-

    இதை ரசிக்கும் போது
    எவ்வளவு இனிமையாக வாசித்தாலும்
    அண்டைவீட்டுக்காரர் புல்லாங்குழல் அபசுரம்தான்-

    புல்லாங்குழலை எப்போது வேண்டுமானால் வாசிக்கலாம்-
    முழுநிலவை வசதிபோல் வாசிக்க முடியுமா?

    (தூறல் வரும்)

    பொருத்தமான வரன் தேடுகிறீர்களா? தமிழ்மேட்ரிமோனியில் பதிவு இலவசம்!

    நாள் முழுவதும் oneindia
    செய்திகளை உடனுக்குடன் பெற

    We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more